Skip to content
BibleKenya

Bɛkwyel Bible

Ebele 5

Ghaa-Zɛɛb djas sɛ́ɛaa ɛ́ pak bot, mɛsa mɛ ɛ́ ɛsa mɛsa mɛ Zɛɛb étɛp bot. Nyɛ djɛ Zɛɛb ɛ́ esa e ɛgwyena nɛ ɛka ebuwa étɛp mesyem mɔɔ. Boo ghaa-Zɛɛb ɛ́ nɛ ghwyil ɛdi nɛ lyem ghoŋ nɛ bot ɛ di ààgu sonok ɔ, nɛ bot ɛ zewo ze ɔ. Etɛɛ náá, nyɛy nyɛ ɛmet ɛ́ mot, yɛ ɛ́ nɛ esa ee di edhaa nyɛ ghwyil ɛ. Dáa ye di náá, yɛ ɛ́ nɛ esa ee di edhaa nyɛ ghwyil ɛ, nyɛ goka ɛ́ nɛ ɛka ebuwa étɛp ɛpelak ɛ mesyem mɛ bot, dɔɔ nɛ ɛpelak ɛ mesyem mɛ met1. Mot tok nɛ ghwyil dja djem náá, mɛ moo ɛ́ ghaa-Zɛɛb. Yɛ ɛ́ Zɛɛb ɛ di esa náá, mot di ghaa-Zɛɛb, dáa nyɛ nasa nɛ Aalɔn ɛ.

Yɛ ɛ́ tyee wat nɛ Klisto, ye tok nyɛy ɛmet nasa náá, nyɛ di boo ghaa-Zɛɛb. Nyɛ nabela di boo ghaa-Zɛɛb ɛ́ nɛ Zɛɛb, mot nake nɛ nɛ náá:

«Yɛ ɛ́ wɔy ɛ di Mɔn'am,

kana dwoo pan mos'ak, mɛ ɛ́ Soog2.»

Zɛɛb nabaake ɛ́ náá:

«Wɔ ɛ́ ghaa-Zɛɛb kɔm-kɔm sii nɛ kɔm,

tyee wat nɛ Mɛlkisedɛk3.»

É sok Yezu nadi kɔ ɛko ɛ bɔs ɛ, nyɛ nadi edjaala, dɔɔ nɛ ɛwaab ɛ ghoŋ pɛ daa Zɛɛb tɔ etsim, nɛ miŋal é mis. Nyɛ nadi edjaala deenek ɛ́ nɛ Zɛɛb, mot nagoka nɛ ɛtsik nyɛ tɔ ɛsyee ɔ. Tin, Zɛɛb naagwak mendjaala mɛ, etɛɛ náá, nyɛ nadi ɛ́ tɔ ɛlooba nɛ etɛp djas. Ye nakoozodi náá, nyɛ ɛ́ Mɔn ɛ Zɛɛb, nyɛ naadjek ɛlooba nɛ Zɛɛb tɔ mezuk mɛ djas nyɛ naboma nɛ yɛ ɛ. Zɛɛb naasa náá, nyɛ di mot zedjala ɔ. Tin, bot djas di elooba nɛ Klisto ɔ, bɛ waabela tsik na kɔm-kɔm kɔ ɛsu ɛ lɛ. Deenek, Zɛɛb eedjɛ nyɛ di boo ghaa-Zɛɛb tyee wat nɛ Mɛlkisedɛk.

Ɛdi ɛ́ ghiŋ tɔ ɛdum ɛ koŋ nɛ Zɛɛb

Bis ɛ́ nɛ bɛtɛ nɛ etɛp e ɛlii dum nɛ tɛp'ak. Sa di esa ɛ, yɛ ɛ́ náá, ye nɛ kɔɔla é ɛbɔɔd ɛ tɛp tak ɛnyɔɛpe, etɛɛ náá, bi ààkawa zii é ɛmɛt ɛsuk ɛ etɛp. Ye moo ɛ́ nɛ bɛtɛ nɛ mɛlu di esiŋa náá, bi di bɛlyoel ɛ. Deenek, bi dinaa nɛ gwyes náá, bɛ baalyo bin ba mɛlyo mɛ mɛkɛn e Mɛkpa ɛ Zɛɛb. Bi dinaa nɛ gwyes ɛdɛ mɛdii mɛ mɛbel, ààbɛ edee e bot ɛ di nɛ mɛdjɛ ɔ. Mot di náá, edee bɛ ɛ, mɛdii mɛ mɛbel nɛ mɛdii mɛ mɛbel ɔ, yɛ ɛ́ mɔn tɔlɔɔ. Nyɛ tok nɛ ghwyil ɛsuu mɛso é etɛp di náá, yɛ ɛ́ epiki ɛ. Tin, mɛdjaab mɛ na lyel-lyel ɛ edee bot ɛ di nɛ mɛdjɛ ɔ, yɛ ɛ́ edee eboo bot. Tɔ mɛsa mɔɔ, bɛ eezegu mɛnyɔ nɛ ɛbiyo.

Source notes (3)
  1. Cross-reference * Msa 9.7
  2. Cross-reference * Mɛd 2.7
  3. Cross-reference * Mɛd 110.4

Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.