Gesami Hea:su 55

Dunu amo da ea Samaga Hohono Hamoi, amo ea Sia:ne Gadosu

1Gode! Na sia:ne gadobe nabima!

Na Dima edegebe amo mae yolesima!

2Na sia: nabima amola na sia:be goea bu dabe adole ima.

Na da gufia:ne hamoiba:le, gasa hame gala.

3Nama ha lai da nama magagibiba:le, na da bagade beda:i.

Wadela:i hamosu dunu da na banenesibiba:le, na da gala:la sa:i dagoi.

Ilia da nama bidi hamosu gaguli maha.

Ilia da nama ougi gala amola na higasa.

4Na da baligili beda:i.

Na da bogosa:besa:le bagade beda:i, amola banenesi dagoi ba:sa.

5Na da beda:ga yagugulala.

Na da beda:ne se nabasu amoga gagulaligi. 6Na da ougia hamoi ‘dafe’ sio agoai ganeya:be.

Amai ganiaba, na da amoga hagili asili, helefimu soge hogola:loba.

7Na da hagili badiliadafa hafoga:i sogega fifi lasu hamona:noba.

8Na da fo amola mulu gulubagebe amoga fasa:besa:le,

ougiha wamoaligimusa: hedolowane fimusa: hogola:loba.

9Hina Gode! Nama ha lai dunu ilia sia:mu liligi huluane ededenanesima!

Na da moilai bai bagade ganodini,

gegesu amola bidi hamosu bagadewane ba:lala.

10Amo bidi hamosu da bagadeba:le, gasia amola hayoga fedege agoane

moilai bai bagade sisiga:le disisa.

11Gugunufinisi hou da soge huluane ganodini ba:sa.

Moilai bai bagade logo da banenesisu hou

amola fedele wamolasu amoga nabai gala.

12Be nama ha lai dunu da nama lasogole sia:sa ganiaba,

na da hame da:i dione dawa:la:loba.

Amola nama dabesu dunu da nama hidale sia:sa ganiaba,

na da ema hobeale wamoaligimu dawa:la:loba.

13Be di, na dogolegei sama disu da nama lasogole amola hidale sia:nana.

14Ani da musa: gilisili osodogone sia:dasu.

Ania da Debolo ganodini Godema nodone sia:ne gadosu.

15Nama ha lai dunu ilia da ilia bogosu eso mae doaga:le, bogomu da defea.

Ilia da esaleawane, bogoi sogega gudu sa:imu da defea.

Wadela:i hou da ilia diasu gaguli gagai

amola ilia dogo amo ganodini dialebe ba:sa.

16Be na da Hina Godema, na fidima:ne wele sia:sa.

Amasea, E da na gaga:mu.

17Hahabe amola esomogoa amola gasia,

na egasu sia: amola na gogonomosu da Ema heda:sa.

Amola E da na sia: nabimu.

18Na da nama ha lai dunu bagohame ilima gegena ahoa.

Be Hina Gode da na gaga:iwane bu goeguda: oule misunu.

19Gode da musa: hemoneganini, ouligisa mana wali doaga:i.

E da na sia: nabimu amola nama ha lai dunu ili hasalimu.

Bai ilia da afadenemu higasa amola Godema hame beda:sa.

20Na musa: dogolegei sama da ea sama ili amo doagala:le,

amola e da ea ilelegele sia:i amo fi dagoi.

21Ea sia: da ha:i manu gugui defele nabi.

Be ea dogo ganodini, ougili higasu fawane galu.

Ea sia: da susuligi noga:i defele nabi.

Be amo sia: da gegesu gobihei agesoi defele, fa:ginisi.

22Dilia! Dilia da:i dioi amola se nabasu huluane amo Godema yolesima.

Amasea, E da dili gaga:mu.

Ea fidibiba:le, moloidafa dunu da hamedafa hasali dagoi ba:sa.

23Be Di, Gode! Di da amo fane legesu dunu

amola wamolasu dunu amo fane legemu.

Ilia esalusu dogoa hame doaga:i galeawane,

Di da ili bogoi uli dogosu sogebi amoga oule masunu.

Be amomane na da Dima fawane dafawaneyale dawa:mu.