Gesami Hea:su 56

Gode Ea hou Dafawaneyale Dawa:beba:le Sia:ne Gadosu

11

Gode! Nama asigiba:le, fidima!

Bai nama ha lai dunu da nama doagala:sa.

Ilia da eso huluane, nama se iaha.

2Hahabe asili daeya mae fisili, ilia da nama doagala:sa.

Nama gegebe dunu da bagohamedafa.

3Hina Gode Bagadedafa! Na da beda:i galea,

na da Dima dafawaneyale dawa:mu.

4Na da Godema dafawaneyale dawa:beba:le, hame beda:sa.

Na da Ea hamomusa: ilegei amo ba:beba:le, Ema nodosa.

Be osobo bagade dunu da na wadela:lesimu hame dawa:.

5Nama ha lai dunu da hahabe asili daeya amo na se nabima:ne,

bidi hamosu hamonana.

Ilia da esoha huluane mae fisili, na se nabima:ne ilegelala.

6Ilia da wamoaligisu sogebi amo ganodini gilisili, na hamobe huluane ba:lala.

Ilia da na medole legemu hanai.

7Gode! Ilia wadela:i hou hamobeba:le, ilima se dabe ima.

Dia amo dunuma ougili hasalima.

8Na se nabasu huluane, amo Di dawa:.

Di da na disa si hano amo idili dedena sa:i diala.

Amo da Dia buga ganodini dedei diala.

9Esoha amoga na da Dima wele sia:sea, nama ha lai dunu da sinidigili,

sefasi dagoi ba:mu. Amo na dawa:.

Bai Gode da namagai gala.

10E da Hina Godedafa

amola na da Ea sia:i ilegei amoma nodosa.

11Na da Ema dafawaneyale dawa:sa.

Amaiba:le, na da hame beda:mu!

Amola osobo bagade dunu da na wadela:lesimu hamedeidafa.

12Gode! Na da Dima imunusa: ilegei liligi amo Dima dafawane imunu.

Na da Dia nodoma:ne gobele salasu amo Dima imunu.

13Bai Dia da na mae bogoma:ne, na gaga:i dagoi.

Amola nama ha lai ilia na mae hasalima:ne hamoi.

Amaiba:le na da Gode Ea midadi, hadigi amo da esalebe dunuma diga:be,

amo ganodini lala.