Gesami Hea:su 122

Yelusaleme Moilai Bai Bagade amoma Nodosu

1Ilia da nama amane sia:i, “Ninia Hina Gode Ea diasuga ahoa:di!”

Amo sia: nababeba:le, na da hahawane ba:i.

2Amola wali ninia da guiguda: lela,

Yelusaleme gagoi ganodini lelefula.

3Yelusaleme da moilai bai bagade noga:ledafa

bu buga:le gagui diala.

4Isala:ili fi huluane da amogawi Hina Gode Ea hamoma:ne sia:i defele,

Ema nodone sia:musa: maha.

5Goegawi, Isala:ili hina bagade dunu

da ilia fi dunuma fofada:musa: fi dialu.

6Yelusaleme da olofosu ba:ma:ne, Godema amane sia:ne gadoma,

“Dunu amo da di Yelusaleme, amoma asigi galea,

ilia bagade gaguiwane esalumu da defea.

7Dia gagoi dobea ganodini amola dia hina bagade diasu ganodini,

olofosu amola gaga:su hou fawane dialumu da defea.”

8Na da na sosogo fi amola na na:iyado dunu amoma asigiba:le,

na da Yelusaleme amoma amane sia:sa, “Olofosu dima dialoma!”

9Na da ninia Hina Gode Ea diasu amoma asigiba:le,

na da Yelusaleme da bagade gaguiwane dialoma:ne Godema sia:ne gadosa.