Gesami Hea:su 11

Hina Godema Gasa Gala Dafawaneyale Dawa:su

1Hina Gode da na ga:ma:ne, na da dafawaneyale dawa:sa.

Di da abuliba:le gogolele nama agoane sia:sala:?,

“Di sioga wa:le ahoabe agoane goumia masa.

2Bai wadela:i hamosu dunu ilia oulali amola ilia dadi amo dimagale

amola dunu moloidafa gasimigi amoga lelebe gala:musa: amabela:?

3Liligi huluane da mugulusia, dunu noga:i da hahamomu hamedei ba:sa,

“Di da abuliba:le agoane sia:sala:?

4Be Hina Gode da Ea Hadigi Debolo diasu ganodini esala.

Amola Ea fafai fisu da Hebene amo ganodini diala.

E da soge huluane ganodini, dunu fi huluane ba:lala.

Amola ilia adi hamobeale, amo huluane dawa:lala.

5E da noga:i dunu amola wadela:i hamosu dunu defele adoba:sa.

Be E da wadela:i hame nabasu dunu amo bagadewane higasa.

6E da wadela:i hamosu dunuma nenowai amola nenanebe salafa sanasisa.

E da gia:i bagade fo amoga ilima se iaha.

7Hina Gode Ea hou da moloidafa amola E da noga:i hou hamobe amoma asigisa.

Nowa da amo hou hamosea, da Ea esalebe gadenene esalumu.