Paliya Bible
तीतुस 1
पोलुस ने तां गेथी जे भगवान नो चाकर्यो अने ईसु मसी नो नेवताळो से, भगवान ना टाळला माणहु ना भरहा ने ठीकाणे पाड़वा अने सच्चाय नो ग्यान ठीकाणे पाड़वा करीन जे भक्ती भेळ तीयार से। तीहयी अमरकाय जीवाय नी आह मे जीनो वायदो भगवान, जे कदी नी झुट मेके, तीहयो सुरु गेथो करलो से। पण हाव वारु टेमे भगवान तीनात बोलु ने तीहया परच्यार नी लारे उजन्तो कर्यो, जे आपणो छुटकारो आपण्या भगवान ना हुकम नी अनसारे मने ह़ोपलो हतो। 1
तीतुस ना नामे, जे भरहा ना साजल्या ना वीच्यार सी मारो खरलो सोरो से: करीन भगवान बाह अने आपणा छुटकारो आपण्या ईसु मसी भणी गेथी तने दया अने सांती जड़ती रेय।
क्रेते मे तीतुस ना काम
मे तने आनीन करते क्रेते मे सोड़ीन आवती रेलो, के तु बचली बीजी वात ने ह़ुदारे, अने मारा हुकम नी अनसारे ह़ेर-ह़ेर पेल्ना ने टाळे। 2अने जे कंय बी गुनो नी कर्यो, एकीत बयर नो घोरवाळो हय, जीना सोरा ईसु पोर भरहो करन्या हय, अने तीमनी मे लुच्चाय अने आय्ह-बाहा ना हुकम नी मानवा नो गुनो नी रेवा जोवे। काहाके पुडारी ने भगवान नो चाकर्यो से करीन गुनाळ्ळो नी रेवा जोवे; अने नी हटाळ्ळो, अने नी रीह करन्यो, नी ह़रु पीन छाकण्यो, अने नी झगड़ा-रगड़ा करन्यो, अने नी रीकामी कमाय नो लालच्यो रेवा जोवे। पण पोरणा करवा वाळो, अने भलाय करवा वाळो, नीचळो, अने नीयाव करन्यो, चोखलो, अने नीचळो रेवा जोवे। अने भरहो करे एवा भगवान ना बोलु पोर जीमनी ह़ीकापण तीमने आपली हती, वातड़ा रीन टेकला रेवा जोवे, अने जखड़ी पड़वा वाळा ने जपाप आपीन तीमनु मोडु बंद कर सके, अने खरली अक्कल सी ह़ीकापण आप सके।
काहाके घणा माणहु कायदा ने तोड़वा वाळा अने बक-बक करन्या अने धोको देण्या से; खास करीन खतनु खरला माय्न। आमनु मोडु बंद करवा जोवे: आहया माणहु रीकामी कमाय नी लेदे वातु कीन पुरा घोराणा ने बगाड़ देय। तीमनी माय्न एक माणेह जे क्रेते नो भगवान वगे गेथो केण्यो माणेह हतो, तीमना बारा मे केदलु से, “क्रेते ना आहया आखा माणहु झुटा से, तीहया अळह़ायला जानवरु नी तेम आह़फाम ना पेट नी करते जीव र्या।” अने आहयी गवाय ह़ाची से, करीन तीमने भारी चेतावणी आप काहाके तीहया भरहा मे वातड़ा हय जाय, अने तीमने युहदी माणहु ना मन घड़्या काहण्या अने एवा माणहु नी वात ह़मळवा सी रोको, जे माणहु सच्चाय गेथा भटक जेला से। जे माणहु नु मन चोखलु से तीमनी जुगु आखी चीज चोखली से, अने जे भरहो नी करे तीमनी जुगु कंय बी चीज वीटळ्ळु एतरु नी पण तीमनी अक्कल अने दीमाक बी वीटळ्ळो से। तीहया केय, के आमु भगवान ने जाणया: पण तीमना वेहवार ने देखीन कोय बी ह़मज जाय के हीय्या भगवान ने नी जाणे, काहाके तीहया वण-अकल्या अने हुकम नी मानन्या से: अने कानु बी वारलु काम करवा नी लायक नी हय।
Source notes (2)
- Cross-reference 2 कुरन्थी 8:23; गलातीयो 2:3; 2 तीमुथीयुस 4:10
- Cross-reference 1 तीमुथीयुस 3:2-7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.