Paliya Bible
रोमीयो 16
वारला से के केम
मे तमने फीबे ना लेदे जे अमारी बेनेह अने कीरख्या नी मंडळी नी सेवा करवा वाळी से, वीन्ती करु। के तमु सेवा चोखला माणहु ने जोवे, तीने मालीक मे मानो अने कानी बी वात मे तमारी तीने जरवत पड़े, ता तमु मदत करो, काहाके तीहयी घणा जणा नु अने मारी बी भलु करवा वाळी रेली से। 1
पीरीस्कीला अने अक्वीला ने जे मसी ईसु मे मारी ह़ाती से, वारु से केम। तीहयी मारा जीव ना लेदे खुद ना जीव ने खतरा मे नाख देदली; अने मे एतरोत नी पण आड़जात्या नी आखी मंडळी बी तीने वारु से केय। तीहयी मंडळी ने बी वारला से केम जे तीना घोर से, मारा मोंगाळ्ळा ईपेनीतुस ने, जे मसी ना लेदे आसीया नो पेल्नो फोळ से, वारलो से केम। मरीयम ने जे तमारी लेदे घणी मेहनत करी वारली से केम। अंदरुनीकुस अने युनीयास ने जे मारा कुटुम ना से, अने मारी ह़ाते जेल मे बंद हया अने नेवताळा मे नामह़ाद्या से, अने मारी गेथा पेले मसी बणला तीमने वारला से के केम।
अम्पलीयातुस ने, जे मालीक मे मारो मोंगाळ्ळो से, वारलो से केम। उरबानुस ने, जे मसी मे अमारो ह़ाती से, अने मारा मोंगाळ्ळा ईस्तखुस ने वारलो से केम। अपीलेस ने जे मसी मे खरलो नीकळ्यो, वारलो से केम। अरीस्तुबुलुस ना घोराणा ने वारला से केम। मारी ह़गली हेरोद्यान ने वारली से के केम। नरकीसुस ना घोराणा ने जे माणहु मालीक मे से, तीमने वारला से के केम।
तरुफेना अने तरुफोसा ने जे मालीक मे मेहनत करे, तीमने वारला से के केम। मोंगाळ्ळा पीरसीस ने जे मालीक मे घण-जबर मेहनत कर्यो, वारलो से के केम। 2रुसुफ ने जे मालीक मे टाळलो से, अने तीनी आय्ह ने जे मारी बी से, बेम ने वारला से के केम। असुंकीरीतुस ने अने फीलगोन ने अने हीरमेस ने, अने पतरुबास ने, अने हीरमास ने, तीमनी ह़ाते रेण्या भाय ने मे आवही अने आवजो की र्यो। फीलुलुगुस ने अने युलीया ने, अने नेरयुस ने अने तीनी बेनेह ने, अने उलम्पास ने अने तीनी ह़ाते ना आखा चोखला माणहु ने आवही अने आवजो केम।
आखरी हुकम
तमु आंबा-सांबा चोखलो कुको दीन वारला से के करीन पुछो अने आवही अने आवजो केवो। तमु आखा ने ईसु मसी नी मंडळी वगे गेथा आवही अने आवजो केम।
आखरी चेतावणी
भायु अने बेन्या मे तमारी सी वीन्ती करु, के तमु तीहया माणहु सी चेतीन रेजो जे बेरजाव पाड़वा अने बीजा ना लेदे पाप ना कारण बणे। आवो वेहवार तीहयी ह़ीकापण सी मेळ नी खाय जे तमने जड़ली से तमु एवा माणहु सी सेटा रेवो। काहाके आसवा माणहु आपणा मालीक ईसु मसी नी नी, पण आह़फा ना पेट नी सेवा कर र्या; अने वारु-वारु वातु सी ह़ुदला मन ना माणहु ने बहकाड़ देय। तमारी हुकम मानवा नी वात आखी दुर पुग जेली से, एतरे मे तमारा बारा मे खुस से, पण मारी आहयी मरजी से के तमु भलाय करवा करीन अगळवाण्या बण जावो, अने कुहराय बुरफाय जुगु वण-अकल्या बण जावो। सांती आपण्यो भगवान भुतड़ा ने छोटोत तमारा पोगु तळे कचरी देहे।
अमारा मालीक ईसु मसी नी दया तमने जड़ती रेवा जोवे। 3
मारी ह़ाते काम करन्यो साजल्यो माणेह तीमुथीयुस, अने लुकीयुस जे मारा घोरल्या मे नो से, अने यासोन अने सोसीपतरस मे तमने आवही ने आवजो की र्यो।
मारी चीट्ठी ने लीखण्यो तीरतीयुस, तमने मालीक ईसु मे आवही ने आवजो की र्यो। 4
ग्युस नु जे मारी अने मारी मंडळी नी पोरणा-चाकरी करन्यो से, तीहयो तमने वारला से के केय, ईरास्तुस जे ह़ेर नो हीसाप-कीताप राखण्यो से, अने भाय कारतुस बी वारला से के केय। अमारा मालीक ईसु मसी नी दया तमने जड़ती रेवा जोवे। आमीन।
भगवान नी बड़ाय
हाव जे तमने मारी खुस-खबर नु मतलब ईसु मसी नी खुस-खबर ना परच्यार ना लारे तमने टणका कर सके। भगवान नु ह़तायलु वीजाळु जलम गेथुत ह़तायलु हतु। पण हाव उजन्तु हय्न सदा ना भगवान ना हुकम सी भगवान वगे गेथा वात करन्या नी कीतापु ना लारे आखी जाती ने देखाड़ देदलु से, के तीहया भरहा सी हुकम मानवा वाळा बण जाय।
एकीत अगळवाण्या भगवान नी बड़ाय ईसु मसी ना लारे जलमकी हयती रेय। आमीन।
Source notes (4)
- Cross-reference नेवताळा ना काम 18:2
- Cross-reference मरकुस 15:21
- Cross-reference नेवताळा ना काम 16:1
- Cross-reference नेवताळा ना काम 19:29; 1 कुरन्थी 1:14; 2 तीमुथीयुस 4:20
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.