Paliya Bible
1 कुरन्थी 1
पोलुस, वारला से के केय
पोलुस नी भणी गेथा जे भगवान नी ईच्छा सी ईसु मसी ना नेवताळा बणवा करीन बोलाया अने भाय सोस्थीनेस नी भणी गेथी बी से। 1
भगवान नी तीहयी मंडळी ना नामु जे कुरीन्थुस मे से, बाखीन तीमना नामु जे ईसु मसी मे चोखला करला से अने चोखला हयवा करीन बोलावला से; अने अळी तीमना आखा ना नामु बी जे आखी जागा मे अमारी ह़ाते अने आपणा अने तीमना मालीक ईसु मसी ना नाम सी वीन्ती करत्ला से।
अमारा बाह भगवान अने मालीक ईसु मसी नी भणी गेथी तमने दया अने सांती जड़ती रेय।
ईसु पोर भरहो करवा सी संयबरकत
मे तमारा बारा मे आपणा भगवान ने घणो वारु से हमेसा केम, आनीन करते भगवान नी आहयी दया तमारी पोर मसी ईसु मे हयी। पण तमु ईसु मसी मे एक हयवा सी तमु आखी वात मे, अने आखा बोलु अने आखी अक्कल मे मालदार करला से, अने अमारी लारे देखाड़ली ईसु मसी नी गवाय, तमारी वच मे पाकी हय जी। आहयी दया तमने आनीन करते जड़ली से, अने तमने भगवान नी भणी गेथो जड़ला चोखला वाटा मे कानी बी कसर नी हय; जेम के तमु ईसु मसी ने उजन्तो हयवा नी वाट जोय र्या। अने तीहयो तमने आखरी दाड़े लग भरहा मे टेकला राखहे, के तमु ईसु मसी पासो आवहे तीहया दाड़े वण-गुनाळ्ळा देखाव पड़ो। भगवान भरहो करे एवो से जे तमने आह़फा ना सोरा आपणा मालीक ईसु मसी नी मंडळी मे बोलावलो से।
ईसु पोर भरहो करवा वाळी मंडळी मे झगड़ा
ए भाय-बेन्या मे मालीक ईसु मसी ना नाम मे तमु आखा ह़ाते वीन्ती करु के तमु आखा मेळीन एकीत वात केवा, अने तमु आंबा-सांबा झगड़ो ना करो; पण आखा एकीत मन सी भेळा रेवो। ए भाय-बेन्या खलोय नाम ना माणहु मेना मने तमारा बारा मे केदला से के तमु झगड़ो करता आय र्या। 2मारु केवा नु मतलब आहयु से के तमारी माय्न कानो केय के पोलुस मारो मास्तर से, अने बीजो केय के अपुल्लोस मारो मास्तर से, अने बीजो केय के पतरस मारो मास्तर से, अने कानो केय के ईसु मसी मारो मास्तर से। तमारी जुगु मसी वटाय ज्यो ह़ु? तमारी जुगु पोलुस ने कुरुस पोर चड़ावीन खुटा ठोक्ला ह़ु? के तमने पोलुस ना नाम सी पाणी नो बपतीस्मा जड़लो ह़ु? 3
मे भगवान ने घणो वारु से केम, के मे कीरीस्पुस अने गयुस ने सोड़ीन तमारी माय्न कोयने बी पाणी नो बपतीस्मा नी आप्यो, एतरे तमारी माय्न कानो माणेह ईसम नी केवा जोवे, के मने पोलुस ना नाम सी बपतीस्मा आपला से। 4होव, मे स्तीफनुस ना कुटुम ने बी बपतीस्मा आपलो से; ईमने सोड़ीन अळी कोयने बपतीस्मा नी आप्यो, पण ईमने एतरोत बपतीस्मा आपलो से। एतरे ईसु मसी मने बपतीस्मा आपवा नी, पण तीनी खुस-खबर ह़मळावा मोकल्लो से। आहयी खुस-खबर माणहु नी अक्कल सी ह़मळावा नी मोकल्यो, काहाके ईसु मसी नु कुरुस पोर मरनु अमथु नी हयवा जोवे।
ईसु मसी भगवान नी सक्ती अने अक्कल से
जे माणहु भगवान गेथा अलग हय्न खुट र्या तीमनी जुगु ईसु नु कुरुस पोर मरनु गंडाय से, पण अमारी जुगु छुटकारो हात करन्या जुगु, भगवान नी सक्ती से। खरला सास्तर मे लीखलु से:
मे अक्कल वाळा नी अक्कल खत्तम कर देही;
अने ह़मज वाळा नी ह़मज रीकामी कर देही।
अक्कल वाळो माणेह कां से? युहदी-धरम ह़ीकाड़न्या कां से? अने कां से जखड़ी पड़न्या? भगवान आहयी कळी ना माणहु नी अक्कल ने रीकामी नी बणायो ह़ु?
भगवान आनीन करते आसम कर्यो काहाके भगवान नी अक्कल नी अनसारे आहयी कळी ना माणहु आह़फाम नी अक्कल ना लारे भगवान ने नी ओळख्या। ता भगवान ने आहयुत गमे के जे कुरुस नी काहणी ने माणहु अमथी ह़मजे, तीहयात कुरुस नी काहणी ने परच्यार करावीन तीहयी काहणी पोर भरहो करन्या ने छुटकारो आपे। युहदी माणहु ने सेलाणी जोवे, अने युनानी माणहु ने अक्कल जोवे। पण आमु ते कुरुस पोर चड़ावीन खुटा ठोकला ईसु मसी नो परच्यार करया। आहयो परच्यार युहदी माणहु जुगु ठोकर नो कारण से अने जे युहदी नी हय तीहया आड़जात्या माणहु जुगु गंडाय से। पण आखा टाळला माणहु जुगु ईसु मसी भगवान नी सक्ती अने अक्कल से भले तीहया युहदी हय, ते बी अने आड़जात्या हय ते बी। काहाके भगवान नी अक्कल, माणहु नी वण-अक्कल गेथी वदु अक्कल वाळी से, अने भगवान नी लुलखाय, माणहु नी ताखत गेथी वदु जोरभराय से।
ए भायु, अने बेन्या जरीक सोचो, जत्यार भगवान तमने बोलायो ता तमारी मे ढेरेत जणा आहयी कळी ना माणहु नी नींगा मे अक्कल वाळा अने सक्ती वाळा नी हता; अने मोटा घोराणा ना नी हता। पण भगवान आहयी कळी ना गांडा ने टाळ लेदो के अक्कल वाळा ने लजवाड़ देय, अने लुल्ला माणहु ने टाळ लेदो, के सक्ती वाळा माणहु ने लजवाड़ देय। भगवान आहयी कळी मे तीमने टाळ्यो जे हेटा हता, अने तीमनी सी माणहु ह़ीगी करता हता, अने तीमने टाळ्यो जे हंजु लग पयदा बी नी हया हता, आहयी कळी मे जे पेले पयदा हय जेला हता तीमने रीकामा करवा करीन तीमने टाळ्यो। के भगवान अगळ काना बी माणहु मोटाय नी करवा जोवे। पण भगवान आपणु ने ईसु मसी मे एक हयवा करीन बोलावलो से, ईसु मसीत भगवान वगे गेथी अक्कल आपण्यो धरमी बणावण्यो, चोखला बणावण्यो, अने छुटकारो आपण्यो से। अने जीसम चोखली सास्तर मे लीख्लु से: “जे कोय बी मोटाय करवा हींडे, ता मालीक ईसु मे मोटाय करवा जोवे।”
Source notes (4)
- Cross-reference नेवताळा ना काम 18:1
- Cross-reference नेवताळा ना काम 18:24
- Cross-reference नेवताळा ना काम 18:8; नेवताळा ना काम 19:29; रोमीयो 16:23
- Cross-reference 1 कुरन्थी 16:15
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.