Paliya Bible
रोमीयो 12
भगवान नी सेवा नी जीवाय
आनीन करते ए भायु अने बेन्या, मे तमने भगवान नी दया फोम कराय्न वीन्ती करु के आपणा डील ने जीवत्लु, अने चोखलु, अने भगवान ने गमे तेम भेट चड़ावो। आहयीत तमारी खरली भक्ती से। आहयी कळीन तेवा ना बणो; पण तमारु मन ने नवलु हय जवा सी तमारो चाल-चलण बी बदलतो जाय, जीनी सी तमु भगवान नी भली, अने गमती, अने वारली मरजी मालम पड़ती जाय।
काहाके मे तीहयी दया ना कारण जे मने जड़ली से, तमारी मे ना आखा ने केम, के जीसम ह़मजवा जोवे तीनी सी बड़ीन खुद ने नी ह़मजवा जोवे; पण जीसम भगवान आखा ने भरहा ना काम ना अनसारे वाट देदलो से; तीसमेत खुद ने वारला मन सी ह़मजे। 1काहाके जीसम आपणा एक डील मे घणा ढेरका अंग से, अने आखा अंग नु एकीत काम नी हय। तीसमेत आपणु घणा ढेरका से, मसी मे एक डील हय्न आपणु एक-बीजा नो अंग से। 2
जत्यार तीहयी दया ना हीसाब सी जे आमने आपली से, आपणु ने अलग-अलग वाटा जड़ला से, ता जीने भगवान वगे गेथो खबर आपवा नो वाटो जड़लो हय, तीहयो भरहा ना काम ना लारे अगी हयवा वाळी वात करवा जोवे; कदी सेवा करवा नो दान जड़लो हय ता सेवा करो, कदी ह़ीकाड़वा वाळो हय ता ह़ीकाड़्या कर; जे परच्यार करन्यो हय ता परच्यार कर्या करे; जे दान आपण्यो हय ता दान खुसी सी आपे; जे अगवाय करन्यो हय ता होह सी अगवाय कर अने जे दया करे ता होह सी कर।
मोंग दगा वगर रेवा जोवे; बुराय सी ह़ीगी करो; अने भलाय कर्या करो। भाय नी तेम मोंग सी एक-बीजा ने फोम राखो; अने सदा ईज्जत करवा मे एक-बीजा सी बड़ता जावो। कोसीत करवा मे आळह्या ना हयो; आत्मीक होह सी भरला रेवो; मालीक नी सेवा करता रेवो। आह मे खुस रेवो; दुख मे धीरज राखो; अने वीन्ती करतात रेवो। चोखला माणहु ने जे कंय जरवत हय, ता तीमनी मदत करो; अने पोरणा कर्या करो। 3
आपणु ने दुख देवा वाळा ने बरकत आपो; सराप ना आपो। खुसी मनाव्वा वाळा ह़ाते खुसी मनावो अने रड़वा वाळा ह़ाते रड़ो। आखा एकीत मन राखो; मोटाय ना करो; पण गरीब ह़ाते ह़ात-ह़ंगात राखो; आपणी नींगा मे अक्कल वाळो ना ह़मजो।
बुराय ना बदले कोय सी बुराय ना करो; जे वात आखा माणहु अगळ वारली हय तीनी चीन्ता करो। जां तक हय सके, तमु आखा माणहु ह़ाते सांती सी रेवो। ए मोंगाळ्ळा, बदलो नी लेजो, पण भगवान नी रीह ने मोखो आपो, काहाके लीखलु से, “बदलो लेवा नु मारु काम से, मालीक केय मेत बदलो लेही।” पण कदी तारो वेरी भुकलो हय ता खाणु खवाड़, कदी तरहेलो हय ता पाणी पीवाड़; काहाके कदीम तु आसम करही ता तीहयो लाजे पड़हे। बुराय सी ना हारो, पण बुराय ने भलाय सी जीक लेवो।
Source notes (3)
- Cross-reference 1 कुरन्थी 12:12
- Cross-reference 1 कुरन्थी 12:4-11
- Cross-reference मत्ती 5:44; लुका 6:28
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.