Paliya Bible
रोमीयो 11
ईस्रायेल पोर भगवान नी दया
एतरे मे केम: भगवान आह़फा ना माणहु ने सोड़ देदो ह़ु? कदी नी; मे बी ते ईस्रायली से: अब्राहम नी अवल्यात अने बीन्यामीन नी कुळी नो से। भगवान आह़फा ना माणहु ने नी सोड़्यो, जीमने तीहयो पेले गेथो टाळ लेदलो: खरली सास्तर मे एलीयो ईस्रायली माणहु नी वीरोद मे, भगवान ह़ाते वीन्ती करलो तीहयी वात तमने मालम नी हय ह़ु? “ए मालीक, तीहया तारी वगे गेथा वात करन्या माणहु़ ने मार नाख्या, अने तारी वेदी ने ओदार नाख्या; अने मे एखलोत बच र्यो, अने मने बी मारवा करीन ह़ोद र्या।” पण भगवान तीने ह़ु जपाप आप्यो, “मे मारी लेदे ह़ात हजार माणहु ने बचाड़ र्यो तीहया झुटा देवता नी पुजा-पाट नी कर्या।” आहयीत रीते आहयी टेमे बी भगवान नी दया सी टाळला घणा माणहु बच र्या। आहयु भगवान नी दया सी हयु, ता आहयु कामु ना अनसारे नी हयु, नीता भगवान नी दया अमथी हय जती।
ता ह़ु हय ज्यु? वात आहयी से के ईस्रायली माणहु जीने ह़ोदत्ला तीहयो तीमने नी जड़्यो; पण तीहयो टाळला माणहु ने जड़ ज्यो, अने रेला माणहु नु मन वातड़ु कर देदो। जीसम सास्तर मे लीखलु से, के भगवान तीमना मन ने वातड़ु कर देदलो से, आहया दाड़े लग तीहया देखी अने ह़मळ नी सके। दावुद केय;
“तीमनु खाणु तीमनी जुगु जाळ, अने फंदा,
अने ठोकर खाय्न पड़े, अने डंड जड़े।
तीमना डोळा पोर अंदारलु छवाय ज्यु,
अने नी देखे, अने तीमनु केड़्यु झुकाड़ राख।”
एतरे मे पुछु, तीहया ठोकर खादा ता बरबात हय जेला ह़ु? कदी नी पण तीहया ठोकर खादा एतरे आड़जात्या माणहु ने छुटकारो जड़्यो। के तीमने रीह लागे। एतरे हाव तीमनु पड़वु, कळी जुगु धन अने तीमनी कमी आड़जात्या जुगु धन नो कारण बण्यु, ता तीमना नफा सी केतरी मोटी बरकत जड़हे।
आड़जात्या नो छुटकारो
मे तमु आड़जात्या ने केम; जत्यार तक मे आड़जात्या जुगु नेवताळो से, ता मे मारी सेवा नी बड़ाय करु। के मे कानी बी रीती सी कुटुम्ब वाळा मे रीह पयदा कर सकु के तीनी लारे मे तीमनी माय्न थोड़ाक ने छुटकारो जड़ सके। काहाके तीमनु सोड़ देणु कळी नु मेळ नु कारण बण्यु, ता ह़ु तीमनु आवरी लेणु, ह़ु मरला ने जीवाड़नु नी हय ह़ु?
कदीम भेट नो पेल्नो वाटो चोखलो से, ता तीहयो आखो वाटो चोखलो नी हय ह़ु? कदी झाड़ ना मुळ्या चोखला से, ता तीना डाळ्या बी चोखला से। थोड़ाक जेतुन झाड़ ना डाळ्या वाडीन तीहया डाळ्यान जागे भगवान तने कलम करलो से, अने तने जेतुन झाड़ ना मुळ्या मे गेथो रस-कस जड़ र्यो। ता तु डाळ्या पोर मोटाय नी करजे, काहाके तु मुळ्या ने नी पण मुळ्या तने ह़माळ र्या।
अळतेण तु केही के मारी कलम करवा करीनेत आहया डाळ्या ने वाडीन नाखलो से। आहयी वात ह़ाची से के हीय्या डाळ्या भरहो नी कर्या एतरे तीमने वाडीन नाख देदा, पण तु भरहो करे एतरे टेक र्यो। एतरे तु मोटाय नी करजे पण बीहतो रेजे। काहाके भगवान खास डाळ्या ने नी रेवा देदो, ता तने बी नी रेवा देय। एतरे भगवान नी गीण पोर अने वात पोर अने भगवान वडे तीहयी वात पोर धीयान राख! जे भरहो सोड़ीन पासा हय ज्या, तीमने तीहयो वडे, पण तारी पोर गीण करे, तु तीनी दया मे रेजे, नीता तीहयो तने बी झाड़ पोर गेथो वाड नाखहे। कदीम तीहया पासा भरहो करहे, ता तीहयो तीमने बी कलम कर देहे; काहाके भगवान ताखत वाळो से के तीमने अळी पासो कलम लगाड़ सके। जत्यार तु जंगली जेतुन झाड़ मे गेथो खास जेतुन झाड़ मे कलम लगाड़लो से, ता जे खास जेतुन नी डाळ्या से तीमने खास जेतुन मे लगाड़वा ह़ु हय जाय।
भगवान आखा ईस्रायली पोर दया करे
ए भायु, अने बेन्या कंखर माय्न आसम नी हय जाय के तमु आह़फा ने अक्कल वाळा ह़मजी लेवो; एतरे मारी हेर आहयी नी हय के तमु आहयी वात सी अंजाण्या रेवो के जत्यार लगण आड़जात्या माणहु जीमनु ह़रग राज मे आवणु टकायलु से, तीहया पुरान-पुरा नी आवे, तां लग ईस्रायली माणहु ना थोड़ाक माणहु भगवान वगे मन फीरव्या वगर रेहे। अने आसम करीन आखा ईस्रायली माणहु छुटकारो हात करहे; जीसम खरला सास्तर मे लीखलु से के
“सोड़ाव्वा वाळो सीयोन मे गेथो आवहे,
अने याकुब ना घोराणा मे गेथी आखी कुहराय सेटी कर देहे2;
अने तीमनी ह़ाते मारो आहयो वायदो ता रेहे,
के मे तत्यार तीमनो पाप माफ कर देही।”
काहाके तीहया खुस-खबर नी नींगा मे ते तमारी जुगु भगवान ना वेरी से, पण टाळवा नी नींगा मे तीहया आड़ा-बुड़ा ना कारण सी भगवान ना लाडला से। काहाके भगवान तीने बोलाय्न अने आह़फा नो वाटो आपीन, आह़फा ना मन ने कदी नी बदले। जीसम तमु पेले भगवान नी वात नी मान्या, पण हमणे तीहया भगवान नो हुकम नी मान्या करीन भगवान तमारी पोर दया करलो से। तीहया हमणे बी भगवान ना हुकम नी मान्या, के तमारी पोर दया हय री, आनीन करते के तमारीन तेवी तीमनी पोर बी दया हय जाय। भगवान आखा ने आनीन करते हुकम नी मानवा नु मन बणाय देदो के तीहयो तीमनी पोर दया कर सके।
भगवान जुगाळो से
भगवान नु धन, अने अक्कल अने ग्यान! तीना वीच्यार केतरा उंडा, तीना नेम ने कोय उजन्तु कर सके अने तीनी वाट ने कोय ह़मज सके।
जेम सास्तर मे लीखलु से, “मालीक नी अक्कल कोय जाण सके?
अने तीनो ह़ला आपण्यो कोय बण्यु?”
कोय बी भगवान ने कंय आपला से ह़ु
के भगवान तीमने पासु तीहयु आपे। 3
काहाके भगवान आखा ने बणावलो से। तीनी मे आखा टेकला रेय, अने तीहयो तीमनी जुगु से। तीनीत जलम बड़ाय हयती रेय। आमीन।
Source notes (3)
- Cross-reference फीलीपीयो 3:5
- Cross-reference यसाया 59:20-21
- Cross-reference 1 कुरन्थी 8:6
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.