Paliya Bible
फीलीपीयो 1:6
Verse 6 is marked below, with the whole chapter around it. Read from the start
मसी ईसु नो चाकर्यो मे पोलुस अने तीमुथीयुस भणी गेथी, आखा भगवान ना चोखला माणहु ना नाम, जे मसी ईसु मे हय्न फीलीपी ह़ेर मे री र्या, मुखी अने सेवा करवा वाळा ने। अमारा बाह भगवान अने मालीक ईसु मसी भणी गेथी तमने दया अने सांती जड़ती रेय।
वारु से केय अने मंडळी ना लेदे वीन्ती
मे जत्यार-जत्यार तमने फोम करु, तत्यार-तत्यार आपणा भगवान ने वारु से केम, अने जत्यार कदी तमारी आखा नी लेदे वीन्ती करु, ता सदा खुस हय्न वीन्ती करु। जीसम तमु खुस-खबर ना काम मे मारी मदत पेल्ना दाड़े सी हमणे लग करला से। मने आहयी वात नो भरहो से, के जे बी तमारी मे वारला काम चालु करलो से, तीहयोत तीने ईसु मसी ना आव्वा ना दाड़े लग पुरु करहे। वारु से के मे तमारी आखा नी लेदे आसमेत वीच्यार करु, काहाके तमु मारा मन मे आय्न बह जेला से, अने हाव मे जेल मे कुंडायलो से ते बी अने खुस-खबर नी लेदे जपाप अने गवा आप्पा मे तमु आखा मारी ह़ाते दया मे ह़ाते से। आहयी वात मे भगवान मारो गवा से के मे मसी ईसुन तेम मोंग करीन तमु आखा ने भेटवा नी घणी हेर करु।
अने मे आहयी वीन्ती करत्लो, के तमारो मोंग, ह़ाचली अक्कल अने आखी भाती नी ह़मज भेळ अळी बी वद्तु जाय। आञे लग के तमु वारु सी वारु वातु ने मोंगाळ्ळी जाणो, अने मसी ना आव्वा ना दाड़े लग खरला बणीन रेवो, अने ठोकर ना खावो; अने तीहया धरमपण ना फोळ सी जे ईसु मसी ना लारे हये, भरायता जावो जीनी सी भगवान नी बड़ाय अने गुण गवायता रेय।
जेल मे कुंडायला ना वेह मे चाकरी
ए भायु, मे चाहु, के तमु आहयु जाण लेवो के मारी पोर जे वीत्यु, तीनी सी खुस-खबर आड़े-धेड़े बी पुग जी। 2आञे लग के राजघोराणा ना आखा रखवाळी करन्या सीपायड़ा अने तीमना आखा माणहु ने बी आहयु मालम हय ज्यु के मे ईसु मसी नो चाकर्यो हयवा नी कारण जेल मे कुंडायलो से, अने मालीक मे जे मारा भाय अने बेन्या से, तीनी मे गेथा घणा झाजा मे जेल मे कुंडायलो से करीन, हीम्मत करीन, भगवान नो बोल बेफीकर हय्न ह़मळावा नी अळी बी हीम्मत कर र्या।
काना ते डहवाये अने झगड़ा सी ईसु मसी नो परच्यार करे, पण काना ते वारलो वीच्यार लीन परच्यार करे। कंय जणा ते आहयु जाणीन के मे खुस-खबर नी लेदे जपाप आपवा करीन ठेरावलो से करीन मोंग सी परच्यार करे। अने कंय जणा ते वारलो वीच्यार लीन नी पण वीरोद सी मसी नो परच्यार ह़मळावे, आहयु ह़मजीन के मने जेल मे कुंडायलो से जादा वेला हयवु जोवे।
ता ह़ु हय ज्यु? नीस्तु आहयु, के आखी भाती सी भले बोनु सी, भले सच्चाय सी, मसी नो बोल ह़मळाय र्या, अने मे आनी सी घणो खुस से, अने अळी घणो खुस रेही बी। काहाके मे जाणु के तमारी वीन्ती ना लारे, अने ईसु मसी नी आत्मा नी लारे, आनो फोळ सी, मारो छुटकारो हयहे।
जीवत्लो रेवा मसी से
मे ते आहयी घणी हेर अने आह राखु के मे कानी बी वात मे नी लजवायु नी, पण जीसम मारी वातड़ी हीम्मत नी करीन मसी नी ईज्जत मारा डील ना लारे जलम हयती रेय, आसमेत हाव बी हये भले मे जीवत्लो रेम नीता मर जाम। काहाके मारी लेदे जीवत्लो रेवा मसी से, अने मर जवा फायदो से। पण कदी डील मे जीवत्लो रेवात मारा काम नी लेदे फायदो से ता मे नी जाणतो के कोयने टाळु। काहाके मे आहयी बेम वात ना वच मे पड़ र्यो, ह़ु करुन ह़ु नी? जीव ते हेर करे के डील ने सोड़ीन ईसु मसी नी ह़ाते जाय्न रेम, काहाके आहयु घणुत वारु से, बाखीन डील मे रेवा तमारी करीन अळी बी जरुड़ी से। अने आनी लेदे के मने आनो पक्को भरहो से। आनीन लेदे जाणु के मे जीवत्लो रेही, मतलब तमु आखा नी ह़ाते रेही, जीनी सी तमु भरहा मे पाका हयता जावो अने तीनी मे घणा खुस रेवो; अने जे बड़ाय तमु मारा बारा मे कर र्या, तीहयी मने अळी तमारी तां आव्वा सी मसी ईसु मे जादा वद जाय।
नीस्तु आतरुत करो के तमारो वेहवार मसी नी खुस-खबर ना अनसारे हय जाय, के भले मे आय्न तमने देखु, भले नी बी आवु, तमारा बारा मे आहयु ह़मळु के तमु आखा एकीत आत्मा मे टेक्ला री र्या, अने एक मन हय्न खुस-खबर ना भरहा नी लेदे मेहनत करता री र्या। अने कानी वात मे वीरोद्या सी बीह्या वगर। आहयु तीमनी लेदे बरबात हयवा नी सेलाणी से, बाखीन तमारी लेदे छुटकारा नी सेलाणी से, अने आहयु भगवान भणी गेथु से। काहाके ईसु मसी नी कारण सी तमारी पोर आहयी दया हयी के तमु नी नीस्ता तीनी पोर भरहो करो पण तीनी लेदे दुख बी उचलो, 3अने तमने ईसमेत मेहनत करवु से, जीसम तमुत मने करते देखता हता, अने हमणे बी ह़मळतला के मे हीसमेत करतलो।
Source notes (3)
- Cross-reference नेवताळा ना काम 16:12
- Cross-reference नेवताळा ना काम 28:30
- Cross-reference नेवताळा ना काम 16:19-40
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.