Paliya Bible
फीलेमोन 1
पोलुस भणी गेथो जे ईसु मसी नो केदी से, अने भाय तीमुथीयुस भणी गेथा अमारा मोंगाळ्ळा साजल्या फीलेमोन, 1अने बेनेह अफफीया, अने अमारा ह़ाती झुमायवा वाळो अरखीपुस अने फीलेमोन ना घोर मे भेळी हयवा वाळी मंडळी ने।
आपणा बाह भगवान अने मालीक ईसु मसी भणी गेथी दया अने सांती तमने जड़ती रेय।
फीलेमोन नो मोंग अने भरहो
भाय फीलेमोन मे हमेसा भगवान ने घणो वारु केम, अने आपणी वीन्ती मे बी तने फोम करु। काहाके मे तारा मोंग नी अने भरहा ना बारा मे वात ह़मळु, जे आखा चोखला माणहु नी ह़ाते अने मालीक ईसु पोर से। मे वीन्ती करु के तु आपणा भरहा ने देखाड़वा टणको बणीन रे, जीनी सी ईसु मसी नी एकता नी लारे आखी वात नो ग्यान हये। काहाके ए भाय, मने तारा मोंग सी घणी खुसी अने सांती जड़ली से, आनीन करते के तारी लारे भगवान ना चोखला माणहु नु मन खुस हय ज्यु।
उनेसीमुस नी लेदे वीन्ती
एतरे मसी मे मने मोटी हीमम्त से के जे वात वारु से, तीनी वात नो हुकम तने आपु। ते बी तीहया मोंग नी करते मने डायला पोलुस नी लेदे हाव ईसु मसी नी लेदे केदी से, आहयु वारु मालम पड़्यु के तारी सी वीन्ती करु। 2मारी वीन्ती से मारा उनेसीमुस जुगु से, जे तारो पावोर से। तीहयो ते जेल मे मारीन्तां आवलो, ता तीने मे ईसु ना बारा मे केदलो, अने तीहयो ईसु पोर भरहो करीन नवली जीवाय हात कर्यो। एतरे मारी जुगु सोरा बण्यो। पेले उनेसीमुस तारी जुगु कंय काम नो नी हतो, पण हाव तारी जुगु अने मारी जुगु, बेम नी जुगु घणो काम नो हय जेलो से।
उनेसीमुस ने मतलब जे मारा काळजा नो टुकड़ो से, मे तारीन्तां पासो मोकलवा बाज र्यो। तीने मे मारीन्तांत राखवा हींड र्यो हतो, के तारी तरप सी आहया जेल मे जे खुस-खबर ना कारण से, मारी सेवा करे। पण मे तारी मरजी वगर कंय बी नी करवा हींड्यो के तारी आहयी दया दबाव सी नी पण तारी मरजी सी हये।
काय जाणु तीहयो तारी सी थोड़ाक दाड़ा सेटो र्यो, के सदा तारी ह़ाते रेय। पण हाव गेथो चाकर्यान तेवो नी, पण चाकर्या सी बी वारु मतलब मोंगाळ्ळा भाय ने तेम। जे मारो ते मोंगाळ्ळो से, पण हाव माणेह हयवा नी नाते अळी मसी भाय हयवा ना नाते तमु मारी सी जादा मोंग करो
कदीम तु मने तारो साजल्यो ह़मजे, ता तीने आसम अवरी ले जेम मने अवरी लेदो। अने कदीम तीहयो तारु कंय बी गलत करलो हय, नीता तारो करजा वाळो हय, ता मारा नाम पोर लीख ले। मे पोलुस आपणा हात सी लीखु के मे आह़फो भर देही, अने आने केवा नी कंय जरवत नी हय के मारो करजो जे तारी पोर से तीहयो तुत से। ए भाय, ईसु मसी मे आहयी खुसी मने तारी भणी गेथी जड़े। के मारा जीव ने खुसी सी भर दे।
मे तारी पोर हुकम मानवा वाळो से करीन भरहो करीन, तारी जुगु आहयु लीखु अने आहयु जाणु के जे कंय तने केम, तु मारी गेथो जादा बी करही। अने आहयु बी के मारी लेदे रेवा नो जागो तीयार राख; मने आह से के तमारी वीन्ती नी लारे मे छुटीन तमारीन्तां आवही।
फीलेमोन ने वारलो छे के? पुछे
ईपफ्रास जे मसी ईसु मे मारी ह़ाते जेल मे से। 4अने मरकुस अने अरीस्तरखुस, अने देमास अने लुको, जे मारा साजल्या से, तने आवजो अने आवही की र्या।
मालीक ईसु मसी नी दया तमारी आत्मा ह़ाते रेय, आमीन।
Source notes (4)
- Cross-reference कुलुस्यो 4:17
- Cross-reference कुलुस्यो 4:9
- Cross-reference कुलुस्यो 1:7; 4:12
- Cross-reference नेवताळा ना काम 12:12,25; 13:13; 15:37-39; कुलुस्यो 4:10; नेवताळा ना काम 19:29; 27:2; कुलुस्यो 4:10; कुलुस्यो 4:14; 2 तीमुथीयुस 4:10; कुलुस्यो 4:14; 2 तीमुथीयुस 4:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.