मरकुस 4

बीज वावण्‌या नो दाखलो

(मत्‌ती 13:1-9; लुका 8:4-8)

11

ईसु अळी गलील दर्‌या धेड़े माणहु ने ह़ीकाड़वा बाज ज्‌यो। अळी घणा ढेरका माणहु ईसुन्‌तां ज्‌या। एतरे ईसु दर्‌या मे वाळा ढुंड्‌या मे जीन बह ज्‌यो, अने आखा माणहु दर्‌या धेड़े भोयमे उबा र्‌या। 2अने दाखलान2 लारे ईसु तीमने ढेरेत वात ह़ीकाड़्‌यो अने ह़ीकाड़तो जीन केदो:

3“ह़मळो! एक बीज वावण्‌यो बीज वाव्‌वा ज्‌यो। 4वाव्‌वा मे थोड़ाक बीज वाट धेड़े पड़्‌या अने चड़ा आवीन चुट खाय ज्‌या। 5थोड़ाक बीज चाफर्‌या वाळा जागा मे पड़्‌या तां उतळो कादो हतो; एतरे तीहया छोटा उगी आया; 6अने मुळ्‌या उन्‌डे नी ज्‌या। एतरे दाहड़ु उगीन तोप लाग्‌यो ता तीहया चीमाय्‌न ह़ुक ज्‌या। 7पण थोड़ाक बीज काटा वाळा झाटवा मे पड़्‌या, अने काटा वाळा झाटवा मोटा हय्‌न तीने डाब देदा, अने मेर नी पाकी। 8पण थोड़ाक बीज, वारली जागा मे पड़्‌या, अने तीहया उग्‌या, अने वदीन काना तीस गुणा, अने काना साट, अने काना ह़ोव गुणा, लग पाक्‌या।”3

9ता ईसु केदो, जीनी पांह कान्‌टा हय तीहयो ह़मळी लेय।4

ईसु दाखलो देखाड़ीन ह़ु केय?

(मत्‌ती 13:10-17; लुका 8:9-10)

10अळतेण जत्‌यार माणहु जत र्‌या अने ईसु एखलो री ज्‌यो, ता बारे नेवताळा अने थोड़ाक बीजा चेला बी ईसु ह़ाते आवीन तीहया दाखला ना बारा मे पुछ्‌या। 11ईसु आह़फा ना चेला ने केदा, “भगवान आह़फा ना राज नी ह़तायली वात, तमारीत पोर उजन्‌ती करलो से, पण तमने सोड़ीन बीजा ने दाखलान लारे भगवान नी वात ह़मळावा पड़े। 12तीहया देखे ते खरा पण देखता जीन बी नी ओळखे, अने तीहया ह़मळता जीन बी नी ह़मजे। कदीम तीहया आह़फा ना पाप भणी गेथा मन बदलीन भगवान भणी वळ जता ता भगवान तीमने माफ कर देतो।”5

बीज वावण्‌या ना दाखला नो ह़ारो

(मत्‌ती 13:18-23; लुका 8:11-15)

13ईसु तीहया चेला ने अळी केदो, “तमने आहयो दाखलो नी ह़मज आवतो ता बीजा आखा दाखला कीसम पल्‌ले पड़हे। 14कीरसाण जे वावे तीहया भगवान ना बोल से।6 15काना माणहु तीहया वाट धेड़े वाळा जागान तेम से, तां ह़ारीक बीज ह़रको भगवान नो बोल ववाय जाय, तीहया भगवान नो बोल ह़मळे ते खरा पण भुतड़ो तत्‌यारुत आवीन भगवान नो बोल तीमनी मे गेथो लीन जती रेय। 16काना माणहु तीहया चाफर्‌या वाळा जागान तेवा से; तीहया भगवान ना बोलु ह़मळीन खुसी-खुसी सी अवरी ते लेय: 17पण तीमनी मोय भगवान ना बोलु ना मुळ्‌या उन्‌डे नी रेय, एतरे तीहया थोड़ीक वार लग भरहो करे; अने अळतेण भगवान नी वात नी लेदे कंय बी वेला, अने दुख झेलवा पड़े ता तीहया तत्‌यारुत भरहो करवा सोड़ देय। 18अने काना माणहु कटाळस्‌या वाळा जागान तेवा से; तीहया भगवान नो बोल ह़मळे, 19पण तीहया जीवाय नी फीकर करीन अने मालदार बणवा नी हेर7 करीन भगवान ना बोल ने टाळ देय, अने तीहया नी फाले। 20अने काना माणहु तीहया वारला जागान तेवा से, तां ह़ारीक बीज ने तेवो भगवान नो बोल ववाय जाय; आहया भगवान नो बोल ह़मळे अने मनीन पाळे। अने आहया फोळ लावे, काना तीस गुणा, अने काना साट गुणा, अने काना ह़ोव गुणा।”

दीवा नो दाखलो

(लुका 8:16-18)

218

ईसु चेला ने केदो, “दीवा ने धपाड़ीन कांगणी तळे अने खाटला तळे मेकवा लावत्‌ला? के घोर मे वीजाळु करवा करीन दीवलाय पोर मेकवा लावत्‌ला? 229एवु कंय बी चीज ह़तायलु नी हय, जे वीजाळाम नी लवाये, अने एवु कंय बी ढकायलु नी हय जे उजन्‌तु मालम नी हये।10 23जीना ह़मळवा ना कान्‌टा हय, तीहयो ह़मळी लेय।”11 2412

ईसु अळी तीमने केदो, “जे कंय तमु ह़मळो तीहयी वात पोर मन लगाड़ीन वीच्‌यार करो! जे माप सी तमु मापहु तीहया माप सी तमारी जुगु बी मापहे अळी तमने जादा आपहे। 2513काहाके जीनी पांह से, तीने आपहे; पण जीनी पांह नी हय, तीनी पांह तीहयु बी जे तीनी पांह से, ली लेहे।”14

उगवा वाळा बीज नो दाखलो

26ईसु अळी एक दाखलो केदो “भगवान नु राज आह़फु वदवा वाळा बीज ह़रकु से। एक कीरसाण खेतर मे बीज वाव्‌यो। 27तीहयो राते ह़ुयो, अने दीहु जाग्‌यो। अने तीहया बीज कीसम उगीन वद्‌या, तीहयो नी जाणे। 28कादु मे मेर आह़फी वदीन पाक जाय। पेले ह़ुको फुटे, अळतेण उंब्‌या आवीन नीहवे, अळतेण उंब्‌या मे दाणा आवे। 29जत्‌यार दाणा पाक जाय, अने वाडवा नी टेम आय जाय, ता तत्‌यारुत तीहयो दातड़े करीन वाडवा बाज जाय।”15

राय ना बीज नो दाखलो

(मत्‌ती 13:31,32,34; लुका 13:18,19)

30“ईसु अळी केदो आपणु काना हीसाबे देखाड़या के भगवान नु राज केवु से?”16 अने आहया राज ने अळी काना राज्‌य सी अने काना दाखलान लारे ह़मजाड़या? 31भगवान नु राज राय ना दाणान तेवु से; तीहयु जत्‌यार धरती मे वावे, ता बीजा आखा बीज गेथु नानु देखाये। 32पण वदे ता आखा भाजी-पाला ना झाटवा गेथु मोटु हय जाय, अने डाळ्‌या घणा पनाय जाय, अने ईना साहळे उडण्‌या चड़ा तक पोतरो बांदीन रेय।17

33ईसु अळी एसवा रेट दाखलान लारे माणहु जेतरु ह़मज सके, तेतरो भगवान नो बोल; ह़मळावतो हतो।18 34दाखलो देखाड़ीन ईसु तीमने ह़ीकाड़त्‌लो,19 पण माणहु जत रेय ता चेला ने दाखला नो ह़ारो काडीन देखाड़त्‌लो।

आंजी ने हुकम आपीन मनाड़वा

(मत्‌ती 8:23-27; लुका 8:22-25)

35तीहया दाड़े ह़ांती टेमे, “ईसु चेला ने केदो; आपणु दर्‌या नी ह़ेली पार जता।” 36एतरे माणहु ने तांत रेवा दीन चेला ईसु ने ढुंड्‌या मे जेमेत बहलो हतो तेमेत लीन जवा बाज ज्‌या,20 अने तीमनी ह़ाते थोड़ाक माणहु बी ढुंड्‌या लीन चाल पड़्‌या। 37ता दर्‌या मे आंजी आवी, अने झलक ढुंड्‌ये घणी अफठायी, अने ढुंड्‌या मे लग पाणी भराय ज्‌यु। 38ईसु ढुंड्‌या ना पाछला खुणा मे गादी पोर ह़ुय र्‌यो हतो। चेला ईसु ने उठाड़्‌या अने तीने केदा, “मास्‌तर आमु ते डुबीन मरवा बाज र्‌या, तने फीकर नी हय ह़ु?”

39ईसु तत्‌यार उठ्‌यो अने आंजी ने वड्‌यो, अने झलक ने केदो, “होगी री जा!” उबी री जा, ता आंजी बंद हय जी अने धीरी पड़ जी।

40ईसु चेला ने केदो, “तमु काहा बीही र्‌या? तमने हजु लग भरहो नी हय ह़ु?”21 41चेला घणा जबर बीह ज्‌या अने आंबा-सांबा केवा बाज ज्‌या, आहयो माणहे कोय से? आनो हुकम आंजी अने झलक लग मान लेय!