मरकुस 16

ईसु मर्‌या-ह़र्‌या मे गेथो जीवतो हये

(मत्‌ती 28:1-8; लुका 24:1-12; युहन्‌ना 20:1-10)

1अने अराम नो दाड़ो खत्‌तम हय ज्‌यो, अने ह़ांती टेमे मरीयम मगदलीनी, सलोमी, अने याकुब नी आय्‌ह मरीयम, गंदाण्‌यो मसालो ईसु ना धोड़ पोर चोपड़वा करीन वेचातो लेदी। 2अने ह़वारे वेगात, हप्‌ता ना पेल्‌ना दाड़े, आहया बयरा दाहड़ु उगतेत मड़ाट्‌यान्‌तां ज्‌या। 3अने बयरा आहयी वात केता-केता जता हता, “के अमारी वाटु मड़ाट्‌या ना झापला पोर लगाड़लो मोट्‌लो दगड़ो कोय ढबळावीन सेटो करहे?” 4जत्‌यार तीहया मड़ाट्‌यान्‌तां पुग्‌या ता तीहया घण मोटा दगड़ा ने मड़ाट्‌या ना झापला पोर गेथो सेटो ढबळाय मेकलो देख्‌या! 5अने जत्‌यार तीहया मड़ाट्‌या मे ज्‌या, ता तीहया ह़रगदुत ने धोळ्‌ळा लुगड़ा मे जुवान्‌या माणेह नी तेम जमणी धेड़े बह रेलो देख्‌या। अने तीहया बीही ज्‌या!

6तीहयो तीमने केदो; बीहो ना, तमु ते नासरत वाळा ईसु ने ह़ोदवा बाज र्‌या, जीने कुरुस पोर चड़ावला हता! तीहयो पासो जीवतो हय जेलो से; तीहयो आञे नी हय; देखो, तीहयो आहयो जागो से, जां ह़ारीक तीने वगे करला हता। 71पण तमु हाव जावो अने पतरस ने अने ईसु ना बीजा चेला ने केवो, के तीहयो ईसु तमारी गेथो पेले गलील जीला मे जहे; जीसम तीहयो तमने केदलो हतो, “तीहयो तमने गलील जीला मे भेटहे।”2

8आहयु आखु देखीन अने ह़मळीन, तीहया बयरा घण-जबर बीही ज्‌या, अने तीहया कापता अने घबरायता जीन मड़ाट्‌या मे गेथा नाह ज्‌या, अने वाट्‌ये कोयने कंय नी केदा।

ईसु मरीयम मगदल्‌नी ने देखाव पड़े

(मत्‌ती 28:9-10; युहन्‌ना 20:11-18)

9हप्‌ता ना पेल्‌ना दाड़े ह़वारे वेगोत ईसु जीवतो हय्‌न मरीयम मगदलीनी ने देखाव पड़्‌यो जीनी मे गेथो तीहयो ह़ात भुत नीकाळ्‌ळो हतो। 10हाव ईसु ना चेला वीखा मे हय्‌न रड़वा बाज र्‌या हता। तीहयीत टेमे मरीयम मगदल्‌नी तीमनीन्‌ता जीन ईसु जीवतो हय ज्‌यो करीन केदी; 11पण ईसु जीवत्‌लो से अने तीहयी तीने देखली से, ईसम ह़मळीन बी तीहया भरहो नी कर्‌या।

ईसु बे चेला ने देखाव पड़े

(लुका 24:13-35)

12अळतेण तीहया चेला मेना बे जणा गाम भणी जवा बाज रेला, तत्‌यार ईसु आह़फा नो वेह़ बदलीन तीमने देखाव पड़्‌यो। 13तीहया बे जणा बीजा चेला ने आहयी वात नी खबर कर्‌या। पण ते बी बीजा, तीमनी वात पोर बी भरहो नी कर्‌या।

ईसु ग्‌यारे चेला ने देखाव पड़े

(मत्‌ती 28:16-20; लुका 24:36-49; युहन्‌ना 20:19-23; नेवताळा ना काम 1:6-8)

14अळतेण जत्‌यार तीहया ग्‌यारे नेवताळा खाणु खावा बाज रेला ता ईसु तीमने बी देखाव पड़्‌यो, अने ईसु तीमनो वण-भरहो अने मन नी ठटाय देखीन वडतो जाय्‌न केदो, “जे मने जीवतो हय्‌न बठो हयलो देखला, तमु तीमनी वात पोर भरहो काहा नी कर्‌या?” 153तत्‌यार ईसु तीमने हुकम आपीन केदो, “तमु आखी कळी मे जाय्‌न, आखा माणहु ने बमदीन खुस-खबर ह़मळावो।4 16जे भरहो करहे अने बपतीस्‌मा नी रीती लेहे तीने पाप ना डंड मे गेथो छुटकारो जड़हे। पण जे भरहो नी करे, तीने भगवान गुनाळ्‌ळो ठेरावीन डंड आपहे। 17जे मारी पोर भरहो करहे, तीमनी लारे ढेरेत जुदा-काम नी आहयी सेलाणी देखाव पड़हे: तीहया मारा नामे भुतड़ा काडहे, नवली-नवली बोली बोलह़े, 18कदीम तीहया गड़हा ने उचली लेहे, नीता तीहया भुल सी जेहेर बी पी लेहे, ते बी तीमने कंय बी नुकसान नी हये। तीहया मांदला पोर हात मेकहे अने तीहया वारु हयहे।”

ईसु नु ह़रग मे उचलायणु

(लुका 24:50-53; नेवताळा ना काम 1:9-11)

195

ईसम करीन मालीक ईसु तीमनी ह़ाते वात कर लेदो, अने अळतेण तीहयो ह़रग मे उचलाय ज्‌यो, अने भगवान नी जमणी धेड़े जाय्‌न बह ज्‌यो।6 20अने अळतेण ईसु ना चेला आखे जाय्‌न ईसु नु परच्‌यार कर्‌या, अने मालीक ईसु तीमनी ह़ाते काम करतो र्‌यो, अने मालीक ईसु ढेरेत जुदा-काम ना सेलाण्‌या नी लारे, आह़फा ना केदला बोल नो पुरावो देतो हतो। आमीन।