Skip to content
BibleKenya

Paliya Bible

लुका 5

ईसु मसी पेला चेलाम ने बोलावे

(मत्‌ती 4:18-22; मरकुस 1:16-20)

1

एक दाड़ो ईसु गन्‌नेसरत दर्‌या धेड़े उबो हय र्‌यो हतो। अने माणहु भगवान ना बोलु ह़मळवा करीन धकलाय्‌न तीनी पोर पड़े एम हय जता हता। तेतरी टेमे तीहया दर्‌या धेड़े बे ढुंड्‌या उबा कर मेकला देख्‌या, अने माछला धरन्‌या काहर्‌या ढुंड्‌या मे गेथा उतरीन जाळ धोव्‌वा बाज र्‌या हता। ते ढुंड्‌या माय्‌न एक ढुंड्‌यु, सीमोन नु हतु, तीहयु ढुंड्‌यु मे बहीन ईसु केदो के आहयु ढुंड्‌यु ने धेड़े गेथु थोड़ुक सेटो ली जा। अने तत्‌यार तीहयो ढुंड्‌यु मे बहीन माणहु ने ह़ीकापण आपवा बाज ज्‌यो।

जत्‌यार ईसु ह़ीकाड़ीन नवराय ज्‌यो, ता ईसु सीमोन ने केदो, “ढुंड्‌यु ने उंडाह पाणी मे ली जा अने माछला धरवा करीन जाळ नाखो।” 2

ता सीमोन केदो, “ए मालीक! आमु आखी रात माछला धरवा करीन मेहनत कर्‌या, पण थोड़ाक माछला बी नी धराया; ते बी तु केय ता मे माछला धरवा करीन पाणी मे जाळ नाखही।” 3जत्‌यार सीमोन अने तीनो ह़ाती ईसु केदो तेमेत कर्‌या ता घणा ढेरका माछला जाळ मे घेरवी लाया। अने तीमनी जाळ माछला नी भारे फाटवा बाज जी। तत्‌यार तीहयो तीमना ह़ाती ने जे बीजा ढुंड्‌या मे हता, अने आड़ीन मदत करवा करीन बोलाया, अने तीहया ह़ाती आवीन बेम ढुंड्‌या मे माछला ह़ीग लगाड़ीन भर लेदा के ढुंड्‌या डुबवा बाज ज्‌या। आसम देखीन सीमोन पतरस ईसु ना पोगु मे पड़्‌यो अने केदो, “ए मालीक! मारीन्‌तां गेथो तु जत रे, काहाके मे ते पापी माणेह से।”

जाळ मे घणा ढेरका माछला आय ज्‌या करीन तीहयो अने तीना ह़ाती वहराय ज्‌या। अने तेमेत जब्‌दी ना सोरा याकुब अने युहन्‌नो बी वहराय ज्‌या जे सीमोन ना साजल्‌या हता। अने तेतरी घड़ी ईसु सीमोन ने केदो, “बीहे ना, हमणे गेथो तु माछला ने नी धरे, पण माणहु ने मारा चेला बणाव्‌वा करीन भेळा कर्‌या करही।”

अने तीहया ढुंड्‌या ने दर्‌या धेड़े ली आया अने आखु सोड़ीन ईसु पसळ चाल पड़्‌या।

ईसु एक कुड़ावा ने वारु करे

(मत्‌ती 8:1-4; मरकुस 1:40-45)

जत्‌यार ईसु एक दाड़ो एक ह़ेर मे हतो, ता ईसुन्‌तां एक माणेह आयो, तीनु आखा डीले कोड़ रोग लाग जेलो हतो, तीहयो ईसु ने देखीन अगळ पड़्‌यो अने वीन्‌ती करतो जाय्‌न केदो, “ए ईसु मालीक, तारी मरजी हय, ता तु मने वारु करीन चोखो कर दे।”

ईसु हात अगो करीन तीने छीमीन केदो, “मारी आहयीत मरजी से के तु चोखो हय जा।” अने तेतरीत घड़ी तीनु कोड़ सेटु हय ज्‌यु। अळतेण ईसु तीने हुकम आप्‌यो के, “जाय्‌न आह़फा ने, भगवान ना पुंजारा ने देखाड़जे अने आह़फु वारु हयवान बारा मे; मुसान लारे टकायली बादा चड़ावजे ता आखा माणहु जाणीन गवा बण जहे, के तु चोखो हय ज्‌यो पण आहयी वात कोयने बीजा ने नी केजे।”

ते बी ईसु नी आहयी खबर आखे दुर फेल जी अने टोळान-टोळा, हुड़ु-हुड़ु माणहु तीनी वात ह़मळवा अने मंदवाड़ मे गेथा आरगा हयवा, तीमनीन्‌तां आवता हता। पण ईसु तीमनीन्‌तां गेथो अलग उजाड़ी बड़ा मे जाय्‌न वीन्‌ती कर्‌या करतो हतो।

लखवा ना मांदला माणेह ने वारु करे

(मत्‌ती 9:1-8; मरकुस 2:1-12)

ईसु एक दाड़े ह़ीकापण आपवा बाज र्‌यो हतो, फरीसी दलवाळा अने भगवान नो कायदो ह़ीकाड़न्‌या मास्‌तर्‌या तां ह़ारीक बह र्‌या हता। तीहया गलील जीला मे गेथा अने युहद्‌या परगणा ना आखा गाम गेथा अने यरुसलेम ह़ेर गेथा आय रेला हता, अने मालीक भगवान नी आरगाय आपवा नी ताखत ईसु ह़ाते हती। अने तेतरीत घड़ी एक लखवा ना मांदला माणेह ने माणहु खाटलु मे घालीन लाया, अने तीहया तीने ते घोर मे ईसु ह़ाते लीजवा अने ईसु नी अगळ मेकवा हींडता हता। तां ह़ारीक घणा ढेरका माणहु हता एतरे ते लखवा ना मांदला ने घोर मे मोय नी ली जाय सक्‌या, एतरे तीहया घोर पोर चड़ ज्‌या, अने कवला सेटा करीन सीवड़ो तोड़ देदा। अने ते लखवा ना मांदला ने खाटला भेळ ईसु अगळ उपर गेथा उतार देदा। अने ते लखवा वाळा ने लाव्‌वा वाळा नो भरहो देखीन ईसु तीहया लखवा वाळा मांदला माणेह ने केदो, “तने पाप नी माफी जड़ जेली से।”

आहयी वात ह़मळीन युहदी-धरम ह़ीकाड़न्‌या अने फरीसी दलवाळा आह़फा-आह़फात मन मे वीच्‌यार करता हता, “आहयो कोय से जे भगवान नो वाक काड र्‌यो? भगवान ने सोड़ीन आसम कोय से जे पाप नी माफी आप सके?”

तीमना मन ना वीच्‌यार ने जाणीन ईसु तीमने केदो, “तमु आह़फाम ना मन मे वीच्‌यार करीन सोच र्‌या? ह़ु केवा सरल से, तने पाप नी माफी जड़ जी केवा सरल से, ‘के तु उठीन चाल केवा वारु से?’ पण मे आनीन करते आसम केदो, के तमु एम जाण लेवो, के मे मनख्‌यान सोरा ने धरती पोर पाप नी माफी आपवा नो हक से।” ईसु लखवा ना मांदला माणेह ने केदो मे तने केम, “उठ, अने तारु खाटलु चुट अने तारा घोर जत रे!”

अने तीहयो तत्‌यारुत आखान अगळ उठीन उबो हय ज्‌यो, अने आह़फा नु खाटलु उचलीन, भगवान नो गुण गावतो जीन, आह़फान घोर जत र्‌यो। अने तीहया आखान-आखा वहराय्‌न भगवान ना गुण गावता र्‌या, अने तीमनी मे बीक भराय ज्‌यी, अने तीहया केता हता, “आज आमु सेल-भात्‌यु काम देखला से।”

ईसु लेवी ने बोलावे

(मत्‌ती 9:9-13; मरकुस 2:13-17)

आनीन अळतेण ईसु बारो नीकळ्‌यो, तीहयो लेवी नाम ना एक माणेह फाळो लेण्‌या, ने फाळो लेवान नाका पोर बह रेलो देख्‌यो। अने तीने केदो, “मार पसळ चाल आव।” ता लेवी, आखु काम सोड़ीन, अने उठीन ईसु पसळ चाल पड़्‌यो।

ईसु ने लेवी आह़फा ना घोर ली जाय्‌न घण मोटी खातरी कर्‌यो, अने फाळो लेण्‌या अने घणा ढेरका पोरणा ईसु ह़ाते खाणु खावा बह्‌या। 4अने फरीसी पंथवाळा अने युहदी-धरम ह़ीकाड़न्‌या वात करीन ईसुन चेला नो वाक काडीन तीमने केदा, “तमु फाळो उगरावण्‌या अने पापी माणहु ह़ाते बहीन काहा खावो-पीवो?”

ईसु तीमने केदो, “आरगला ने दाक्‌तर नी जोवे, पण मांदलाम ने दाक्‌तर जोवे। मे धरमी माणहुम ने बोलाव्‌वा नी आयो, पण पापी माणहुम ने पाप भणी गेथा भगवान भणी मन फीरवा करीन बोलाव्‌वा आवलो से।”

उपाह़ नो सवाल

(मत्‌ती 9:14-17; मरकुस 2:18-22)

थोड़ाक माणहु ईसु ने केदा, “बपतीस्‌मा आपण्‌या युहन्‌ना ना चेला ते वळ-वळीन उपाह़ पाळे अने भगवान ह़ाते वीन्‌ती कर्‌या करे, अने एमेत फरीसी पंथवाळा बी उपाह़ पाळे पण तारा चेला ते उपाह़ पाळ्‌या वगर खाया-पीया करे!”

एतरे ईसु तीमने केदो, “जत्‌यार लगण वरात्‌या लाडा भेळता रेय, तत्‌यार लगण तीहया उपाह़ पाळे ह़ु? कदी नी। बाखीन तीहया दाड़ा बी आवह़े, जत्‌यार लाडो तीमनी गेथो अलग हय जहे, तत्‌यार तीहया तेतरी टेमे उपाह़ पाळहे।”

ईसु तीमने आहयो दाखलो बी ह़मळायो, “कोय बी नवला लुगड़ाम गेथा फाड़ीन जुन्‌ला लुगड़ा मे थीगळु नी लगाड़े। एवु थीगळु लगाड़हे ता तीहयु नवलु लुगड़ु फाट जहे, अने तीहयु नवला लुगड़ा नु थीगळु जुन्‌ला लुगड़ा मे मेळ बी नी खाय। अने एमेत कोय जुन्‌ला चामड़ान कवड़्‌या मे नवला अंगुर नो रोह नी भरे। एमेत भरहे ता नवलो अंगुर नु रोह, चामड़ान कवड़्‌या ने फाड़ देहे, अने ईसम करीन चामड़ान कवड़्‌यो बी फाट जहे, अने नवला अंगुर नु रोह बी वय जहे अने कवड़्‌यो बी खत्‌तम हय जहे। पण नवलु अंगुर नो रोह नवला चामड़ान कवड़्‌या मे भरवा जोवे। कोय बी जुन्‌ला अंगुर नु रोह पीन, नवलो अंगुर नु रोह पीवा नी हेर नी करे, काहाके जुन्‌लो अंगुर नु रोह पीन केय, के जुन्‌लो अंगुर नो रोहेत वारलो से।”

Source notes (4)
  1. Cross-reference मत्‌ती 13:1,2; मरकुस 3:9,10; 4:1
  2. Cross-reference युहन्‌ना 21:3
  3. Cross-reference युहन्‌ना 21:6
  4. Cross-reference लुका 15:1,2

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.