Paliya Bible
लेव्यवेवस्था 7
गुना नी बादा
अळी गुना नी बादा नो नेम आहयो से। तीहयो घणो वारु से। जे जागा पोर होम नी बादा जानवर मारीन चड़ावे तीहयात जागा पोर गुना नी बादा बी जानवर मारीन चड़ावो, अने तीना लोय ने पुंजारो वेदी ना च्यारो-मेर छीड़के। अने तीहयो तीनी आखी चरबी ने चड़ावे, अने तीनी चरबी भरायली पुछड़ी ने अने आतड़ा पोर नी चरबी ने बी, अने बेम गुड़दा अने तीनी पोर नी चरबी अने केड़्यान्तां वाळी चरबी, अने गुड़दा भेळ काळजा पोर नी झील्ली, आहयु आखु ने तीहयो अलग करे। अने पुंजारो आहयु आखु ने वेदी पोर भगवान ना लेदे आक्ठा मे धपाड़े, ता तीहयी गुना नी बादा रेहे। पुंजारा मेना आखा अदमी तीनी मे गेथु खाय सकत्ला; तीने काना चोखला जागा मे खावा जोवे; काहाके तीहयु घणु चोखलु से। जीसम पाप नी बादा से तेमेत गुना नी बी बादा से, आहयी बेम बादा नो एकीत नेम से; जे पुंजारो तीहयी बादा ने चड़ाय्न पछतावो करे तीहयो तीहयी चीज ने ली लेय। अने जे पुंजारो काना नी लेदे होम नी बादा चड़ावे तीहयी होम नी बादा चड़ावलु जानवर नु खालड़ु तीहयो पुंजारो ली लेय। अने चुल मे नीता कड़ाया मे, नीता तवा पोर चुड़ावली आखी अन नी बादा पुंजारा नी रेहे जे तीने चड़ावे। अने आखी अन नी बादा, जे भले तेल सी मीलावली हय नीता ह़ुकली हय, तीहयु हारुन ना सोरा ने बराबर जड़वा जोवे।
मेल-मीलाप नी बादा
मेल-मीलाप नी बादा ने जे कोय भगवान ना लेदे चड़ावे तीनो आहयो नेम से। कदी तीहयो तीने घणो वारु से केवा नी बादा चड़ावे, ता घणो वारु से केवा नी बादा भेळ तेल मीलावली खमीर वगर नी पुड़ी, खमीर वगर ना रोट्ला अने तेल मीलावली मयदा नी पुड़ी बी लावे। अने तीहयो तीनी बड़ाय करवा वाळी मेल-मीलाप नी बादा भेळ खमीर वाळा रोट्ला बी चड़ावे। अने आवा एक-एक चड़ावा मे गेथो तीहयो एक-एक रोट्लो भगवान ने भेट करीन चड़ावे; तीहया मेल-मीलाप नी बादा नु लोय ने छाटवा वाळा पुंजारा ना रेहे। अने तीहयी घणो वारु से केवा वाळी मेल-मीलाप नी बादा नु माह तीहयात दाड़े खावा जोवे; तीनी मे गेथु कंय बी ह़वारे तक बचवा नी जोवे। पण कदी तीनी बादा मान्ता लेदली हय नीता मरजी सी हय, ता चड़ावे तीहयात दाड़े खाय अने बची जाय ता बीजा दाड़े बी खाय सकत्ला। पण जे कंय बादा चड़ावलु माह मे गेथु तीन दाड़ा तक बच जाय तीने आक्ठु मे धपाड़ देवा जोवे। अने मेल-मीलाप नी बादा नु माह तीसरा दाड़े खाय ता तीहयी बादा ने नी माने, अने नी तीनो फोळ तीने जड़े; आहयी नी खावा लायक चीज रेहे। अने तीने खावा वाळो माणेह खुद तीनो भार झेलहे। “अळी जे माह कानी वीटळ्ळी चीज सी छीमाय जाय तीने नी खावा जोवे; तीने आक्ठा मे धपाड़ देवा जोवे। अळतेण मेल-मीलाप नी बादा नु माह ने जेतरा चोखला हय तीहया खावा जोवे, पण जे वीटळ्ळा हय्न भगवान नी मेल-मीलाप नी बादा नु माह मे गेथु खाय तीने आह़फा ना माणहु मे गेथो खत्तम कर देय। अने कानो वीटळ्ळी चीज ने छीमीन भगवान नी मेल-मीलाप वाळी बादा नु माह खाय, तीने बी आह़फा ना माणहु मे गेथो खत्तम कर देय, भले ते माणेह नी वीटळ्ळी चीज नीता वीटळ्ळु जानवर नीता कंय बी वीटळ्ळी अने ह़ीगी आवे एवी चीज हय।” अळी भगवान मुसा ने केदो, ईस्रायली माणहु ने आसम के: तमु ते बोळद्या नी, गाडरा नी, अने बोकड़ा नी चरबी ने नी खाजो। अने जे जानवर खुद मर जाय, अने जे बीजा जानवर नी लारे फाड़ देय, तीनी चरबी बीजा काम मे लेजो, पण तीने कदी बी नी खाजो। जे कोय एवा जानवर नी चरबी खाहे जीनी मे गेथु माणहु थोड़ुक भगवान ना लेदे आक्ठु मे चड़ावली बादा से, तीहयु खावा वाळा ने आह़फा ना माणहु मे गेथो खत्तम कर देहे। अने तमु आह़फाम ना घोर मे कानी बी भाती नु लोय, चाहे चड़ा नु हय, नीता जानवर नु हय, नी खाजो। जे कोय माणेह लोय ने खाहे तीने आह़फा ना माणहु मे गेथो खत्तम कर देहे। अळी भगवान मुसा ने केदो, ईस्रायली माणहु ने आसम के: जे कोय भगवान ना लेदे मेल-मीलाप नी बादा चड़ावे तीहयो तीहयीत बादा मे गेथु भगवान ने भेट चड़ावे; तीहयो आह़फा ना हातु सी भगवान नी आक्ठु मे चड़ाव्वा वाळी बादा छाती समेत चरबी ने बी लावे अने छाती ने हीलाव्वा नी भेट करीन हीलावे। अने पुंजारो चरबी ने ते वेदी पोर धपाड़े, पण छाती हारुन अने तीना सोरा नी रेहे। अळी तमु आह़फाम नी मेल-मीलाप नी बादा नु जानवर नो जमणो पीन्डो बी पुंजारा ने आपजो। हारुन ना सोरा मे गेथो जे मेल-मीलाप नी बादा नु लोय अने चरबी चड़ावे तीनो वाटो जमणो पीन्डो रेहे। काहाके ईस्रायली माणहु नी मेल-मीलाप नी बादा मे गेथी हीलाव्वा नी भेट नी छाती अने जमणा पीन्डा नी भेट लीन पुंजारा हारुन अने तीना सोरा ने आपलो से के आहयु सदा ईस्रायली माणहु भणी गेथु तीमनो हक बणलो रेय। “जे दाड़े हारुन अने तीना सोरा ने पुंजारा नो हक आपलो, तीहया दाड़े यहोवा ना हवन मे गेथो तीमनो आहयोत चोखो करलो वाटो ठेरावलो से। जे दाड़े भगवान तीमनो अभीसेक कर्यो, तीहया दाड़े गेथो भगवान ईस्रायली माणहु ने आहयो वाटो अपाड़्यो अने तीमनी पीड़ी-डीट हक ठेरायो।” होम नी बादा, अन नी बादा, पाप नी बादा, गुना नी बादा, पुंजारा नी भेट नी बादा, अने मेल-मीलाप नी बादा नो नेम आहयोत से; जत्यार भगवान सीने बड़ान्तां जंगल मे मुसा ने केदलो के ईस्रायली माणहु मारी लेदे ह़ु-ह़ु चड़ावो चड़ावे, ता तीहयो तीमने आहयो नेम आपलो हतो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.