Paliya Bible
लेव्यवेवस्था 4
पाप नी बादा नी रीती
अळी भगवान मुसा ने केदो, ईस्रायली माणहु ने आहयु कीदे के कदी कोय माणेह भगवान मना करलो से, तीमनी मे कोय एक काम ने भुल सी करीन पापी हय जाय; अने कदी चोखलो पुंजारो आसम पाप करे जीनी सी असामी गुनाळ्ळा ठेरे, ता आह़फा ना पाप ना कारण तीहयो एक खामी वगर नो बोळद्या ने भगवान ने पाप नी बादा करीन चड़ावे। तीहयो ते बोळद्या ने मीलाप वाळा तम्बु ना झापला पोर भगवान अगळ ली जाय्न तीना मुंडा पोर हात मेके, अने तीहयु बोळद्या ने भगवान ना अगळ मारे। अने चोखलो पुंजारो बोळद्या ना लोय मे गेथु थोड़ुक लीन मीलाप वाळा तम्बु मे लीजवा जोवे; अने पुंजारो आह़फा नी आंगळी ने लोय मे डुबाड़ीन, चोखला जागान वचमे ना पड़दा अगळ, भगवान ना अगळ ह़ात कावा छीड़के। अने पुंजारो तीहया लोय मे गेथु थोड़ुक गंदायण्या धुप नी वेदी ना ह़ींगड़ा पोर जे मीलाप वाळा तम्बु मे से भगवान ना अगळ लगाड़े; अळतेण बोळद्या नु आखु लोय ने वेदी ना पाञा पोर जे मीलाप वाळा तम्बु ना झापला पोर से रेचवी देय। अळतेण तीहयो पाप नी बादा ना बोळद्या नी आखी चरबी ने तीनी सी अलग करे, अने जे चरबी सी आतड़ा ढकायला रेय, अने जेतरी चरबी तीनी मे अटवायली रेय, अने बेम गुड़दा अने तीमनी उपर नी चरबी जे केड़्यान्तां रेय, अने गुड़दा भेळ काळजा ना उपर नी झील्ली, आहयु आखु ने तीहयो आसम अलग करे, जीसम मेल-मीलाप नी बादा चड़ावा ना बोळद्या सी अलग करे, अने पुंजारो ईमने होम नी बादा नी वेदी पोर धपाड़े। पण तीहया बोळद्या नी खाल, पोगु, मुंडु, आतड़ा, साण, अने आखु माह, अने बोळद्या नु बचलु आखु, पड़ावा सी बारु चोखला जागा मे, जां रोखड़ो नाखे, ली जाय्न लाकड़ा पोर मेकीन धपाड़े; जां रोखड़ो नाखे तीहयु तांत धपाड़ो। कदी ईस्रायल नी आखी मंडळी ग्यान नी हयवा ना कारण सी पाप करे अने तीहयी वात मंडळी ना डोळा सी ह़तायली हय, अने तीहया भगवान ना काना हुकम ने तोड़ीन गुनाळ्ळा ठेर्या हय; ता तीमनो करलो पाप उजन्तो हय जाय ता मंडळी एक बोळद्या ने पाप नी बादा करीन चड़ावे। तीने मेल-मीलाप वाळा तम्बु अगळ ली जाय, अने मंडळी ना डायला माणहु आह़फा-आह़फाम ना हातु ने भगवान अगळ बोळद्या ना मुंडा पोर मेके, अने तीहया बोळद्या ने भगवान ना अगळ मारे। तत्यार अभीसेक करलो पुंजारो बोळद्या ना लोय मे गेथु थोड़ुक मेळ कराव्वा वाळा तम्बु मे लीजवा जोवे; अने पुंजारो आह़फा नी आंगळी ने लोय मे डुबाड़ी-डुबाड़ीन तीने वचे वाळा पड़दा ना अगळ भगवान अगळ ह़ांत कावा छीड़के। अने तीहयात लोय मे गेथु वेदी ना ह़ींगड़ा पोर जे भगवान ना अगळ मेल-मीलाप वाळा तम्बु मे से लगाड़े; अने बचलु आखु लोय होम नी बादा नी वेदी ना पाञा पोर जे मेल-मीलाप वाळा तम्बु ना झापला पोर से नाख देय। अने तीहयो बोळद्या नी आखी चरबी ने नीकाळीन वेदी पोर धपाड़े। जीसम पाप नी बादा ना बोळद्या ह़ाते कर्या तेमेत आनी ह़ाते बी करो; आहयी रीते पुंजारो ईस्रायली माणहु ना लेदे पछतावो करे, तत्यार तीमनो पाप माफ करहे। अने तीहयु वाछड़ु ने पड़ावा सी बारा ली जाय्न तीहयीत रीते धपाड़े जीसम पेल्नु वाछड़ु ने धपाड़ला हता; आहयु मंडळी ना लेदे पाप नी बादा ठेरहे। जत्यार कानो मुख्यो माणेह पाप करीन, अने आह़फा ना भगवान ना काना हुकम ने भुल सी तोड़ीन गुनाळ्ळो हय जाय, अने तीनो पाप तीनी पोर उजन्तो हय जाय, ता तीहयो एक खामी वगर ना बोकड़ा ने बादा चड़ाव्वा ना लेदे लावे; अने बोकड़ा ना मुंडा पोर आह़फा ना हात ने मेके, अने बोकड़ा ने तीहया जागा मे मारे जां होम नी बादा नु जानवर भगवान अगळ चड़ावे; आहयी पाप नी बादा ठेरहे। ता पुंजारो आह़फा नी आंगळी सी पाप नी बादा ना जानवर नु लोय लीन होम नी बादा नी वेदी ना ह़ींगड़ा पोर लगाड़े, अने तीनु लोय होम नी बादा नी वेदी ना पाञा पोर नाख देय। अने तीहयो तीनी आखी चरबी ने मेल-मीलाप नी बादा नी चरबीन तेम वेदी पोर धपाड़े; अने पुंजारो तीना पाप ना बारा मे पछतावो करे, ता तीने माफी जड़हे। कदी तमारी मे गेथो कानो बी माणेह भुल सी पाप करे, नीता कानु एवु काम जीने भगवान नी करवा केदो हय तीने करीन गुनाळ्ळो हय जाय, अने तीना पाप तीनी पोर उजन्ता हय जाय, ता तीहयो ते पाप ना कारण एक खामी वगर नी पाठड़ी बोकड़ी बादा चड़ाव्वा करीन लावे; अने तीहयो आह़फा नो हात पाप नी बादा ना जानवर ना मुंडा पोर मेके, अने होम नी बादा ना जागा पोर पाप नी बादा नु जानवर ने मारे। अने पुंजारो तीनु लोय आंगळी मे लीन होम नी बादा नी वेदी ना ह़ींगड़ा पोर लगाड़े, अने तीनु आखु लोय ने वेदी ना पाञा पोर नाख देय। अने तीहयो तीनी आखी चरबी ने मेल-मीलाप नी बादा ना जानवर ने तेम अलग करे, ता पुंजारो तीने वेदी पोर भगवान नी लेदे गंदायण्या धुप नी वेदी पोर धपाड़े; अने आसमेत पुंजारो तीनी लेदे पछतावो करे, ता तीने माफी जड़हे। कदी तीहयो पाप नी बादा ना लेदे एक गाडरा नु बच्चु लावे, ता तीहयु खामी वगर नी पाठड़ी गाडरी रेवा जोवे। अने तीहयो आह़फा नो हात पाप नी बादा ना जानवर ना मुंडा पोर मेके, अने तीने पाप नी बादा ना लेदे तीहया जागे मारे जां होम नी बादा ने चड़ावे। अने पुंजारो तीहयी पाप नी बादा नु लोय आंगळी मे लीन होम नी बादा नी वेदी ना ह़ींगड़ा पोर लगाड़े, अने तीनु आखु लोय ने वेदी ना पाञा पोर नाख देय। अने तीहयो तीनी आखी चरबी ने मेल-मीलाप नी बादा नु गाडरु नु बच्चुन तेम अलग करे, अने पुंजारो तीने वेदी पोर भगवान नी वेदी ना आक्ठा मे धपाड़े; अने पुंजारो तीना पाप ना लेदे पछतावो करे, अने तीने माफ कर देहे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.