Paliya Bible
लेव्यवेवस्था 14
कुड़ावा ना रोग सी चोखला करवा ना नेम
अळी भगवान मुसा ने केदो, कुड़ावा माणेह ने चोखलो ठेराव्वा नो आहयो नेम से। तीने पुंजारान्तां लीजवा जोवे; अने पुंजारो पड़ावा गेथो बारो जाय, अने पुंजारो तीहया कुड़ावा ने देखे, अने कदी तीनो कोड़ नो छालो वारु हय ज्यो हय, ता पुंजारो हुकम आपे के चोखलो हयवा वाळा माणेह ना लेदे बे चोखला अने जीवत्ला चड़ा, देवदार नी लाकड़ी, रात्ला रंग नु लुगड़ु अने जुफा नाम नु झाड़ नो पोदो आहयु आखु लीन आवे; अने पुंजारो हुकम आपे के एक चड़ा ने वयत्ला पाणी ना उपर धोळा ना ठाहरा मे मारे। तत्यार ते जीवत्लु चड़ु ने देवदार नी लाकड़ी ने रात्ला रंग नु लुगड़ु ने अने जुफा नाम नु झाड़ नो पोदो आहयु आखु भेळु करीन तीहया चड़ा ना लोय मे डुबाड़ देय, जे वयत्ला पाणी ना उपर धोळा ना ठाहरा मे मारला हता। अने कोड़ गेथो चोखो हयण्या माणेह पोर ह़ात कावा लोय छीटीन तीने चोखलो ठेरावे, ता तीहयु जीवत्लु चड़ु ने चोवगान मे छोड़ देय। अने चोखो हयण्यो माणेह आह़फा ना लुगड़ा धोवे, अने आखा नीम्बाळा बोड़ाय्न पाणी मे उंगळे, ता तीहयो चोखलो ठेरहे; अने तीनी बाद तीहयो डेरा मे आय सकहे, पण ह़ात दाड़ा तक तीहयो आह़फा ना डेरा गेथो बारोत रेय। अने ह़ातवा दाड़े तीहयो मुंडु, डाडी अने नयणा ना आखा नीम्बाळा बोड़ावे, अने आह़फा ना लुगड़ा ने धोवे, अने पाणी वेर उंगळे, ता तीहयो चोखलो ठेरहे। आंठवा दाड़े तीहयो बे वण-गुनाळ्ळा गाडरा ना बच्चा, अने एक साल नी वण-गुनाळ्ळी पाठड़ी गाडरी, अने अन नी भेट ना लेदे तेल मीलावलो पांच कीलो लोट अने आदोक लीटर तेल लावे। अने चोखो करन्यो पुंजारो आहयी आखी चीज भेळ तीहया चोखा हयण्या माणेह ने भगवान अगळ मेळ कराव्वा वाळा तम्बु ना झापला पोर उबो करे। ता पुंजारो एक गाडरा नु बच्चु लीन गुना नी बादा ना लेदे तीने अने आदोक लीटर तेल ह़ाते लावे, अने आहयी बेम ने हीलावा नी भेट ना लेदे यहोवा अगळ हीलावो; अने तीहयो ते गाडरु ना बच्चा ने तीहयात जागा मे जां तीहयो पाप नी बादा अने होम नी बादा चड़ाया करे, मतलब चोखला जागा मे मारे; काहाके जीसम पाप नी बादा पुंजारा नी हये तेमेत गुना नी बादा बी पुंजारा नी ठेरे; तीहयु घणु चोखलु से। ता पुंजारो गुना नी बादा ना लोय मे गेथु थोड़ुक लीन चोखलो ठेराव्वा वाळा ना जमणा कांटा ना छींडा पोर, अने तीना जमणा हाते अने जमणा पोग ना अंगठा पोर लगाड़े। ता पुंजारो तीहया आदो लीटर तेल मे गेथु थोड़ुक तेल लीन आह़फा ना डाखर्या हात नी हतळी पोर नाखे, अने पुंजारो आह़फा ना जमणा हात नी आंगळी ने डाखर्याण हतळी पोर ना तेल मे डुबाड़ीन आह़फा नी आंगळी वेर भगवान अगळ ह़ात कावा छीटे। अने जे तेल तीनी हतळी पोर री जाय पुंजारो तीनी मे गेथु थोड़ुक लीन चोखलो ठेराव्वा वाळा ना जमणा कांटा ना छींडा पोर, अने तीना जमणा हाते अने जमणा पोग ना अंगठा पोर गुना नी बादा नु लोय पोर लगाड़े; अने जे तेल पुंजारा नी हतळी पोर री जाय तीने तीहयो चोखलो हयवा वाळा ना मुंडा पोर नाख देय। अने पुंजारो तीनी लेदे यहोवा भगवान अगळ पछतावो करे। पुंजारो पाप नी बादा ने बी चड़ाय्न तीनी लेदे जे आह़फा नी वीटळ गेथो चोखलो हयवा वाळो हय पछतावो करे; अने अळतेण होम बादा नु जानवर ने मारीन: अन नी भेट भेळ वेदी पोर चड़ावे: अने पुंजारो तीनी लेदे पछतावो करे, अने तीहयो चोखलो ठेरहे। “पण कदी तीहयो गरीब हय अने एतरु लाव्वा ना लेदे तीहयो लायक नी हय, ता तीहयो आह़फा नो पछतावो कराव्वा ना लेदे हीलावा ना लेदे गाडरा नु बच्चु गुना नी बादा ना लेदे, अने तेल मीलावलो लोट अन नी बादा करीन, अने आदोक लीटर तेल लावे; अने बे हुला नीता पारवा ना बे बच्चा लावे, जे तीहयो आय सके; अने आमनी मे गेथु एक ते पाप नी बादा जुगु अने बीजु होम नी बादा जुगु रेहे। अने आंठवा दाड़े तीहयो आहया आखा ने चोखला ठेरवा ना लेदे मेल-मीलाप वाळा तम्बु ना झापला पोर, यहोवा भगवान अगळ, पुंजारान्तां लावे; ता पुंजारो ते आदोक लीटर तेल ने अने गुना नी बादा नु गाडरा नु बच्चु ने लीन हीलाव्वा नी भेट ना लेदे भगवान अगळ हीलावे। अळतेण गुना नी बादा ना गाडरु ना बच्चा ने मारे; अने पुंजारो तीना लोय मे गेथु लीन चोखो हयवा वाळा ना जमणा कांटा ना छींडा पोर, अने तीना डाखर्या हात अने डाखर्या पोग ना अंगठा पोर लगाड़े। अळी पुंजारो तीहया तेल मे गेथु आह़फा ना डाखर्या हात नी हतळी पोर नाखीन, आह़फा ना जमणा हात नी आंगळी वेर आह़फा नी डाखर्याण हतळी मे गेथु भगवान अगळ ह़ात काव छीटे; अळी पुंजारो आह़फा नी हतळी पोर ना तेल मे गेथु थोड़ुक लीन चोखलो ठेराव्वा वाळा ना जमणा कांटा ना छींडा पोर, अने तीना जमणा हाते अने जमणा पोग ना अंगठा पोर, गुना नी बादा ना लोय ना जागा पोर लगाड़े; अने जे तेल पुंजारा नी हतळी पोर री जाय तीने तीहयो चोखलो हयवा वाळा ना लेदे यहोवा अगळ पछतावो करवा ना लेदे तीना मुंडा पोर नाख देय। ता तीहयो हुला नीता पारवा ना बच्चा मे गेथा जे तीहयो लाय सके एक ने चड़ावे, मतलब जे चड़ा तीहयो लाय सके, तीनी मे गेथु तीहयो एक ने पाप नी बादा ना लेदे अने अन नी भेट भेळ बीजु ने होम बादा ना लेदे चड़ावे; आहयी रीती सी पुंजारो चोखलो ठेरवा वाळा जुगु यहोवा अगळ पछतावो करे। जीने कोड़ नो छालो हयो हय, अने तीहयो लाव्वा नी लायक नी हय के तीहयो चोखलो ठेरवा नु आखु ह़मान नी लाय सके, ता तीनी लेदे आहयोत नेम से।”
घोर नो कोड़
अळी भगवान मुसा ने अने हारुन ने केदो, जत्यार तमु कनान देस मे पुगो, जीने में तमारी खुद नी जागा हयवान लेदे तमने आपु, तीहयी टेमे कदीम कोड़ नो दाग तमारा हक ना काना घोर मे देखाड़ु, ता जीनु तीहयु घोर हय तीहयो आवीन पुंजारा ने देखाड़ देय के मने आसम देखाव पड़लु से के घोर मे दाग से। ता पुंजारो हुकम आपे के जे घोर मे, मे दाग देखवा ना लेदे जाम ता मने जवा सी पेले तीहया घोर मे नु ह़मान नीकाळ देवा जोवे, नीता आसम नी हय जाय के जे कंय घोर मे हय तीहयी आखी चीज वीटळ्ळी ठेरे; अने अळतेण पुंजारो घोर देखवा मोय जाय। ता तीहया दाग ने देख; अने कदी तीहयो दाग घोर ना भीतड़ा पोर लीलो-लीलो नीता रातो-रातो मानो खोदला रेगड़ा ह़रको हय, अने आहयो रेगड़ो भीतड़ा मे उंडे देखाव पड़े, ता पुंजारो घोर सी बारो झापला पोर जाय्न घोर ने ह़ात दाड़ा तक बंद कर देय। अने ह़ातवा दाड़े पुंजारो आय्न देखे; अने कदी तीहयो छालो घोर ना भीतड़ा पोर फेल जेलो हय, ता पुंजारो हुकम आपे के जे दगड़ा ने छालो से तीमने नीकाळीन ह़ेर सी बारा काना वीटळ्ळा जागा मे नाख देय; अने तीहया घोर ने मोय ने मोय च्यारो-मेर खुरचवा जोवे, अने खुरचलो धुळो ह़ेर सी बारो काना वीटळ्ळा जागा मे नाखवा जोवे। अने तीहया दगड़ा ना जागा मे बीजा दगड़ा लीन लगाड़े अने तीहयो ताजो गारो लीन घोर नी जोड़ाय करे। कदी दगड़ा ने नीकळ देवा अने घोर ने खुरची देवा अने नीपी देवान बाद तीहयो छालो अळी फुटी नीकळे, ता पुंजारो आय्न देखे; अने कदी तीहयो छालो घोर मे फेल जेलो हय, ता तीहयो जाण लेय के घोर मे गळवा वाळो कोड़ नी तेम रोग से; अने तीहयु घोर वीटळ्ळु से। अने तीहयु आखु गारा समेत दगड़ा लाकड़ा अने घोर ने खोदाड़ीन तीहयी आखी चीज ने चुटाड़ीन ह़ेर सी बारु काना वीटळ्ळा जागा मे नखाड़ दे। अने जत्यार तक घोर बंद रेय तत्यार तक कोय तीनी मे जाय ता तीहयो ह़ांतो तक वीटळ्ळो रेहे; अने जे कोय तीहया घोर मे ह़ुवे तीहयो आपणा लुगड़ा धोवे; अने जे कोय तीहया घोर मे खाणु खाय तीहयो बी आपणा लुगड़ा ने धोवे। “पण कदी पुंजारो आवीन देखे के घोर नी लीपाय करवान बाद गेथो छालो नी फेल्लो हय, ता तीहयो ते घोर ने चोखलो ठेरावहे काहाके ते रोग वारु हय जेलो से। अने तीहया घोर ने चोखलु करवा ना लेदे बे चड़ा, देवदार नाम नु झाड़ नी लाकड़ी, रात्ला रंग नु लुगड़ु अने जुफा झाड़ नो पोदो आहयु आखु लीन आवे; अने एक चड़ा ने वयत्ला पाणी ना उपर धोळा ना ठाहरा मे मारे, तत्यार ते जीवत्लु चड़ु ने देवदार नाम नु झाड़ नी लाकड़ी ने रात्ला रंग नु लुगड़ु ने अने जुफा झाड़ नो पोदो आहयु आखु भेळु करीन मरला चड़ा ना लोय मे अने वयत्ला पाणी मे डुबाड़ देवो, अने तीहया घोर पोर ह़ात कावा छीड़के। आहयी रीते तीहया चड़ा नु लोय, अने वयत्लु पाणी, अने जीवत्लु चड़ु अने देवदार नाम नु झाड़ नी लाकड़ी, अने जुफा झाड़ नो पोदो अने रात्ला रंग नु लुगड़ु ना लारे घोर ने चोखु करे; तत्यार तीहयु जीवत्लु चड़ा ने ह़ेर गेथु बारु मयदान मे छोड़ देय; आहयी रीते तीहया घोर ना लेदे पछतावो करे, ता तीहयु घोर चोखलु ठेरहे।” आखी भाती ना कोड़ ना छाला, अने दादर, अने लुगड़ा, अने घोर नो कोड़, अने ह़ुजन, अने छालो, अने दाग ना बारा मे, चोखला अने वीटळ्ळा ठेराव्वा नी ह़ीकापण आपवा नो नेम आहयोत से। आखी भाती ना कोड़ नो आहयोत नेम से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.