Paliya Bible
लेव्यवेवस्था 12
पोखड़ायवा वाळी बयर ने चोखी करवान नेम
अळी भगवान मुसा ने केदो, ईस्रायली माणहु ने के: जे बयर भारेपोगे हय्न सोरु ने पयदा करे ता ह़ात दाड़ा तक वीटळ्ळी रेहे; जीसम तीहयी छेटी हयन वीटळ्ळी रेय तेम। अने आंठवा दाड़े सोरु नु खतनु करवा जोवे। अळतेण तीहयी बयर खुन पड़वा ना कारण सी तयतीस दाड़ा तक वीटळ्ळी रेय; अने जत्यार तक तीना चोखी हयवा ना दाड़ा पुरा नी हय जाय तांह तक तीहयी नी ते चोखली चीज ने छीमवा जोवे, अने नी ते चोखला जागा मे जवा जोवे। अने कदी तीनी सोरी पयदा हयी हय, ता तीहयी छेटी हये तेम वीटळ्ळी चोवदे दाड़ा रेहे; अने अळतेण छीयासट दाड़ा तक खुन पड़वा ना कारण सी वीटळ्ळी रेय। “जत्यार तीना चोखी हयवा ना दाड़ा पुरा हय जाय, ता भले तीनो सोरो हयो हय के सोरी, तीहयी होम नी बादा ना लेदे एक साल नु गाडरा नु बच्चु, अने पाप नी बादा ना लेदे पारवा नु एक बच्चुन नीता हुली ने मेळ कराव्वा वाळा तम्बु ना झापला पोर पुंजारान्तां लावे। ता पुंजारो तीने भगवान अगळ भेट चड़ाय्न तीनी लेदे पछतावो करे; अने तीहयी तीनु लोय वयवा नी वीटळ सी छुटीन चोखली ठेरहे। जे बी बयर नो सोरो नीता सोरी पयदा हये तीनी लेदे आहयोत नेम से। अने कदी तीनी पांह गाडरु आपवा लायक नी हय, ता बे हुली नीता पारवा ना बे बच्चा, एक ते होम नी बादा ना लेदे अने बीजु पाप नी बादा ना लेदे; अने पुंजारो तीनी लेदे पछतावो करे, ता तीहयी चोखली ठेरहे।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.