Paliya Bible
लेव्यवेवस्था 10
नादाब अने अबीहु नो पाप
ता नादाब अने अबीहु नाम ना हारुन ना बे सोरा आह़फा-आह़फाम नु धुपदान लेदा, अने तीनी मे आक्ठु भर्या, अने तीनी मे धुप नाखीन, भगवान नी अगळ वीटळ्ळी आक्ठी ह़ोप्या; जीनो हुकम भगवान नी आप्यो। ता भगवान अगळ गेथु आक्ठु नीकळ्यु अने तीमने बेम ने खत्तम कर देदु, अने तीहया भगवान ना अगळ मर ज्या। ता मुसो हारुन ने केदो, “आहयी तीहयी वात से जीने यहोवा भगवान केदलो हतो के मारी ह़ाते आवो, जरुड़ी से के तीहयो मने चोखलो जाणे, अने आखा माणहु अगळ मारी बड़ाय करे।” अने हारुन होगोत हय र्यो तत्यार मुसो मीसायेल ने अने एलसाफान ने जे हारुन ना काको उज्जीयेल ना सोरा हता बोलाय्न केदो, ह़ाते आवो, अने तमारा भतरेजा ने चोखला जागान अगळ गेथा चुटीन छाहळा मे गेथा बारा ली जावो। मुसा ना आहया हुकम ना लारे तीहया ह़ाते जाय्न तीमने डगला भेळ हाकलीन छाहळा गेथा बारा ली ज्या। ता मुसो हारुन ने अने तीना सोरा एलीयाजार अने ईतामार ने केदो, तमु आह़फाम मुंडे ना नीम्बाळा ना फेलावो, अने आह़फाम ना लुगड़ा ने नी फाड़जो, आसम नी हये के तमु बी मर जावो, अने आखी मंडळी पोर तीनी रीह भड़के; पण बीजा आखा ईस्रायली माणहु ने यहोवा भगवान ना मोकल्ला आक्ठा सी हयली मोत सी दुखी हयो। अने तमु मेळ कराव्वा वाळा तम्बु नु झापलु गेथा बारा नी जजो, आसम नी हये के तमु मर जावो; काहाके भगवान नु अभीसेक करलु तेल तमने लगाड़लु से। मुसा ना आहया बोल ना लारे तीहया कर्या।
पुंजाराम नी लेदे नेम
अळी भगवान हारुन ने केदो, जत्यार-जत्यार तु नीता तारा सोरा मेळ कराव्वा वाळा तम्बुन्तां आवे तत्यार तमारी मे गेथा कोय बी अंगुर नो माणलो रोह नीता ह़रु नी पीजो। आसम नी हये के तमु मर जावो; तमारी पीड़ी सी पीड़ी आहयी रीती चालती रेय, जीनी सी तमु चोखलु अने वीटळ्ळु मे, अने वारलु अने बगड़लु ने जाण सको, अने ईस्रायली माणहु ने तीहयी आखी रीती ने ह़ीकाड़ सको जीने मुसा ना लारे भगवान तीमने देखाड़ देदलो से। अळी मुसो हारुन ने अने बचला तीना बेम सोरा ईतामार अने एलीयाजार ने बी केदो, “भगवान ने आक्ठा मे चड़ावलु अन नी बादा नु बचलु से तीने लीन वेदी ह़ाते खमीर वगर नु खावो, काहाके तीहयु चोखलु से; अने तमु काना चोखला जागा मे खावो, तीहया भगवान ने आक्ठु मे चड़ावला मे गेथो तारो अने तारा सोरा नो हक से; काहाके मने आसम हुकम आपलो से। पण हीलावली भेट नी छाती अने चुटली भेट नो पींडा ने तमु मतलब, तु अने तारा सोरा-सोरी आखा काना चोखला जागा मे खावो; काहाके तीहया ईस्रायल नी मेल-मीलाप नी बादा मे गेथु तने अने तारा सोरा नो हक ठेराय देदली से। चरबी ना हवन भेळ जे चुटली भेट नो पींडो अने हीलावली भेट नी छाती भगवान ना अगळ हीलाव्वा ना लेदे आया करहे, आहयो वाटो भगवान ना हुकम ना लारे सदा नी रीती नो नेम तार जुगु अने तारा सोरा ना लेदे से। अळी मुसो पाप नी बादा ना बोकड़ा नी छान-बीन कर्यो, तत्यार मालम पड़्यु के तीहयु धपाड़लु से। आनी लेदे एलीयाजार अने ईतामार जे हारुन ना सोरा बचला हता तीमने रीह मे केवा बाज ज्यो, पाप नी बादा जे चोखली से अने जीने भगवान तमने आनी लेदे आपलो से के तमु मंडळी ना अधरम नो भार तमु तमारी उपर लीन तीमनी लेदे भगवान ना अगळ पछतावो करो, तमु तीनु माह चोखला जागा मे काहा नी खादा? देख, तीनु लोय चोखला जागा मे नी लाया, जरुड़ी हतु के तमु मारा हुकम ना लारे तीनु माह ने चोखला जागा मे खाता।” आनो जपाप हारुन मुसा ने आसम आप्यो, “देख, आजेत तीहया तीमनी पाप नी बादा अने होम नी बादा ने भगवान नी अगळ चड़ाया; अळतेण मार पोर आसम गरा आय पड़ी। आनी लेदे कदी मे आज पाप नी बादा नु माह खातो ता आहयी वात भगवान ना अगळ वारु रेती ह़ु?” जत्यार मुसो आहयु ह़मळ्यो ता तीने सांती जड़ी।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.