Paliya Bible
युहन्ना 15:5
Verse 5 is marked below, with the whole chapter around it. Read from the start
खरलो अंगुर नो वेलो
खरलो वेलो मेत से अने मारो बाह कीरसाण से। जे डाळ नी फाले, तीने मारो बाह वाडी नाखे, अने जे फाले, तीने तीहयो साटे के अळी बी वदु फाले। तमने जे ह़ीकापण मे आपलो से, तीहयी ह़ीकापण नी लारे तमु चोखा हय जेला से। तमु मारी मे बणला रेवो अने मे तमारी मे जीसम डाळ कदी थुड़ मे बणीन नी रेय, ता आह़फीत नी फाल सके, तेमेत तमु बी कदीम मारी मे बणीन नी रेवो ता तमु बी नी फाली सको।
मे अंगुर नो वेलो से, अने तमु मारा डाळ्या से। मारी गेथा आंग्ये हय्न तमने कंय बी नी कराय। एतरे जे मारी मे जोड़ायलो रेय अने मे तीनी मे जोड़ायलो रेम, तीहयो घणो फालहे। जे मारी मे जोड़ायला नी रेय, तीहया ते डाळ्या ह़रका से, जीने कीरसाण वाडीन नाख देय, अने तीहया ह़ुक जाय। अने कीरसाण ते डाळ्या ने चुटीन आक्ठा मे नाख देय अने तीहया धप जाय। कदी तमु मारी मे जोड़ायला रेहु, अने मारी ह़ीकापण ने पाळता रेहु, ता जे जोवे तीहयु वीन्ती करीन मांगजो, अने मे तमने आप देही। तमु घण ढेरका फोळ लावहु, ता मारा भगवान बाह नी बड़ाय हयहे, तात तमु मारा चेला बण जहु। जीसम बाह मने मोंग करलो से, तेमेत मे बी तमने मोंग करलो से। एतरे तमु मारा मोंग मे घोळायला रेहु। मे मारा बाह नो हुकम पाळतो जाय्न तीना मोंग मे घोळायलो रेम, तेमेत तमु बी मारा हुकम पाळहु, ता तमु मारा मोंग मे घोळायला से।
मे तमने आहयी वात आनी करते केदो, के मारी खुसी तमारी मे बणीन रेय, अने तमारी खुसी पुरी हय जाय। 1मारो हुकम आहयो से के जीसम मे तमने मोंग करलो से, तेमेत तमु बी एक-बीजा ने मोंग करता रेजो। आह़फा ना दोस्तीदार्या ने मोंग करीन तीमनीन करते मरवात आखा गेथो मोटो मोंग से। आहया मोंग गेथो कानो बी मोंग मोटो नी हय। कदीम तमु मारा हुकम पाळहु, ता तमु मारा खरला दोस्तीदार्या केवायहु। पावर्या ने मालम नी पड़े के तीना मालीक नी मरजी ह़ु से, अने तीहयो ह़ु करवा वाळो से, पण मे मारा बाह पांह गेथु जे ह़मळ्ळो तीहयु आखु तमने की देदलो से। पण हाव गेथो मे तमने पावर्या नी केम, पण दोस्तीदार्या केही। तमु मने नी टाळ्या, पण मे तमने टाळीन मारा कामे लगाड़लो से, के तमु मारा नाम सी भगवान पांह वीन्ती करीन जे कंय मांगहु, तीहयु भगवान बाह तमने आप देहे। अने आसम करीन तमु जाय्न तमारी जीवाय मे जलम रेण्यान मेर पकाड़ो। मे तमने आहयो हुकम आनीन करते आप र्यो, के तमु एक-बीजा ने मोंग करता रेय।
आहयी कळी ना माणहु ईसु ना चेला भणी खार करहे
कदीम आहयी कळी ना माणहु तमारी भणी खार करहे, ता तमु आहयु फोम राखजो के तमारी गेथा पेले मारी भणी खार करला से। कदीम तमु आहयी कळी ना माणहु रेता, तत्यार तीहया आपणा ह़मजीन मोंग करता, पण मे तमने आहयी कळी ना माणहु मे गेथा टाळ लेदलो से, करीनेत तीहया तमारी भणी खार करहे। 2मे तमने जे वात केदो, तीने फोम राखजो के पावर्यो आह़फा ना मालीक गेथो मोटो नी हय। मे तमारो मालीक से; ते बी माणहु मने वेला पाड़्या आसवा माणहु तमने बी वेला पाड़हे। आहयी कळी ना माणहु मारी ह़ीकापण ने नी पाळ्या, ता तमारी ह़ीकापण ने बी नी पाळे। एसवा माणहु, मने मोकलन्या भगवान ने नी ओळख्या, अने मारो वीरोद कर्या। तमु ते मारु नाम ली र्या, एतरे तीहया तमारी भणी खार करीन वेला पाड़हेन-पाड़हे। कदीम मे नी आवतो, अने हीमने पाप ना बारा मे भगवान नी सच्चाय ना बारा मे नी ह़ीकाड़तो ता हीमने पाप नी लागतो; पण हाव ते हीमनी पांह पाप ना बारा मे कंय बी ढोंगड़ा करवा नो मोखो नी हय। जे मार भणी खार करे, तीहयो मारा भगवान बाह भणी बी खार करे। कदीम तीमनी अगळ तीहया मोटा कामु नी करतो, जे कामु कोय बीजो कदी नी कर्यो, ता हीमने पाप नी लागतो। पण हमणे ते तीहया आसवा कामु देखीन बी मने नी मान्या अने ह़ाम्बा मार भणी अने मारा भगवान बाह भणी खार करला से। खरली सास्तर जीने तीहया माने, तीहयी सास्तर मे आसम लीखलु से, के तीहया माणहु उदड़ेत मारा वेरी बण जेला से। आहयु आखु ते बोल ना लारे हय र्यु।
मे तमारीन्तां सात देण्या ने मतलब सच्चाय नी आत्मा ने भगवान बाहन्तां गेथो मोकलही। जत्यार तीहयी सच्चाय नी आत्मा भगवान बाह मे गेथी आवहे, तत्यार तीहयी मारा बारा मे गवाय देहे। अने तीनी ह़ाते तमु बी मारी गवा देजो काहाके तमु सुरु गेथात मारी ह़ाते रेला से।
Source notes (2)
- Cross-reference युहन्ना 13:34; 15:17; 1 युहन्ना 3:23; 2 युहन्ना 1:5
- Cross-reference मत्ती 10:24; लुका 6:40; युहन्ना 13:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.