Paliya Bible
उबजणाय कीताप 8
मुसळ-धार्यो पाणी खत्तम हये
भगवान नुह अने जेतरा जंगली जानवरु अने पाळला जानवरु तीनी भेळ मोट्लु ढुन्ड्यु मे हता, तीमनी आखा नी खबर लेदो: अने भगवान धरती पोर वाहळु बड़ायो, अने पाणी कम हयवा बाज ज्यु। उंडला दर्या नो झोर अने ह़रग नु वादळु बंद हय ज्यु; अने तीनी सी जे पाणी पड़तु हतु तीहयु बी बंद हय ज्यु। अने एक ह़ोव पचाह दाड़ा नी अळतेण पाणी धरती पोर सी लगातार कम हयतु ज्यु। ह़ातवा मयना ना ह़तरे दाड़ा मे, मोट्लु ढुन्ड्यु अरारात नाम ना बड़ा पोर टेक ज्यु। अने पाणी दसवा मयने तक घटतु जत र्यु, अने दहवा मयना ना पेला दाड़े, बड़ा नी चोटली देखाव पड़ी।
अळी आसम हयु के चाळीह दाड़ा नी अळतेण नुह आह़फा बणावला मोट्लु ढुन्ड्यु नी खीड़की खोलीन, एक ढान्ड्यो उडाड़ देदो: जत्यार तक पाणी धरती पोर सी सुख नी ज्यु, तां तक ढांड्या जींखर-तींखर फीरतु र्यु। अळी तीहयु आह़फी पां गेथु एक पारवी ने बी उडाड़ देदो के देखे के पाणी धरती पोर गेथु कम हयु के नी। तीहयी पारवी ने आह़फा पोगु टेकवा जुगु कोय जागो नी जड़्यो, ता तीहयी तीनी पां मोट्लु ढुंड्यु मे पासी आवती री: काहाके आखी धरती नी उपर पाणीत-पाणी फीरलु हतु तत्यार तीहयो हात बड़ावीन तीने आह़फान्तां ढुंड्या मे ली लेदो। तत्यार अळी ह़ात दाड़ा तक वाट जोवीन, तीहयो तीहयी पारवी ने मोट्लु ढुंड्यु मे सी अळी उडाड़ देदो। अने पारवी ह़ांती टेमे तीनी पांह आवती री, ता ह़ु देख्यो के तीना चोण मे जेतुन झाड़ नु एक नवलु पान्टु से; आनी सी नुह जाण लेदो, के पाणी धरती पोर कम हय जेलु से। अळी तीहयो ह़ात दाड़ा अळी वाट जोवीन तीहयी पारवी ने उडाड़ देदो; अने तीहयी तीनी पांह कदी पाछी नी आवी।
नुह नी उमर ना छोव ह़ोव साल ना पेले दाड़े पाणी धरती पोर सी सुख ज्यु। तत्यार नुह मोट्लु ढुन्ड्यु नी छत उगाड़ीन ह़ु देख्यो के धरती सुख जेली से। अने बीजा मयना ना सत्तावीसवा दाड़े धरती आखी रीते सुख जी।
तत्यार भगवान नुह सी केदो, “तु आह़फा सोरा, लाडी अने ववेह भेळ मोट्लु ढुन्ड्यु मे गेथो नकळीन आव। ह़ु चड़ा, ह़ु जानवरु, ह़ु आखी भाती ना पेट ना भरहे चालवा वाळा जीव जे धरती पोर आड़े; जेतरा डील वाळा जीव-जन्तु तारी ह़ाते से, तीहया आखाम ने आह़फी ह़ाते नीकाळीन लीन आव के धरती पोर तीमनी सी घणा सोरा पयदा हये; अने तीहया फुले-फाले, अने धरती पोर फीर जाय।” तत्यार नुह अने तीना सोरा अने लाडी अने ववेह, नकळी आया। अने आखा च्यारपोग्या, घीहाय्न चालन्या जीव-जन्तु, अने चड़ा, अने जेतरा जीव-जन्तु धरती पोर चालत्ला-फीरत्ला से, आखा भाती-भाती ना मोट्लु ढुन्ड्यु मे गेथा नीकळी आया।
नुह नी लारे होम बादा चड़ाव्वा
तत्यार नुह यहोवा जुगु एक वेदी बणायो, अने आखा चोखला जानवरु, अने आखा चोखला चड़ा मे गेथा, कंय-कंय लीन वेदी पोर होम बादा चड़ाया। आनी पोर यहोवा वारु गंदायण्यो गंद हात करीन सोच्यो, “माणहे नी कारण मे कदी बी धरती ने सराप नी आलु, कदी माणेह ना मन मे पयदावारी सी कंय पयदा हये तीहयु बुरुत हये; ते बी जीसम मे आखा जीव ने मारलो से, तेमेत तीमने अळी नी मारु। हाव गेथी जत्यार तक धरती बणीन रेहे, तत्यार तक वेरवा अने वाडवा नी टेम, टाड अने तपवा, उनाळो अने ह़ीयाळो, दाड़ो अने रात, हमेसा हयता रेहे।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.