Paliya Bible
उबजणाय कीताप 16
हाजीरा अने ईस्माएल
अब्राम नी लाडी सारे नी कोय अवल्यात नी हती: अने तीनी हाजीरा नाम नी एक मीस्र नी पावर्याण हती। सारे अब्राम ने केदी, “देख, यहोवा ते मारी कोख बंद कर र्यो करीन मे तार सी वीन्ती करु के तु मारी पावर्याण नी पांह जा; कंखर माय्न मारु घोर तीनी लारे अगु वदे।” सारे नी आहयी वात अब्राम मान लेदो। करीन जत्यार अब्राम ने कनान देस मे रेता दह साल वीत ज्या ता तीनी बयर सारे आह़फी मीस्र नी पावर्याण हाजीरा ने लीन आह़फा घोरवाळा अब्राम ने आपी, के तीहयी तीनी लाडी बणे। तीहयो हाजीरा नी पांह ज्यो, अने तीहयी भारेपोगे हयी; जत्यार तीहयी जाणी के मे भारेपोगे से, ता तीहयी आह़फी नी सेटाणी ने गलत नींगा सी देखवा बाज जी।
तत्यार सारे अब्राम सी केदी, “जे मार पोर वेला हयली से तीहयी तारात मुंडा पोर हये। मे ते आपणी पावर्याण ने तारी लाडी बणाय देदी; पण जत्यार तीहयी जाणी के तीहयी भारेपोगे से, ता तीहयी मने गलत ह़मजवा बाज जी, करीन यहोवा मारी अने तारी वचमे नीयाव कर।”
अब्राम सारे ने केदो, “देख, तारी पावर्याण तारा हक मे से; जीसम तने भलु लागे तीसमेत तीनी ह़ाते कर।” ता सारे तीने दुख देवा बाज जी अने तीहयी तीनी अगळ गेथी नाह जी।
तत्यार यहोवा नु दुत तीने बड़ा मे सुर ना वाट्ये पाणी ना एक झोर नी तां देखीन तीने केदो, “ए सारे नी पावर्याण हाजीरा, तु कां गेथी आवे अने कां जाय?” तीहयी केदी, “में मारी सेटाणी सारे नी तां गेथी नाहीन आवली से।”
यहोवा नो दुत तीने केदो, “तारी सेटाणीन्तां पासी जत रे अने तीना हक मे रे।” अने यहोवा नो दुत तीने केदो, “मे तारा अवल्यात ने घणो वदाड़ही, आञे तक के ढेरेत जणा नी कारण तीमनी गीणती नी हय सकहे।” अने यहोवा नो दुत तीने केदो, “देख तु भारेपोगे से, अने सोरो पयदा करही; तु तीनु नाम ईस्माएल पाड़जे; काहाके यहोवा तारा दुख नु हाल ह़मळी लेदलु से। अने तीहयो माणेह जंगली गदड़ा नी तेम हयहे, अने तीहयो आखा ना वीरोद मे उबो हयहे, अने आखा तीना खीलाप हय जहे; अने तीहयो आपणा ह़गाय वाळा नी वचे वहलो रेहे।”
तत्यार तीहयो यहोवा नु नाम जीनी सी तीहयो वात करलो हतो, भगवान देखवा वाळो से पाड़ीन केदी, “ह़ु मे आञे बी तीने जत्लो देखी अने देखवा नी अळतेण बी जीवत्ली री?” आहया कारण सी तीहया कुवा नु नाम लहेरोय1 कुवो पड़्यो; तीहयो ते कादेस अने बेरेद ना वचमे से। हाजीरा ने अब्राम नी लारे एक सोरो हयो; अने अब्राम आपणा सोरा नु नाम, ईस्माएल पाड़्यो।2 जत्यार हाजीरा अब्राम नी लारे ईस्माएल ने पयदा करी तीहयी टेमे अब्राम छीयासी साल नो हतो।
Source notes (2)
- Footnote लहेरोय जीवत्लाम नो कुवो जे मने देखे
- Cross-reference गलातीयो 4:22
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.