Paliya Bible
उबजणाय कीताप 14
अब्राम नु लुत ने छोड़ावणु
सीनार नो राजा अम्रापेल, अने एल्लासार नो राजा अर्योक, अने एलाम नो राजा कदोर्लाओमेर, अने गोयीम नो राजा तीदाल ना दाड़ा मे आसम हयु, के तीहया सदोम ना राजा बेरा, अने अमोरा ना राजा बीर्सा, अने अदमा ना राजा सीनाब, अने सबोयीम ना राजा समेबेर, अने बेला जे सोवर बी केवात्लो से, आहया राजाम ना वीरोद लड़ाय कर्या। आहया पांचोव सीद्दीम नाम ना हेटला जागा मे, जे मरला दर्या नी ह़ाते से, एको कर्या। बारे साल तक ते आहया कदोर्लाओमेर ना हक मे र्या; पण तेरवा साल मे तीना वीरोद मे हय ज्या। चोवदवा साल मे कदोर्लाओमेर, अने तीना ह़ाती राजा आया, अने अस्तारोत्कनम मे रपाईयो ना, अने हाम मे जुजीयो ने, अने सावेकीर्यातेम मे एमीयो ने, अने सेईर नाम ना बड़ा मे होरीयो माणहु ने, ठोकता-ठोकता तीहया एल्पारान तक जे जंगल नी ह़ाते से, पुग ज्या। तां सी तीहया पासा आवीन एन्मीसपात मे आया, जे कादेस बी केवायत्लो से, अने अमालेकीयो ना आखा देस ने, अने तीहया एमोरीयो ने बी जीक लेदा, जे हसासोन्तामार मे रेता हता।
तत्यार सदोम, अमोरा, अदमा, सबोयीम, अने बेला जे सोवर बी केवायत्लो से, ईमनो राजा नीकळ्यो, अने सीद्दीम नाम ना हेटला जागा मे, तीमनी ह़ाते लड़ाय करवा करीन हालर बणायो: एलाम नो राजा कदोर्लाओमेर, गोयीम नो राजा तीदाल, सीनार नो राजा अम्रापेल, अने एल्लासार नो राजा अर्योक, आहया च्यारो ना वीरोद मे तीहया पांचोव हालर बणाया। सीद्दीम नाम ना हेटला जागा मे जां चीकण्ला कादा ना खाडात-खाडा हता; सदोम अने अमोरा ना राजा नाहता-नाहता तीमनी मे घेरवाय ज्या, अने जे बच्या तीहया बड़ा पोर नाह ज्या। तत्यार तीहया सदोम अने अमोरा ना आखा धन अने खावा नी चीज ने लुट-पाट करीन जत र्या। अने अब्राम नो भतरेजो लुत, जे सदोम मे रेतो हतो; तीने बी धन भेळ तीहया लीन जत र्या।
तत्यार एक जणो जे नाहीन बच नीकळ्यो हतो तीहयो ज्यान ईब्रानी अब्राम ने खबर आल्यो; अब्राम ते एमोरी मम्रे, जे एसकोल अने आनेर नो भाय हतो, तीहयो चोखला वांज्या झाड़ु नी वचमे रेतो हतो; अने आहया माणहु अब्राम नी ह़ाते वायदो करला हता। आहयु ह़मळीन के तीनो भतरेजो तीमनी केद मे धराय जेलो से, अब्राम आपणा तीन ह़ोव अठ्ठारे वारु ह़ीकला, लड़ाय करवा मे पक्का पावर्याम ने लीन जे तीना घोराणा मे पयदा हयला हता, आखु हत्यार लीन दान ह़ेर तक पसळ ज्या। अने आह़फा पावर्याम ने अलग-गलक टोळा बणावीन राते तीमनी पोर हमलो करीन तीमने मार देदा अने होबा तक, जे दमीस्क ना धुराव भणी से, तीमनी पसळ ज्या। जत्यार तीहया आखा धन ने, अने आह़फा ना भतरेजा लुत ने, अने तीना धन ने, अने बयरा ने, अने आखा केदीम ने, पासा ली आया।
मलकीसेदक अब्राम ने बरकत आपे
कदोर्लाओमेर अने तीमना ह़ाती राजाम ने जीतीन पासो लीन आवतो हतो ता सदोम नो राजा सावे नाम ना हेटला जागा मे, जे राजा नो हेटलु जागो बी केवायत्लो से, तीनी सी भेट करवा आयो। तत्यार सालोम नो राजा मलकीसीदक, जे डाहला मुख्या भगवान नो पुंजारो हतो, रोट्ला अने मोद लीन आयो।1 अने तीहयो अब्राम ने आहयु बरकत आप्यो, “डाहला मुख्या भगवान भणी गेथा, जे ह़रग अने धरती नो अदीकार्यो से, तु जुगाळो से। अने जुगाळो से डाहलो मुख्यो भगवान, जे तारा वेरीम ने तारा हक मे कर देदलो से।” तत्यार अब्राम तीना आखा धन नु दसवो वाटो आप्यो।
तत्यार सदोम नो राजा अब्राम सी केदो, “माणहु ने ते मने आल, अने धन ने तारी पांह राख।”
अब्राम सदोम ना राजा सी केदो, “डाहला मुख्या भगवान यहोवा, जे ह़रग अने धरती नो हकदार्यो से, तीनी मे आहयी ह़ाम खाम, के जे कंय तारु से तीनी मे सी नीता एक सुत, अने नी खाहड़ा नु बोंद, नी कानी अळी चीज लेही; के तु ईसम नी केवा जोवे, के अब्राम मारीत कारण मातभर हयु। पण जे कंय आहया जुवान्या खाय लेदला से अने तीमनी वाटु जे मार ह़ाते आवला हता; मतलब आनेर, एसकोल, अने मम्रे मे नी पासु नी आलु तीहया ते आपणु-आपणु वाटु राख लेदा।”
Source notes (1)
- Cross-reference ईब्रानीयो 7:1-10; भजन सहीता 110:4
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.