Paliya Bible
गलातीयो 5:22
Verse 22 is marked below, with the whole chapter around it. Read from the start
ईसु मसी मे छुटकारो
मसी छुटकारा ना लेदे आमने सोड़ावलो से; आनी लेदे टेकला रेवो, अने गुलामी ना वळा मे अळी ना जोड़ावो।
देखो, मे पोलुस तमने केम, के कदी तमु खतनु करावीन पासा कायदा भणी जावो, ता ईसु मसी मे तमने कंय फायदो नी हये। ते बी मे आखा खतना कराव्वा वाळा ने चेताय देम, के तीने आखा कायदा मानवा पड़हे। तमु जे कायदा ना लारे धरमी बणवा हींड र्या, मसी सी आंग्ये अने दया जड़वा सी ठारला री जेला से। काहाके आत्मा ना कारण आमु भरहा सी, आह करली धरमपण नी वाट जोय र्या। अने मसी ईसु मे खतना करलु नीता नी करलु कंय काम नु हय, पण नीस्तो भरहो, जे मोंग लारे काम नो से।
मोंग ना लारे कायदा नु पुरु हयणु
तमु ते वारु दवड़ र्या हता, हाव तमने कोय रोक देदु, के सच्चाय ने ना मानो। आसवी ह़ीक तमारा बोलाव्वा वाळा भगवान भणी गेथी नी हय। 1थोड़ुक खमीर आखा कोहणला लोट ने खमीर बणाय देय। मे मालीक मे एक हयवा ना लेदे तमारा बारा मे भरहो राखु, के तमारो कोय बीजो वीच्यार नी हय, पण जे तमने घबराड़ देय, तीहयो कोय काहा नी हय, डंड जड़हे।
ए भायु, कदी तमु बी जीसम थोड़ाक माणहु ह़मजे के खतनु करवा खास से। अने आहयु परच्यार करु, ता मने हमणे लग काहा वेला पाड़े? आसम हतु ता मसी ना कुरुस ना लेदे पयदा हयली आखी अड़चन खत्तम हय जवु हती। भलु रेतु के जे तमने वेला पाड़ र्या, तीहया आह़फाम नो अंग वाड लेता!
ए भायु, तमु छुट्टा हयवा करीन बोलावला से, पण आसम नी हयवा जोवे, के आहयो छुटकारो डील ना कामु ना लेदे मोखो बणे, पण मोंग सी एक-बीजा ना पावर्या बणो। काहाके आखा कायदा आहयी एकीत वात मे पुरा हय जाय, “तु आपणा ह़ाते वाळा सी आह़फान तेम मोंग कर।” कदी तमु एक-बीजा ने दुख दीन चोट पुगाड़ता हय, ता चेतीन रेवो के एक-बीजा नु नुकसान नी कर देवो।
आत्मा अने माणहु नो सोभाव
पण मे केम, आत्मा ना अनसारे चालो, ता तमु डील नी हेर कानी रीते सी बी पुरी नी करो। 2काहाके डील आत्मा ना वीरोद मे अने आत्मा डील ना वीरोद मे हेर करे, अने आयहा एक-बीजा ना वीरोद मे से; आनी लेदे के जे तमु करवा हेर करो तीहयु नी कर सको। अने कदी तमु आत्मा ना चाले चालता हय ता कायदा ना कब्जा मे ना रेवो।
डील ना काम ते उजन्ता से; मतलब छीनाळु करवा, गलत काम, लुच्चाय, मुर्ती नी पुजा करवा, बड़वाय, वेरपोणु करवा, झगड़ो करवा, कुहरायवा, खीजवायवा, गरज्यो, रीह, दारकुट्टो बणवा, छाकीन छीनाळु मे मजा लेवा अळी ईमनी सेवा अळी कामु से; ईमना बारा मे जीसम पेले बी मे की देदलो, के आसवा-आसवा काम करवा वाळा भगवान ना राज ना वारीस कदी नी हये।
पण आत्मा ना फोळ; मोंग करवा, खुस रेवा, सांती गम खावा, अने दया करवा, भलाय करवा, भरहो; ह़ुमाळा रेवा, अने हक मे राखवा; आवा-आवा कामु ना वीरोद मे काना बी कायदा नी हय। अने जे मसी ईसु ना से, तीहया डील ने तीमनी हेर अने पापी नी हाय भेळ कुरुस पोर चड़ाय देदला से। कदी आमु आत्मा ना लारे जीवत्ला से, ता आत्मा ना अनसारे चालो बी। आमु घमंड्या हय्न एक-बीजा ने ना छेड़ो, अने एक-बीजा सी डहवाय ना करो।
Source notes (2)
- Cross-reference 1 कुरन्थी 5:6
- Cross-reference रोमीयो 7:15-23
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.