Skip to content
BibleKenya

Paliya Bible

यहेजकेल 28

सोर ह़ेर ना राजा ना वीरोद मे भगवान वगे गेथी वात

यहोवा नो आहयो बोल मारीन्‌तां पुग्‌यो: “ए माणेह नी अवल्‌यात, सोर ह़ेर ना मुख्‌या ने के, भगवान यहोवा आसम केय: तु मन मे घमंड करीन आहयु केदलो से, ‘में भगवान से, मे दर्‌या नी वच मे भगवान नी जागा पोर बह र्‌यो,’ पण कदीम तु आह़फा ने भगवान ने तेवो देखाड़े, ते बी तु भगवान नी, पण माणेहेत से। तु दानीयल सी जादा अक्‌कल वाळो ते से; कोय बी वात तारी सी ह़तायली नी हहे; तु तारी अक्‌कल अने ह़मज नी लारे धन हात कर्‌यो, अने तारा ह़मान ना ह़मान मेकवा ना गोदाम मे ह़ोनु-चांदी मेकलो से; तु घणी अक्‌कल सी लेण-देण कर्‌यो जीनी सी तारु धन बड़्‌यु, अने धन ना कारण सी तारु मन घमंड सी भराय जेलु से। करीन भगवान यहोवा आसम केय: तु जे आह़फा नु मन भगवान ने तेवु देखाड़े, करीन देख, में तारी पोर एवा बीजा देस वाळा सी हमलो करावही, जे आखा राज्‌य गेथा वण-दयाळ्‌ळा से, तीहया तारु घटाळ्‌ळु अने अक्‌कल ना वीरोद मे तीमनी तलवार नीकाळहे अने तारी चमकत्‌ली ह़ोबा ने रीवण्‌या-तीवण्‌या कर देहे। तीहया तने मोत ना खाडा मे उतारहे, अने तु दर्‌या मे मारला नी रीते मर जही। ता, ह़ु तु तने मारवा वाळा नी अगळ केतो रेही, ‘में भगवान से?’ तु तारा हत्‌यारा ना हात मे भगवान नी, पण माणेहेत ठेरही। तु बीजा देस वाळा ना हात सी खतना वगर ना माणहुन तेम मर जही; काहाके मेंत आसम केदलो से, भगवान यहोवा आसम केय।”

सोर ना राजा नु खत्‌तम हयणु

अळतेण यहोवा नो आहयो बोल मारीन्‌तां पुग्‌यो: “ए माणेह नी अवल्‌यात, सोर ह़ेर ना राजा ना बारा मे दुख नु गीत बणाय्‌न तीने के; भगवान यहोवा आसम केय: तु ते वारु सी बी वारु से; तु अक्‌कल सी पुरो भरायलो अने आखा सी घटाळो से। तु भगवान नी अदन नाम नी वाड़ी मे हतो; तारी पांह पेरवा नु ह़मान, माणीक्‌य मणी, पद्‌मराग मणी, हीरो, फीरोजा मणी, सुलेमानी मणी, यसब मणी, नीलमणी, मरकद मणी, अने रात्‌ली मणी आखी भाती ना मण्‌या अने ह़ोना ना पेरावा हता; तारा डफ अने पाहळ्‌या तारीत मे बणावला हता; जे दाड़े तने बणाया, तीहया दाड़े तीमने बी तीयार करला हता। में तारी रखवाळी करवा करीन वहराड़ देवा वाळो ह़रगदुत टाळलो हतो। में तने आसम ठेरायो के तु भगवान ना चोखला बड़ा पोर रेतो हतो; तु आक्‌ठुन तेम चमकवा वाळा मण्‌या नी वच मे चालतो-फीरतो हतो। जे दाड़े गेथो तु बण्‌यो, अने जे दाड़े तक तारी मे कंय गलत काम नी जड़्‌यु, तीहयी टेमे तक तु तारी आखी चाल-चलण मे वण-गुनाळ्‌ळो र्‌यो। पण लेण-देण जादा हयवा ना कारण सी कोहराय सी भराय्‌न पापी हय ज्‌यो; आनीत सी में तने वीटळ्‌ळो जाणीन भगवान ना बड़ा पोर गेथो उतार्‌यो, अने तारा डील नी रखवाळी करन्‌यो ह़रगदुत बी आक्‌ठु ह़रका चमकवा वाळा मण्‌या नी वच मे गेथो तने नीकाळ देदो। घटाळ्‌ळा ना कारण सी तारा मन मे घमंड आय जेलो हतो; अने बड़ाय ना कारण सी तारी अक्‌कल बगड़ जेली हती। में तने धरती पोर नाख देदो; अने राजाम नी अगळ तने मेक्‌यो के तीहया तने देखे। तारा अधरम ना कामु ढेरका हयवा सी अने तारी लेण-देण मे धोका करवा सी तारा चोखला जागा वीटळ ज्‌या; करीन में तारी मे गेथु एवु आक्‌ठु पयदा कर्‌यो जीनी सी तु धप ज्‌यो, अने में तने आखा देखवा वाळा नी अगळ धरती पोर रोखड़ो बणाय नाख्‌यो। देस-देस ना माणहु मे गेथा जेतरा तने जाणे आखा तारा कारण सी दुखी हया; तु बीक नो कारण बणलो से अने अळी कदी जड़े नी।”

सीदोन ह़ेर ना बारा मे भगवान वगे गेथी वात

यहोवा नो आहयो बोल मारीन्‌तां पुग्‌यो: “ए माणेह नी अवल्‌यात, तारु मोडु सीदोन भणीन करीन तीना वीरोद मे भगवान वगे गेथी वात के, अने के, मालीक यहोवा आसम केय: ए सीदोन, में तारा वीरोद मे से; में तारी वच मे मारी बड़ाय करावही। जत्‌यार में तीनी वच मे डंड आपही अने में खुद ने तीनी मे चोखलो ठेरावही, ता माणहु जाण लेहे के में यहोवा से। में तीनी मे मोट्‌ली बीमारी फेलावही, अने तीनी आखी ह़ड़कु पोर लोय वयाड़ही; अने तीनी च्‌यारो-मेर तलवार चालहे; ता तीनी वच मे घाव लागला माणहु मरहे, अने तीहया जाण लेहे के में यहोवा से।”

ईस्‌रायल ने बरकत जड़हे

“ईस्‌रायल ना घोराणा ना च्‌यारो-मेर ना जेतरा राज्‌य तीमनी ह़ाते गलत वेहवार करे, तीमनी मे गेथा कोय तीमना गोपायवा वाळो काटो नीता कोरवा वाळो भालो अळी नी ठेरे; ता तीहया जाण लेहे के में भगवान यहोवा से।” “भगवान यहोवा आसम केय: जत्‌यार में ईस्‌रायल ना घोराणा ने तीहया आखा माणहुम नी मे गेथा एक्‌ठा करही, जीमनी वच मे तीहया रीवण्‌या-तीवण्‌या हयला से, अने देस-देस ना माणहु नी अगळ तीमनी लारे चोखलो ठेरही, ता तीहया ते देस मे रेहे जे में मारा चाकर्‌या याकुब ने आपलो हतो। तीहया तीनी मे बेफीकर्‌या वहला रेहे; तीहया घोर बणाय्‌न अने अंगुर ना वाड़्‌या लगाड़ीन बेफीकर्‌या रेहे; ता में तीमना च्‌यारो-मेर ना आखा माणहु ने डंड आपही जे तीमनी ह़ाते गलत वेहवार करे, ता तीहया जाण लेहे के तीमनो भगवान यहोवात से।”

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.