Paliya Bible
यहेजकेल 27
सोर ह़ेर जुगु दुख गीत
यहोवा नो आहयो बोल मारीन्तां पुग्यो: ए माणेह नी अवल्यात, सोर ना बारा मे एक दुख नु गीत बणाय्न तीने आहयु के, ए दर्या नी मोय भरायवान झापले रेवा वाळु, ए ढेरेत टापु जुगु देस-देस ना माणहु ह़ाते वेपार करवा वाळु, भगवान यहोवा आसम केय: ए सोर, तु केदलु से के तु खुद पुरुन पुरु घटाळु से। तारी काकड़ दर्या नी वच मे से; तारा बणाव्वा वाळा तने पुरुन पुरु घटाळ्ळु बणाया। तारा आखा पाट्या सनीर बड़ा ना सनोवर झाड़ ना लाकड़ा ना बणला से; तारा ढुंड्या चलाड़वा ना खुटा जुगु लबानोन ना देवदार नाम ना झाड़ ना लेदा। तारा डांडा बासान ना वांज्या झाड़ ना बणाया; तारा ढुंड्या नी छत कीत्तीयो ना टापु मे गेथा लावला ह़ुदला सनोवर नाम ना झाड़ ना हाती ना दात बहाड़ला लाकड़ा ना बणाया। तारा ढुंड्या नी पाल मीस्र मे गेथा लावला, हात वेर बणावला घटाळा सुती लुगड़ा ना बणाया के तारी जुगु झंडा नु काम करे; तारी चांदनी1 एलीसा ना टापु मे गेथा लावला नीळ्ळा अने जामण्या रंग ना लुगड़ा नी बणायी। तारा ढुंड्या चलाड़वा वाळा सीदोन अने अर्वद ह़ेर ना रेवा वाळा से; ए सोर, तारीत वच मे ना अक्कल वाळा माणहु तारा ढुंड्या चलाड़वा वाळा हता। तारा कारीगर जोड़ाय करवा वाळा गबल ह़ेर ना डायला अने अक्कल वाळा माणहु हता; तारी मे वेपार करवा करीन ढुंड्या चलाड़वा वाळा भेळ दर्या पोर ना आखा ढुंड्या तारी मे आय जेला हता। तारी सेना मे फारसी, लुदी, अने पुत देस ना माणहु भरती हयला हता; तीहया तारी मे ढाळ, अने टोपी टांग्या; अने तीमनात कारण सी बड़ाय हयली से। तारु भीतड़ु पोर तारी सेना नी ह़ाते अर्वद ह़ेर ना माणहु च्यारो-मेर हता; अने तारा गुम्मट मे वारला झुमायण्या उबा हता; तीहया तीमनी ढाळ ने तारी च्यारो-मेर नु भीतड़ु पोर टांगला हता; तीमना कारण सी तु पुरु घटाळ्ळु हयलु हतु।
तारु आखु भाती नु धन-दवल्यत घणु रेवा ना कारण सी तर्सीसी माणहु तारा वेपारी हता; तीहया चांदी, लुगड़ु, रांगा अने ह़ीह़ा आपीन तारो माल वेचातो लेदा। यावान, तुबल, अने मेसेक देस ना माणहु तारा माल ना बदले पावर्या-पावर्याण अने पीतळ ना ठाहरा आपता हता। तोगर्मा ना घोराणा ना माणहु तारु धन-दवल्यत लीन, घोड़ा, बहीन जवा ना घोड़ा, अने खच्चर घोड़ो आप्या। ददान ह़ेर ना तारा वेपारी हता; ढेरेत टापु तारा हाट बण्या; तीहया तारी पांह हाती ना दात अने आबनुस नाम ना झाड़ ना लाकड़ा वेपार मे लावता हता। तारी घणी करीगरी ना कारण सी अराम तारो वेपारी हतो; मरकत मणी, जामण्या रंग नु अने हात वेर बणावलु घटाळु करलु कापड़ु, सुती, मुंगा नाम नी चीज, अने लालड़ी आपीन तारो माल लेता हता। यहुदा अने ईस्रायल बी तारा वेपारी हता; तीहया मीन्नीत ना गम, अंजीर, मोद, तेल अने बलसान आपीन तारो माल लेदला से। तारी मे घणी कारीगरी हयी अने आखी भाती नु धन-दवल्यत एक्ठु हयु, आनी सी दमीस्क तारु वेपारी बण्यु; तारीन्तां हेलबोन ह़ेर नु ह़रु अने धोळु-बग हीर पुगाड़्या। वदान अने यावान ह़ेर ना माणहु तारा माल ना बदला मे सुत आप्या; अने तीमना बदले फोलाद तजपान्टा अने अगर नाम नो मसालो बी आपता हता। बहवा नी काठी जुगु ददान तारु वेपारी बण्यु। अरब अने केदार ना आखा मुख्या तारा वेपारी ठेर्या; तीहया गाडरा ना बच्चा, गाडरा अने बोकड़ा लावीन तारी ह़ाते लेन-देन कर्या। सबा अने रामाह ह़ेर ना वेपारी बी तारी ह़ाते वेपार करता हता; तीहया वारला-वारला भाती ना वारला मसाला, आखी भाती ना मणी अने ह़ोनु आपीन तारो माल लेदा। हारान, कन्ने, एदेन, सबा ना वेपारी, अने अस्सुर अने कलमद ह़ेर आहया आखा तारा वेपारी बण्या। तीहया वारली-वारली चीज मतलब ओडवा ना नीळ्ळा अने हात वेर बणावला घटाळा करला लुगड़ा अने दोर्या वेर बांदली अने देवदार ना बणला चीत्रा-रंगाळा कापड़ा ना पेट्या लावीन तारी ह़ाते लेण-देण कर्या। तर्सीस ना ढुंड्या तारा वेपार ना माल ने वयवा वाळा बण्या। “तीमनी लारे तु दर्या नी वच मे रीन घणु पोमतु अने बड़ाय वाळु हय ज्यु। तारा ढुंड्या चलाड़वा वाळा तने उंडला पाणी मे पुगाड़ देदला से, अने उगवणु नु वाहळु तने दर्या नी वच मे तोड़ नाखलु से। जे दाड़े तु डुबही, तीहयात दाड़े तारु धन-दवल्यत, वेपार नो माल, ढुंड्या वाळा, ढुंड्या चलाड़वा वाळा, जोड़ाय नु काम करवा वाळा, वेपारी माणहु, अने तारी मे जेतरा सीपायड़ा से, अने तारा आखा टोळा दर्या नी वच मे पड़ जहे। तारा ढुंड्या वाळा नी आड़वा नी अवाज ना कारण सी तारी आड़े-धेड़े नी जागा काप उठहे। आखा ढुंड्या चलाड़वा वाळा मल्लाह, अने दर्या मे जेतरा ढुंड्या वाळा रेय, तीहया आह़फा-आह़फाम ना ढुंड्या पोर गेथा उतरहे। अने तीहया धरती पोर उबा हय्न तारा बारा मे उची अवाज सी कलपी-कलपीन रड़हे। तीहया आह़फा-आह़फाम ना मुंडा पोर कादो नाखीन रोखड़ा मे ढबळहे; अने तारा दुख मे आह़फाम ना मुंडा बोड़ाय देहे, अने केड़्ये गोंटो बांदीन तीमना मन ना घणा दुख भेळ तारी जुगु रड़हे अने छाती ठोकहे। तीहया दुखी हयता जीन तारा बारा मे दुख नु आहयु गीत बणाय्न गावहे: ‘सोर ह़ेर जे हाव दर्या नी वच मे होगुथीन पड़ र्यु, तीनीन तेवु कानु ह़ेर से? जत्यार तारो माल दर्या मे गेथो नीकळतो हतो, ता ढेरेत राज्य आफरता हता; तारु धन अने वेपार नो माल घण-जादा हयवा सी धरती ना राजा पोमता हयता हता। जे टेमे तु तळ वगर नी दर्या मे लेहर वेर टुट्यु, तीहयी टेमे तारा वेपारु नो माल, अने तारा आखा रेवा वाळा बी तारी मोय रीन खत्तम हय ज्या। दर्या नी काठे देसु ना आखा रेवा वाळा तारा कारण सी वहराय ज्या; अने तीमना आखा राजाम ना नेहटा उबा हय ज्या, अने तीमना मोडा पोर बीक छवाय जी। देस-देस ना वेपारी तारा वीरोद मे तारा बारा मे भलु-बुरु की र्या; तु बीक नु कारण बण जेलु से अने अळतेण तु टेकलु नी री सके।’”
Source notes (1)
- Footnote चांदनी छाहळो करवा नु घटाळु करलु कापड़ु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.