Paliya Bible
नीरगमन 27
होम बादा नी वेदी
(नीरगमन 38:1-7)
“अळतेण वेदी ने बाबळ्या ना लाकड़ा नी, पांच हात नाम्बी अने पांच हात चवड़ी बणावजे; वेदी च्यार खुट्याण रेवा जोवे, अने तीहयी तीन हात उची रेवा जोवे। अने तीना च्यारो खुणा पोर च्यार ह़ींगड़ा बणावजे; वेदी अने ह़ींगड़ा एकीत टुकड़ा ना रेवा जोवे, अने तीने पीतळ वेर पालीस करावजे। अने तीनो रोखड़ो ह़ोरवा ना ठाहरा, अने पावड़्या, अने कटवरा, अने बे दात वाळा पावड़ा, अने ह़ुपड़्या बणावजे; तीनु आखु ह़मान पीतळ नु बणावजे। तीनी जुगु पीतळ नो जाळी नो एक झारो बणावजे; अने तीना च्यारोव मुंडे पीतळ ना च्यार कड़ा लगाड़जे। अने तीहया झारा ने वेदी नी च्यारो मेर नी कांगणी नी तळे आसम लगाड़जे के तीहयी वेदी नी उचाय नी वचे तक पुगे। अने वेदी जुगु बाबळ्या ना लाकड़ा ना डींगा बणावजे, अने तीमने पीतळ वेर पालीस करावजे। अने डींगा ने कड़ा मे घालजे के जत्यार-जत्यार वेदी ने उचले ता तीहया तीना बेम धेड़े रेय। वेदी ने पाट्या वेर पोलट्याण बणावजे; जेम तने आहया बड़ा पोर देखाड़ली से तेमेत बणवा जोवे।
चोखला तम्बु नु आंगणु
(नीरगमन 38:9-20)
“अळतेण रेवा ना जागा नु आंगणु ने बणावजे। तीनी दखणाव भणी पातळ्ळु सुती नु बणावलु कापड़ु ना पड़दा रेवा जोवे, तीनी लम्बाय ह़ोव हात नी रेवा जोवे; एक खुणा पोर एतरुत रेवा जोवे। तीमनी जुगु वीह़ खम्बा बणावजे, अने ईमनी जुगु पीतळ ना वीह़ पाञा बणावजे, पण खम्बा ना छल्ला अने तीमने जोड़वा वाळी पट्टी चांदी नी रेवा जोवे। अने आहयीत रीते आंगणु नी दखणाव भणीन नी लम्बाय मे बी ह़ोव हात नाम्बा पड़दा रेवा जोवे, अने तीमनी जुगु बी वीह़ खम्बा अने पीतळ ना वीह़ खाचा रेवा जोवे; पण खम्बा ना छल्ला अने तीमने जोड़वा वाळा पट्या चांदी ना रेवा जोवे। अळतेण आंगणु नी चवड़ाय जुगु बुडणली ह़ोड़ पचाह हात ना पड़दा रेवा जोवे, तीमनी जुगु खम्बा बी दह अने खाचा बी दह रेवा जोवे। उगवणी ह़ोड़ आंगणु नी चवड़ाय पचाह हात रेवा जोवे। आंगणु ना झापला नी एक ह़ोड़ पन्दरे हात पड़दा रेवा जोवे, अने तीमनी जुगु तीन खम्बा अने तीन खाचा बी रेवा जोवे; अने बीजी ह़ोड़ बी पन्दरे हात ना पड़दा रेवा जोवे, तीमनी जुगु बी तीन खम्बा अने तीन खाचा रेवा जोवे। आंगणु नु झापलु जुगु एक पड़दो बणावजे, जे नीळ्ळा, जामण्या अने रात्ला रंग नु कापड़ु अने पातळ्ळु सुती नु बणावलु कापड़ा नु ह़जाड़लु बणलु वीह हात नु रेवा जोवे, तीनी जुगु खम्बा बी च्यार अने खाचा बी च्यार रेवा जोवे। आंगणु ना च्यारो मेर ना आखा खम्बा चांदी ना पट्या ह़ाते जोड़ायला रेवा जोवे, तीमना छल्ला चांदी ना अने खाचा पीतळ ना रेवा जोवे। आंगणु नी लम्बाय ह़ोव हात नी, अने तीनी चवड़ाय पचाह हात नी, अने पड़दा नी उचाय पांच हात नी रेवा जोवे, तीना पड़दा पातळ्ळु सुती ना बणावला कापड़ा नो बणावजे, अने खम्बा ना खाचा पीतळ ना रेवा जोवे। रेवा ना जागा ना भाती-भाती ना ठाहरा अने आखु ह़मान अने तीना आखा खुटा अने आंगणु ना बी आखा खुटा पीतळनात रेवा जोवे।
दीवा नी देख-भाळ
(लेव्यवेवस्था 24:1-4)
“अळतेण तु ईस्रायली माणहु ने हुकम आपजे, के मारीन्तां दीवा जुगु कुचीन नीकाळलु जेतुन नु चोखलु तेल ली आवजो, जीनी सी दीवो लगत धपतो रेय। भगवान नी हजुरी नु तम्बु मे, तीहया वचे वाळा पड़दा सी बाहर जे गवा नी पट्टी नी अगळ रेहे, हारुन अने तीनो सोरो दीवा ने ह़ांता गेथा ह़वारे तक यहोवा नी अगळ ह़जाड़ीन राखे। आहयी रीती ईस्रायली माणहु नी पीड़ी जुगु जलम बणली रेहे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.