Paliya Bible
नीरगमन 22
नेम अने डंड
“कदीम कानो माणेह बोळद्यो, नीता गाडरु, नीता बोकड़ी चोरीन तीने मारे नीता वेच देय, ता तीहयो बोळद्या ना बदले पांच बोळद्या, अने एक गाडरु-बोकड़ु ना बदले च्यार-च्यार गाडरा-बोकड़ा भर देय। कदीम चोट्टु चोरी करत्ले धराय जाय, अने तीने एवी मार जड़े के तीहयो मर जाय, ता तीना खुन नो गुनो नी लागे; कदीम चोरी करती टेमे दाड़ु उग जाय, ता चोट्टु ने मारवा वाळा पोर तीना खुन नो गुनो लागे; अने तीहयु चोट्टु नक्खी से के तीहयु नुकसान ने भर देय, अने कदीम तीनी पांह कंय नी हय, ता तीहयु चोट्टु ने चोरी ना कारण सी वेच देवा जोवे। कदीम चोरी करलो बोळद्यो, नीता गदड़ु, नीता गाडरु, नीता बोकड़ु तीना हात मे जीवत्लु जड़े, ता तीहयो तीना बदले बे गुणा भर देय।
“कदीम कोय आह़फा ना ढुरु वेर काना नु खेतर नीता अंगुर नी वाड़ी चार देय, मतलब आह़फा ना ढुरु ने आसम छोड़ देय के तीहया बीजा ना खेतर मे खाय जाय, ता तीहयो आह़फा ना खेतर नी अने अंगुर नी वाड़ी नी वारली सी वारली कमाय मे गेथु तीहयु नुकसान ने भर देय।
“कदीम कानो आह़फा ना खेतर मे आक्ठु धपाड़े, अने तीहयु कटाळ्ळा मे लाग जाय अने फुलु ना ढेर नीता फसल नीता उबली मेर वाळु खेतर धप जाय, ता जे आक्ठु धपाड़्यु हय तीहयो नक्खी नुकसान ने भर देवा जोवे।
“कदीम कोय माणेह बीजा ना घोर पय्हा-टका नीता कंय बीजु चीज मेकवा करीन आपे, अने तीहयु तीना घोर गेथु चोराय जाय, ता कदीम चोट्टु धराय जाय ता तीहयु बे गुणा पासु आपहे। कदीम चोट्टु नी धराय, ता घोर ना मालीक ने भगवान ने तां लाव्वा जोवे जीनी सी पक्कु हय जाय के तीहयो आह़फा ना भाय-बेन्या नी चीज ने चोरी करलो से के नी। भले बोळद्यो, भले गदड़ा, भले गाडरा नीता बोकड़ा, भले लुगड़ा, भले एवी कानी भाती नी खोवायली चीज ना बारा मे गुनो काहा नी लगाड़े, जीने बेम जणा मारी से, मारी से केय, ता बेम जणा नो मुकदमो भगवान ने तां लावे, अने जीने भगवान गुनाळ्ळो ठेरावे तीहयो ह़ामने वाळा ने बे गुणा भर देय।
“कदीम कोय ह़ाते वाळा ने गदड़ु नीता बोळद्यो नीता गाडरा-बोकड़ा नीता काना अळी बीजा जानवर राखवा करीन ह़ोपे, अने कोय ना देख्या वगर तीहया मर जाय, नीता कंय घाव लागे, नीता गेरीन लीजती रेय, ता तीहया बेम जणा ने यहोवा नी ह़ाम खवाड़वा जोवे, के ‘मे आना माल-धन पोर हात नी लगाड़्यो’ ता माल-धन नो मालीक आने ह़ाची माने, अने बीजा ने तीने कंय बी भरवा नी पड़े। कदीम तीहयो ह़ाचलीन तीनीन्तां गेथो चोर्यो हय, ता तीहयो तीना मालीक ने तीनु नुकसान आप देय।1 अने कदीम तीने जंगली जानवर ना लारे मारी नाखे, ता तीहयो मारला जानवर नी सेलाणी देखाड़वा करीन लावे, अने तीने तीहयु भरवा नी पड़े।
“कदीम कानो माणेह आह़फा ना ह़ाते वाळा पांह एक जानवर उदार मांगीन लावे, अने तीनो मालीक नी रेय ता घाव लाग जाय नीता मर जाय, ता तीहयो तीनु नुकसान नक्खी भर देय। अने कदीम तीनो मालीक ह़ाते हय, ता बीजा ने तीनु नुकसान नी भरवा पड़े; अने तीहयु कदीम कीराया सी हय ता तीनु नुकसान तीना कीराया मे आय ज्यु।
नेती अने धारमीक नेम
“कदीम कानु माणेह कानी कुवारी सोरी ने, जीनी वेवा नी वात नी हयी हय, तीने वात मे फसाड़ीन तीनी ह़ाते गलत काम करे, ता तीहयो नक्खी तीनु देजु आपीन तीनी ह़ाते वेवा कर लेय। पण कदीम तीनो बाह तीने आपवा करीन कदी नी माने, ता गलत काम करवा वाळो सोरी नु देजु नी रीती नी अनसारे पय्हा भर देय।
“तु जादु-टोना करवा वाळा बयरा ने जीवत्ला नी रेवा देजे।2
“जे कोय जानवर ह़ाते ह़ीगी आवे एवु काम करे तीने नक्खी मार देवो।3
“जे कोय यहोवा ने छोड़ीन काना बीजा देवता नी जुगु बादा चड़ावे तीने खत्तम कर देवो।4
“तमु बीजा देस वाळा माणेह ने नी वेला पाड़जो अने नी तीने दमजो, काहाके मीस्र देस मे तमु बी बीजा देस वाळा हता।5 कानी रंडायली बयर ने नीता नमल्या सोरा ने दुख नी देजो। कदीम एवा ने तमु काना भाती नो दुख आपहु अने तीहया मने आड़हे, ता मे नक्खी तीमनु आड़नु ह़मळही; ता मारी रीह वदहे, अने मे तलवार वेर तमने मारही, अने तमारी लाडी रंडायली अने तमारा सोरा नमल्या हय जहे।
“कदीम तु मारा माणहु मे गेथा काना गरीब माणेह ने जे तारी ह़ाते रेतो हय पय्हा उदार आपे ता तीनी पांह मोट्ला माणहुन तेम वीयाज नी लेजे।6 कदीम तु कारु बी आह़फा ना ह़ाते वाळा ना लुगड़ा गीरवे राखी बी लेय, ता दाड़ु ने डुबते तक तीने पासु आप देजे;7 काहाके तीहयु तीनु एकीत ओडवा नु से, तीना डील नु तीहयु एखलुत लुगड़ु से; अने अळतेण तीहयो ह़ुने ओडीन ह़ुवहे? अने जत्यार तीहयो मने आड़हे ता मे तीनी ह़मळ लेही, काहाके मे गीणाळ्ळो से।
“भगवान ने गलत बोल नी केजे, अने नी आह़फा नी माणहु ना मुख्या ने सराप देजे।8
“तारा खेतर नी मेर अने फोळ ना रोह मे गेथु मने भेट चड़ाव्वा मे वार नी लगाड़जे। अने तारा पेल-खोळ्या सोरा ने मने आपजे। तेमेत तारा गाया अने गाडरा-बोकड़ा ना बी पेल्ला बच्चा ने मने आपजे; ह़ात दाड़ा तक ते सोरु आह़फा नी आय्ह ह़ाते रेय, अने आंठवा दाड़े तु तीने मने ह़ोप देजे।
“तमु मारा चोखला माणहु से; करीन जे जानवर बाहर तमने जंगली जानवर नी लारे मारलु जड़े तीनु मांह नी खाजो, तीने कुतरु अगळ नाख देजो।9
Source notes (9)
- Cross-reference उबजणाय कीताप 31:39
- Cross-reference वेवस्थावीवरन 18:10,11
- Cross-reference लेव्यवेवस्था 18:23; 20:15; वेवस्थावीवरन 27:21
- Cross-reference वेवस्थावीवरन 17:2-7
- Cross-reference नीरगमन 23:9; लेव्यवेवस्था 19:33-34; वेवस्थावीवरन 24:17-18
- Cross-reference लेव्यवेवस्था 25:35-38; वेवस्थावीवरन 15:7-11; 23:19,20
- Cross-reference वेवस्थावीवरन 24:10-13
- Cross-reference नेवताळा ना काम 23:5
- Cross-reference लेव्यवेवस्था 17:15
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.