Paliya Bible
नीरगमन 20
दह हुकम
(वेवस्थावीवरन 5:1-21)
ता भगवान आहया आखा बोलु केदो: “मे तारो भगवान यहोवा से जे तने पवराय ना घोर मतलब मीस्र देस, गेथो नीकाळ लावलो से।
“तु मने छोड़ीन कोय बीजा ने भगवान करीन नी मानजे।
“तु आह़फा जुगु कानी बी मुर्ती नी बणावजे, अने नी काना नी मुर्ती बणावजे, जे वादळा मे, नीता धरती पोर, नीता धरतीन हेटा पाणी मे से।1 तु तीमने ढुंगो वळीन नी वांदजे, अने नी तीमनो उपाह़ पाळजे; काहाके मे तारो भगवान यहोवा रीह राखवा वाळो भगवान से, अने जे मारी ह़ाते दुस्मनी राखे, तीमने अधरम नो डंड मे तीसरी अने चोवथी पीड़ी तक तीमनी अवल्यात ने डंड आप्या करु।2 पण जे मारी ह़ाते मोंग करे अने मारा हुकम ने माने, तीमनी हजारो पीड़ी पोर गीण कर्या करु।3
“तु आपणा भगवान नु नाम अमथो नी लेजे; काहाके जे यहोवा नु नाम अमथो लेय, तीने तीहयो वण-गुनाळ्ळो नी ठेरावे।4
“तु अराम ना दाड़ा ने चोखलो मानवा करीन फोम राखजे।5 छो दाड़ा तक तु मेहनत करीन तारु आखु काम-काज करजे;6 पण ह़ातवो दाड़ो तारा भगवान यहोवा जुगु अराम नो दाड़ो से। करीन तीहया दाड़े ते तु कानी बी भाती नु काम-काज नी करजे, अने नी तारा सोरा-सोरी, अने नी तारा पावर्या-पावर्याण अने नी तारा जानवर अने नी कोय बाहर गाम वाळा जे तारा फाटा सी मोय से।7 काहाके छो दाड़ा मे यहोवा ह़रग, अने धरती, अने दर्या, अने जे कंय तीनी मे से आखु ने बणायो, अने ह़ातवा दाड़े अराम कर्यो; करीन यहोवा अराम ना दाड़ा ने बरकत आप्यो अने तीने चोखलो ठेरायो।8
“तु आह़फा ना आय्ह-बाहा नी ईज्जत करजे, जीनी सी जे देस तारो भगवान यहोवा तने आपे तीनी मे तु घणा दाड़ा तक री सकही।9
“तु खुन नी करजे।10
“तु छीनाळु नी करजे।11
“तु चोरी नी करजे।12
“तु कोय ना वीरोद मे झुटी गवाय नी देजे।
“तु कोयना घोर नी लालच नी करजे; अने नी काना नी बयर नी लालच करजे, अने नी काना ना पावर्या-पावर्याण नीता बोळद्या-गदड़ा नी, अने नी काना नी कानी चीज नी लालच करजे।”13
माणहु नु बीहणु
(वेवस्थावीवरन 5:22-33)
जत्यार आखा माणहु वादळा नी गाज अने वीजळी अने फेपार्या नी अवाज ह़मळता, अने बड़ा पोर धुकरो उडत्लो देखता र्या, ता देखीन, कापवा बाज ज्या अने सेटा-सेटा उबा हय ज्या;14 अने तीहया मुसा ने केवा बाज ज्या, “तुत अमारी ह़ाते वात कर ता ते आमु ह़मळ सकहु; पण भगवान ने अमारी ह़ाते वात ना करवा देय, आसम नी हय जाय के आमु मर जीया।”15 मुसो माणहु ने केदो, “बीहो ना; काहाके भगवान आनीन करते आवलो से के तमने पारखे, अने तीनी बीक तमारा मन मे रेय के तमु पाप नी करो।” पण तीहया माणहु सेटात उबा र्या अने मुसो तीहयु घण जबर अंदारलु नी ह़ाते ज्यो जां ह़ारीक भगवान हतो।
वेदी ना बारा मे नेम
ता यहोवा मुसा ने केदो, “तु ईस्रायली माणहु ने मारा आहया बोल ह़मळाव: तमु आह़फात देखला से के मे तमारी ह़ाते ह़रग मे गेथो वात करलो से। मने छोड़ीन भक्ती जुगु, मतलब आह़फाम नी जुगु चांदी नीता ह़ोनु वेर देवताम ने नी बणावजो। तु मारी जुगु कादा नी एक वेदी बणावजे, अने तारा बोकड़ा-गाडरा अने गाय-बोळद्या जुगु होम बादा अने मेल-मीलाप नी बादा ने तीनी पोर चड़ावजे; आखा जागा मे जां मे मारा नाम नी फोम करावु तां-तां मे आवीन तमने बरकत आपही। अने कदीम तमु मारी जुगु दगड़ा नी वेदी बणावो, ता घड़ला दगड़ा वेर नी बणावजो; काहाके जां तमु तीनी पोर खुद ना हत्यार लगाड़्या तां तमु तीने वीटाळ देहु।16 अने तु मारी जुगु पयड़ी वाळी वेदी नी बणावजे, कंय माय्न आसम नी हय जाय के तारु डील तीनी पोर नांगरलु देखाव पड़े।
Source notes (16)
- Cross-reference नीरगमन 34:17; लेव्यवेवस्था 19:4; 26:1; वेवस्थावीवरन 4:16
- Cross-reference नीरगमन 34:17; लेव्यवेवस्था 19:4; 26:1; वेवस्थावीवरन 7:9
- Cross-reference वेवस्थावीवरन 7:9
- Cross-reference लेव्यवेवस्था 19:12
- Cross-reference नीरगमन 31:13
- Cross-reference नीरगमन 23:12; 34:12; 35:2; 31:15; लेव्यवेवस्था 23:3; 5:13
- Cross-reference नीरगमन 23:12; लेव्यवेवस्था 23:3
- Cross-reference उबजणाय कीताप 2:1-3; नीरगमन 31:17
- Cross-reference लेव्यवेवस्था 19:3; वेवस्थावीवरन 27:16; मत्ती 15:4; 19:19; ईफीसीयो 6:2,3
- Cross-reference उबजणाय कीताप 9:6; लेव्यवेवस्था 24:17; मत्ती 5:21; रोमीयो 13:9; याकुब 2:11
- Cross-reference लेव्यवेवस्था 20:10; मत्ती 5:27
- Cross-reference लेव्यवेवस्था 19:11
- Cross-reference रोमीयो 7:7; 13:9
- Cross-reference ईब्रानीयो 12:18
- Cross-reference ईब्रानीयो 12:18-19
- Cross-reference वेवस्थावीवरन 27:5; यहोसु 8:31
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.