Paliya Bible
ईफीसीयो 5
वीजाळु नी अवल्यात बणो
करीन मोंगाळ्ळा सोरान तेम भगवान पसळ चालवा वाळा बणो, अने मोंग मे चालो जीसम मसी बी तमारी ह़ाते मोंग कर्यो, अने तीहयो अमारी जुगु भगवान अगळ आह़फा ने ह़वादली गंद ना वेह मे भेट अने बादा चड़ाय नाख्यो जे भगवान ने खुस करे।1
जीसम के चोखला माणहु जुगु वारु से, तेमेत तमारी मे छीनाळु अने काना भाती ना वीटळ्ळा कामु अने लालच नी वात लग नी हयवु जोवे। अने नी वण-लाज्याण, नी वण-अकल्याण वात कर्या, नी उपाह़ पाळ्या, काहाके आहयी वात ह़ोबा नी देय, पण भगवान ने वारु केवु जोवे। काहाके तमु आहयु जाणो के काना बी छीनाळ्या, वीटळ्ळा माणहु, अने लालच्या से, जे मुर्ती पुजा करवा वाळा बराबर से तीमने कदी बी मसी अने भगवान ना राज मे वाटो नी जड़े।
कोय बी तमने फाल्तु वातु मे धोको नी देवा जोवे, काहाके आहयात कामु ना कारण सी हुकम नी मानवा वाळा पोर भगवान नी रीह आवे। करीन तमु तीमना साजल्या ना बणो। काहाके तमु पेले अंदारला मे हता पण हाव मालीक मे वीजाळु से, ता तमु वीजाळु नी अवल्यात ने तेम चालो। काहाके वीजाळु 2नो फोळ आखी भाती नी भलाय, अने धरमपणु, अने सच्चाय से। अने आहयो पतो लगाड़ो के मालीक ने ह़ु खुस करे। अंदारलु ना फाल्तु कामु ना साजल्या ना बणो, पण तीमनी बुराय ने उजन्ती करो। तीमना कामु ना बारा मे ते वात करवा बी लजवायवा नी वात से, जे हुकम नी पाळवा वाळा ह़ताय्न करे। अने जत्यार आखा चीजु ने वीजाळा मे लावे, ता तीनो खास सोभाव पुरी रीती सी उजन्तो हय जाय; पुरी रीती सी उजन्ती हयवा वाळी चीज खुद वीजाळु बण जाय। आहया कारण सी तीहयो केय,
“ए ह़ुव्वा वाळा जागो,
अने मरला मे गेथा जीवी उठो;
ता मसी नु वीजाळु तमारी पोर पपलहे।”
करीन ध्यान सी देखो, के केवी चाल, चाल र्या: वण-अकल्या नी तेम नी पण अक्कल वाळा नी तेम चालो। 3आखा मोखा नो जादा सी जादा फायदो उठावो काहाके आहया दाड़ा काठला से।4 एतरे वण-अकल्या ना बणो, पण ध्यान सी ह़मजो के मालीक नी मरजी ह़ुं से।
ह़रु सी ना छाको, जे तमने नीस्तु बरबात करहे, पण चोखली आत्मा सी भराय जावो। 5आत्मा सी गीत अने भजन अने बड़ाय ना गीतु सी एक-बीजा ह़ाते वात कर्या करो। अने आपणा मन मे मालीक ना लेदे गावता अने बड़ाय करता रेवो। अने हमेसा आखी चीज ना लेदे आपणा मालीक ईसु मसी ना नाम सी भगवान बाह ने घणो वारु कीया करो।6 मसी नी बीक ना कारण सी एक-बीजा नी ह़ाते रेवो।
मसी घोराणा ना लेदे कायदा
ए लाड्या, आह़फा ना लाडा ने खुद ने तीसमेत ह़ोपो जीसम तमु मालीक ने ह़ोपो।8 काहाके घोरवाळो घोरवाळी नु मुंडु से जीसम के मसी मंडळी नु मुंडु से अने आह़फोत डील नो छुटकारो आपण्यो से। पण मंडळी जीसम मसी ने ह़ोपे, तीसमेत लाड्या बी आखी वात मे खुद ना लाडा ने ह़ोपवा जोवे। 9
ए लाडा, खुद नी लाडी सी मोंग करो जीसम मसी बी मंडळी सी मोंग कर्यो अने आह़फा ने तीना लेदे आप देदो।10 तीहयो आह़फा ना बोल सी मंडळी ने भगवान ना ह़ात मे ह़ोपवा ना लेदे बोल ना पाणी वेर धोय्न पाप गेथो अलग करीन चोखो कर देदो। काहाके तीहयो एक आसवी मंडळी आह़फा अगळ उबी करवा हींडतो हतो जे घटाळी हय, जीनी मे नी डाग हय, नी चीमायली अने नी कोय बीजो गुनो हय, पण जे चोखली अने वण-गुनाळ्ळी हय। के लाडा ने खुद नी लाडी सी तीसमेत मोंग करवु जोवे। जीसम तीहयो आह़फा ना डील ने करे। एक अदमी जे खुद नी लाडी ने मोंग करे तीहयो आह़फा सी मोंग करे। काहाके काना बी आह़फा ना डील ह़ाते रीह नी राखे पण तीने पाळे-पोहे, जीसम मसी बी मंडळी ह़ाते करे। आनीन करते के आमु तीना डील नो वाटो से। “जीसम के सास्तर केय, अदमी आह़फा ना आय्ह-बाहा ने सोड़ीन आह़फा नी घोरवाळी ह़ाते मेळीन रेहे, अने तीहया बेम एक डील हय जहे।”11 आहयी ते घण-जबर खास वात से, पण मे आञे मसी अने मंडळी ना बारा मे वात केम। पण तमारी मे गेथो एक-एक जणो तमारी लाडी सी आह़फा नी तेम मोंग करवु जोवे, अने हरेक लाडी ने बी आह़फा ना लाडा नी ईज्जत करवु जोवे।
Source notes (11)
- Footnote नीरगमन 19:18; भजन सहीता 40:6
- Footnote काना-काना कीताप्या मे आत्मा बोल आवलु से
- Cross-reference कुलुस्यो 4:5
- Footnote कुलुसीयो 4:5
- Cross-reference कुलुस्यो 3:16,17
- Footnote कुलुसीयो 13:16,17
- Cross-reference कुलुस्यो 3:18; 1 पतरस 3:1
- Footnote कुलुसीयो 3:18; पतरस 3:1
- Cross-reference कुलुस्यो 3:19; 1 पतरस 3:7
- Footnote कुलुसीयो 3:19; 1 पतरस 3:7
- Footnote उबजणाय कीताप 2:24
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.