Paliya Bible
सभोपदेसक 4
ता में आहयी कळी मे हयवा वाळी आखी वेला ने देख्यो, गरीब माणहु रड़ी र्या हता, अने कोय बी तीमनी मदत नी करता हता, अने तीमनी कोय बी मदत नी करे काहाके तीमने वेला पाड़वा वाळा पांह ताखत हती। करीन तीहया जीवत्ला गेथा जे हजु तक जीवत्ला से तीमने छोड़ीन में तीहया मरला ने जे मर जेला से जादा वारु मानु। आहया बेम माणहु गेथा तीहया माणहु वारु से, जे कदी पयदा नी हया, अने आहयी धरती पोर बुरा काम कदी देख्या नी। में आहयु बी देख्यो, के माणहु पामता हयवा ना लेदे एतरी मेहनत काहा करे? काहाके माणहु आपणा आड़े-धेड़े वाळा सी जळण ना कारण करे, पण आहयु बी फालतु से अने वाहळु धरवान तेम से। वण-अकल्यो माणेह हात पोर हात मेकीन बह रेय, अने तीहयो खुद ने बरबात करे। मुठ भरीन नो सुक तीहयी बे मुठ मेहनत गेथो वारु से, जे मानो वाहळु ने धरवान तेम से। अळी में धरती पोर आहयी बी फालतु वातु ने देख्यो। कोय एखलो रेय अने तीनु कोय नी हय; नी तीनो सोरो हय, नी तीनो भाय हय, ते बी तीनी मेहनत कदी खत्तम नी हये; नी तीना डोळा धन सी आफरे; अने नी तीहयो केय के में कोय ना लेदे मेहनत कर र्यो, अने काहा खुद ने सुक-सांती सी सेटो कर र्यो? आहयु बी फालतु से। अने दुख भरलु काम से। एक सी बे वारु से, काहाके तीमनी मेहनत नो वारु फोळ जड़े। काहाके कदीम तीमनी मे गेथो एक पड़े, ता बीजो तीने उठाड़हे; पण दुख तीनी लेदे से जे एखलो से, तीहयो पड़े ता तीने कोय उठाड़हे? अळी कदी बे जणा भेळा ह़ुवे ता तीहया उन्ला रेहे, पण कोय एखलो उनो कीसम हय सके? कदी कोय एखला ने देय ता तीहयो तीने बदाड़ लेय, पण बे जणा तीने नी माने। जे दोरी तीन ह़ेर वेर बंदायली रेय तीहयी सोटी नी टुटे। अक्कल वाळो जुवान गरीब हयवा पोर बी एवा डायला अने वण-अकल्या राजा सी जादा वारु से, जे चेतावणी ने नी माने। हय सके के तीहयो जुवान जेल मे गेथो राजा ना जागा पोर आयो हय नीता हय सके के तीहयो तीना राज्य मे गरबाय मे पयदा हयो हय। में धरती पोर फीरत्ला आखा जीवत्लाम ने तीहया बीजा जुवान भणीन जत्ला देख्यो, जे पेले वाळाम नो जागो हात करहे। तीहया आखा माणहु गीणाय नी एतरा हता जीमनो तीहयो मुख्यो बणलो हतो। ते बी अगा हयवा वाळा माणहु तीना कारण खुस नी हये। आहयु बी फालतु अने वाहळु ने धरवान तेम से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.