Paliya Bible
सभोपदेसक 3
आखा कामु नी टेम टकायली से
एकीक वातु नो एक मोखो अने हरेक कामु नु, जे धरती पोर हये, एक टेम से। पयदा हयवा नी बी टेम से अने मरवा नी बी टेम से; वेरवा नी बी टेम से अने उखड़वा नी बी टेम से; मारवा नी बी टेम से अने आरगा करवा नी बी टेम से; ओदारवा नी बी टेम से अने बणाव्वा नी बी टेम से; रड़वा नी बी टेम से अने हाह़वा नी बी टेम से; दुखी हयवा नी बी टेम से अने नाचवा नी बी टेम से; दगड़ा नाखवा नी बी टेम से, अने दगड़ा एक्ठा करवा नी बी टेम से; गळे लगाड़वा नी बी टेम से अने गळे लगाड़वा सी रोकायवा नी बी टेम से; ह़ोदवा नी बी टेम से, अने खोय देवा नी बी टेम से; बचाड़ीन राखवा नी बी टेम से अने नाख देवा नी बी टेम से; फाड़वा नी बी टेम से, अने ह़ीव्वा नी बी टेम से; होगा रेवा नी बी टेम से, अने बोलवा नी बी टेम से; मोंग करवा नी बी टेम से, अने ह़ीगी करवा नी बी टेम से; लड़ाय नी बी टेम से, अने हेळ-मेळीन रेवा नी बी टेम से। काम करवा वाळा ने आह़फा नी मेहनत सी ह़ु फायदो हये? में देखलो से के भगवान माणेह पोर केतरो बोज नाखलो से। तीहयो एक-एक चीज ने तीमनी जुगु संय टेम पोरेत बणावलो से। तीहयो माणहु ना मन मे अमरकाय ना ग्यान ने ह़मजवा नी ताखत आप्यो, ते बी माणेह नी ह़मज सके के भगवान सुरु गेथो आखरी तक ह़ु करलो से। में जाण लेदो के माणहु ना लेदे खुसी मनाव्वा अने जीवाय भर भलाय करवा ने छोड़ीन बीजु कंय बी वारु नी हय; अने आहयो बी भगवान नो दान से के माणहु खाय-पीय अने आपणी आखी मेहनत मे सुक सी रेय। में जाणु के जे कंय भगवान करे तीहयु सदा टेकीन रेय; नी ते कंय तीनी मे बड़ाय सके अने नी कंय तीनी मे घटाय सके; भगवान आसम आनी लेदे करे के माणहु तीनी सी बीहे। जे कंय हयु तीहयु पेले बी हय चुक्यु; जे हयवा वाळु से तीहयु बी हय चुक्यु; अने भगवान वीतली वात ने अळी करे।
दुनीया मे संय नीयाव नी जड़नु
अळी में धरती पोर देख्यो के नीयाव ना जागे संय नीयाव नी हय र्यो, अने वारला कामु ना जागे बी गलत काम हय र्या। में मन मे केदो, “भगवान धरमी अने वण-धरमी बेम नो नीयाव करहे,” काहाके तीनीन तां एकीक वात नी अने एकीक काम नी टेम से। में मन मे केदो, “आहयु आनी लेदे हये के भगवान माणहु ने पारखे के तीहया देख सके के तीहया जानवरुन तेवा से।” काहाके जेवी माणहु नी हालत से तेवीत जानवरु नी बी हालत रेय; बेम नी तीहयीत हालत से, जीसम एक मरे तेमेत बीजो बी मरे। आखा नी ह़ाह़ ह़रकी से, अने माणेह जानवर सी कंय बी बड़ीन नी हय; आखु कंय फालतु से। आखा आखरी मे एकीत जागा मे जाय; अने आखा कादा ना बणला से, अने आखा कादा मे पासा मेळाय जहे। ह़ु माणहु नो जीव उपरली ह़ोड़ चड़े अने जानवरु नो जीव हेटो जाय्न धोळा मे मेळाय जाय? आहयु कोय जाणे? में आहयु बी देख्यो के आनी सी जादा कंय बी वारु नी हय के माणेह आपणा कामु मे खुस रेय काहाके तीनो वाटो आहयोत से; कानो माणेह मरवान अळतेण तीने पासो जीवाड़ीन अगी हयवा वाळी वात देखाड़ सके।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.