वेवस्‌थावीवरन 33

मुसा ईस्‌रायल ना कुळ ने बरकत आपे

1जे बरकत भगवान नो माणेह मुसो आपणी मोत नी पेले ईस्‌रायली माणहु ने आपलो हतो, तीहयी आहयी से।

2मुसो केदो, मालीक सीने बड़ा सी आयो,

तीहयो सेईर देस सी अमारी पोर उजन्‌तो हयो,

तीहयो पारान बड़ा सी आह़फा नु वीजाळु देखाड़्‌यो,

तीहयो लाखु चोखला माणहुम नी वचे सी आयो।

तीना जमणा हात मे धपत्‌ला नेम नीकळ्‌या ।

3तीहयो पक्‌को आखा माणहु सी मोंग करतो हतो;

तीना चोखला माणहु तीनी रखवाळी मे हता;

पण तीहया तीनी पोगु नी ह़ाते बहीन;

तीना बोलु सी तीमने संय वाट जड़ी।

4मुसो आमने कायदा आप्‌यो,

अने तीहया याकुब नी मंडळी नो हीस्‌सो ठेर्‌या।

5जत्‌यार ईस्‌रायल ना घोराणा अने मुख्‌या माणहु एक्‌ठा हया,

तत्‌यार यहोवा यसुरुन मे राजा बण्‌यो।

6मुसा रुबेन ना घोराणा ना बारा मे केदो,

“रुबेन कदी नी मरे,

काहाके तीना माणहु थोड़ाक से।”

7अने यहुदा पोर आहयी बरकत हयी जे मुसा केदो,

“ए यहोवा, तु यहुदा नी ह़मळ,

अने तीने तीना माणहुन तां पुगाड़।

तीहयो आह़फा नी लेदे आह़फो खुद ना हात सी लड़्‌यो,

अने तुत तीना दुस्‌मन ना वीरोद मे तीनो मदत करन्‌यो से।”

8अळी लेवी ना बारा मे तीहयो केदो,

“तारा तुम्‌मीम अने उरीम तारा भगत नी पांह से,

जीने तु मस्‌सा मे पारख लेदो,

अने जीनी ह़ाते मरीबा नाम ना झोर पोर तारी झटा-पटी हयी;

9तीहयो ते आपणा आह्‌य बाहा ना बारा मे केदो,

में तीमने नी जाणतो;

अने नी ते तीहयो आपणा भायु ने आपणा मान्‌यो,

अने नी आपणा सोरा ने ओळख्‌यो। काहाके तीहया तारी वात मान्‌या, अने तीहया तारा वायदा ने मान्‌या।

10तीहया याकुब ने तारा नेम, अने ईस्‌रायल ना माणहु ने तारा कायदा ह़ीकाड़हे;

अने तारी अगळ धुप, अने तारी वेदी पोर आख्‌ला जानवर नी बादा चड़ावहु।

11ए यहोवा, तीना धन पोर बरकत आप,

अने तीना हातु नी सेवा ने आवरी ले;

तीना वीरोदी अने वेरी नी केड़ पोर आसम दे के

तीहया अळी नी उठ सके।”

12अळी तीहयो बीन्‌यामीन ना बारा मे केदो,

“यहोवा नो तीहयो मोंगाळ्‌ळो माणेह,

तीनी पांह बीह्‌या वगर रेहे; अने मालीक आखो दाड़ो तीनी रखवाळी करहे,

अने तीहयो तीमनी वचे रेहे।”

13अळी युसुफ ना बारा मे तीहयो केदो,

“आनु देस यहोवा सी बरकत हात करे,

पाणी अने धरतीन तळे हेटा ना झोर आने जड़े।

14अने दाड़ा ना पकाड़ला वारला फोळ नु बरकत जड़े,

अने वारली मेर जे टेमे-टेमे पाके,

15अने पेल्‌ना बड़ा नी वारला चीज, अने आड़ा-बुड़ा ना पेल्‌ना बड़ा ना वारला फोळ,

16यहोवा नी भलाय सी जुगाळो से,

जे धपत्‌ला झाड़ मे गेथो बोल्‌यो,

तीनी जागा आखु कंय सी भराय जाय,

युसुफ ना घोराणा मे आहयी बरकत आवे,

काहाके तीहयो तीना भायुम नी मे मुख्‌यो हतो।

17युसुफ नी पांह एक बोळद्‌या नी ताखत से,

अने एक जंगली बोळद्‌या ना ह़ींगड़ान तेम से,

तीना ह़ींगड़ा मनस्‌से ना हजार

अने एप्‌रेम ना लाखो लाख से।

तीनी लारे तीहयो आड़जात्‌याम ने नहाड़ देहे

अने तीमने धरती नी छेव तक धकल देहे।”

18अळी जबुलुन अने ईस्‌साकार ना घोराणा ना बारा मे केदो:

“जबुलुन दर्‌या ना वेपार मे वदे

अने ईस्‌साकार नु धन घोर मे वदे।

19तीहया देस-देस ना माणहु ने बड़ा पोर बोलावहे;

अने वारली बादा चड़ावहे।

तीहया आपणु धन दर्‌या सी

अने धेड़े नी बालुरेत ह़तायलु खजानु हात करहे।”

20अळी गाद ना घोराणा ना बारा मे केदो,

“जुगाळो तीहयो से जे गाद ने वदाड़े!

गाद ते नाहरनीन तेम रेय, अने हात ने चीर देय

अने मुंडा ने फाड़ देय।

21तीहयो आपणी जुगु धरतीन आखा मे वारलु ली लेदो;

एक नेता नो वाटो तीने आप देदा।

जत्‌यार ईस्‌रायल ना मुख्‌या माणहु एक्‌ठा हये,

तत्‌यार तीहया यहोवा ना हुकमु अने कायदा नो पाळण कर्‌या।”

22अळी तीहयो दान ना घोराणा ना बारा मे केदो,

“दान ते बासान गेथा कुदवा वाळा नाहर ना बच्‌चा से।”

23अळी नप्‌ताली ना घोराणा ना बारा मे केदो,

“ए नप्‌ताली, तु जे यहोवा सी खुसी सी आफरलो से,

अने तीनी बरकत सी भरपुर से, तु बुडवणा अने दखवरा देस ना हकदार्‌या हये।”

24अळी आसेर ना घोराणा ना बारा मे केदो,

“आसेर सोरा ना बारा मे बरकत हात करे;

तीहयो आह़फा भायु मे मोंगाळ्‌ळो रेय,

अने तीनी जागा मे तेल वये।

25तीना ह़ेर लुहड़ा ना झापला सी बचला रेय,

अने तारी सक्‌ती उमर खाहड़ा तक बणीन रेय।”

26ए यसुरुन, कोय बी देवता तारा भगवान ने तेम नी हय,

तीहयो तारी मदत करवा करीन ह़रग पोर,

अने आह़फा नो जोर देखाड़तो जीन बहीन आवे।

27भगवान हमेसा सी तने बचाड़वा वाळो से,

तीना राज करवा वाळा हात तमारो सहारो से,

तीहयो दुस्‌मन ने तारी सामने सी नीकाळ देय,

अने केय तीमने खत्‌तम कर दे।

28याकुब नी अवल्‌यात बीह्‌या वगर रेय,

अन अने अंगुर नो रोह सी भरलु देस मे बचला रेय,

जां ह़रग सी झाकळु धरती ने पाणी आपे।

29ए ईस्‌रायल, तु केतरो जुगाळो से!

ए यहोवा सी छुटकारो हात करला माणहु,

तारीन तेवु कोय से?

तीहयो ते तारी मदत नी लेदे ढाळ,

अने तारा जोर नी लेदे तलवार से;

तारा दुस्‌मन तारी वात करहे,

अने तु तीमना उचला जागा ने कचरी देही।