Paliya Bible
वेवस्थावीवरन 31
यहोसु मुसा नो बाद अगवाय करन्यो
मुसो जाय्न आहयी वात आखा ईस्रायली माणहु ने ह़मळायो। अने तीहयो तीमने आहयु बी केदो, “आज में एक ह़ोव वीह साल नो से; अने हाव मे चाल-फीर नी सकतो; काहाके यहोवा मने केदलो से, के तु आहयी यरदन नंदीन पार नी जाय सके। तारी अगळ पार जवा वाळो तारो भगवान यहोवात से; तीहयो तीहया देसु ने खत्तम करहे, अने तु तीमना देस नो हकदार्यो हयही; अने यहोवा ना बोल नी अनसारे यहोसु तारी अगळ-अगळ पार जहे। अने जे रीते यहोवा एमोरीयो ना राजा सीहोन अने ओग अने तीमना देस ने खत्तम करलो से, तीहयीत रीती तीहयो तीहया आखा देसु ने खत्तम करहे। अने जत्यार यहोवा तीमने तमारी सी हराय देहे, तत्यार तमु तीहया आखा हुकमु नी अनसारे तीमनी सी वेहवार करजो जे में तमने हुकम आपलो से। तु हीम्मत राख अने टणको हय, तीमनी सी ना बीहे अने ना घबराये; काहाके तारी ह़ाते चालवा वाळो तारो भगवान यहोवा से; तीहयो तने धोको नी आपे अने नी सोड़े।”
तत्यार मुसो यहोसु ने बोलावीन आखा ईस्रायली माणहु नी अगळ केदो, “तु हीम्मत राख अने टणको हयजा; काहाके आहया माणहु नी ह़ाते तीहया देस मे जीने यहोवा ईमना आड़ा-बुड़ा सी ह़ाम खाय्न आपवा करीन केदलो हतो तु जही; अने तु ईमने तीमनो हकदार्यो कर देही। अने तारी अगळ-अगळ चालवा वाळो यहोवा से; तीहयो तारी ह़ाते रेहे, अने नी ते तने धोको देय अने नी तने छोड़े; आनीन करीन ना बीहे अने मन मे ना सोचे के नी जड़े।”
ह़ातवा साल कायदा ने भणवा
अळतेण मुसो आहयात कायदा लीखीन लेवी पुंजाराम ने, जे यहोवा ना वायदा ना बाक्सा उचलवा वाळा हता, अने ईस्रायल ना आखा डायला माणहु ने ह़ोप देदो। तत्यार मुसो तीमने हुकम आप्यो, “ह़ात-ह़ात साल वीतवा पोर, मतलब करजो माफी ना साल मे छापरी ना तीवार पोर, जत्यार आखा ईस्रायल ना माणहु तारा भगवान यहोवा ना तीहया जागा पोर जीने तीहयो टाळ लेहे आवीन एक्ठा हये, तत्यार आहया कायदा आखा ईस्रायल ना माणहु ने भणीन ह़मळावजे। तमु आखा माणहु ने, अदमी-बयरा, सोरा अने तमारा गाम मे रेवा वाळा बीजा देस ना रेवा वाळा, आखा माणहु ने एक्ठा करजे के तीहया ह़ीके, अने तमारा भगवान यहोवा नी बीक मानीन, आहया कायदा ना आखा बोलु ने पाळवा मे चेतीन रेहे, अने तीमना सोरा जे आहयी वात नी ह़मळ्या तीहया बी ह़मळीन ह़ीके, के तमारा भगवान यहोवा नी बीक तीहयी टेमे लग मान्ता रेय, जत्यार लग तमु तीहया देस मे जीवत्लो रेय जीनो हकदार्यो हयवा करीन तमु यरदन नंदी नी पार जवा बाज र्या।”
मुसा ने यहोवा आखरी हुकम आपे
अळतेण यहोवा मुसा ने केदो, “तारो मरवा नो दाड़ो ह़ाते से; तु यहोसु ने बोलाव, अने तमु बेम मळवा वाळा तम्बु मे आवीन हजुर हयो के में तीने तारा जागा पोर टाळु।” तत्यार मुसो अने यहोसु जाय्न मळवा वाळा तम्बु मे हजुर हया। तत्यार यहोवा तीहया तम्बु मे वादळा ना खम्बा मे हय्न दर्सन आप्यो; अने वादळा नो खम्बो तम्बु ना झापला पोर उबो हय ज्यो।
तत्यार यहोवा मुसा ने केदो, “तु ते तारा आड़ा-बुड़ाम नी ह़ाते मरीन मेळ जवा वाळो से; अने आहया माणहु तीहया देस ना बीजा देवताम नी पसळ, जीमनी वचे तीहया जाय्न रेहे, अने छीनाळ्या हय जहे, अने मने छोड़ीन तीहया वायदा ने जे में तीमनी सी करलो से तोड़ देहे। तीहयी टेमे मारी रीह ईमनी पोर भड़कहे, अने में बी ईमने सोड़ीन ईमनी सी मारु मोडु ह़ताड़ लीही, तीमनी पोर वेला अने दुख नो बड़ो आय पड़हे, जीमना कारण सी तीहया दाड़े आहयु केहे, ह़ु आहयु ह़ाचलीन नी हय के आहयी वेला अमारी पोर आनीन करते आय पड़ली से, के अमारो भगवान अमारी वचे नी हय?” तीहयी टेमे में तीहयी आखी बुराय ना कारण जे आहया बीजा देवता भणी वळीन करहे, ह़ाचलीन में तीमनी भणी गेथु मोडु फीरवी लीही।
“एतरे हाव तमु आहयु गीत लीख लेवो, अने तु आने ईस्रायली माणहु ने ह़ीकाड़ीन फोम कराड़ देजे, आनीन करीन के आहयु गीत तीमना वीरोद मे मारी गवाय ठेरे। जत्यार में तीमने दुद अने मोद नी नंदी वाळा देस मे पुगाड़ देही, जीनी ह़ाम में तीमना आड़ा-बुड़ा सी खादलो हतो, अने जत्यार तीहया आफरीन खाय्न आफरी जहे, तीमना डील पोर चर्बी चड़ जहे, तत्यार तीहया बीजा देवताम नी भणी फीरीन तीमनी पुजा करहे। तीहया मारु नामबद्दी करीन मारा वायदा ने तोड़ देहे। अने तीमनी पोर घणी-जुदी वेला आय पड़हे, तत्यार बी आहयु गीत गावहे, अने आहयु तीमनी वीरोद मे गवा देहे। हाव बी, आनी सी पेले के मे तीमने तीहया देस मे लीन जाम जीने आपवा नु मे वायदो करलो हतो, मे जाणत्लो से के ते ह़ु सोच र्या।”
तत्यार मुसा तीहया दाड़े आहयु गीत लीखलो अने ईस्रायल माणहु ने ह़ीकाड़ देदो।
अने यहोवा नुन ना सोरा यहोसु ने आहयो हुकम आप्यो, “हीम्मत राख अने टणको हय, काहाके ईस्रायल ना माणहु ने तीहया देस मे जीने तीने आपवा नी में ह़ाम खादलो से तां तु पुगाड़ही; अने में आह़फो तमारी ह़ाते रेही।”
जत्यार मुसा आहया कायदा ना बोलु ने, सुरुवात सी आखरी लग कीताप मे लीख लेदो, तत्यार तीहयो यहोवा ना वायदा ना बाक्सा ने उचलवा वाळा लेवीम ने हुकम आप्यो, “कायदा नी आहयी कीताप ने लीन आपणा भगवान यहोवा ना वायदा ना बाक्सा नी ह़ाते मेक देवो, के आहयी तां तमारी पोर गवाय आपती रेय। काहाके तारो वीरोद अने हेट मने मालम से; देखो, मने जीवत्लो अने ह़ाते रेते बी तमु यहोवा सी वीरोद करता आय र्या; अळी मारी मरवा नी बाद ह़ु का नी करो? तमु आपणा घोराणा ना आखा डायला माणहु अने मुख्याम ने मारीन्तां एक्ठा करो, के में तीमने आहयो बोल ह़मळावीन तीमना वीरोद मे ह़रग अने धरती बेम ने गवा बणावु। काहाके मने मालम से के मारी मोत नी बाद तमु ह़ाचलीन बगड़ी जहु, अने जे वाट मे चालवा नो हुकम मे तमने ह़मळावलो से तीनी बी तमु छोड़ देहु; अने आखरी ना दाड़ा मे जत्यार तमु तीहयो काम करीन जे यहोवा नी नींगा मे बुरु से, आपणी बणावली चीजु नी पुजा करीन तीने रीह देवाड़हु, तत्यार तमारी पोर वेला आय पड़हे।”
मुसा नु गीत
तत्यार मुसा ईस्रायल ना माणहु ने आहया गीत ना बोल ने सुरुवात सी आखरी लग कीन ह़मळायो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.