Paliya Bible
वेवस्थावीवरन 27
दगड़ा पोर लीखला भगवान ना नेम
अळतेण ईस्रायल ना डायला माणहु भेळ मुसा माणहु ने आहयो हुकम आप्यो, “जेतरा हुकम में आज तमने ह़मळावु तीहया आखाम ने मानजो। अने जत्यार तमु यरदन नंदी नी पार पुगो, जे तमारो भगवान यहोवा तने आपे, तत्यार मोटा-मोटा दगड़ा उबा कर लेजो अने तीमनी पोर चुनो लगाड़जो; अने पार हयवा पोर तीमनी पोर कायदा ना आखा बोलु ने लीखजो, आनीन करीन के जे देस तारा आड़ा-बुड़ा नो भगवान यहोवा आह़फा ना बोल नी अनसारे तने आपे, अने जीनी मे दुद अने मोद नी नंदी वये, तीहया देस मे तु जवा जोवे। अळतेण जे दगड़ाम ना बारा मे में आज हुकम आपु तीमने तमु यरदन नंदीन पार हय्न एबाल बड़ा पोर उबो करजे, अने तीमनी पोर चुनो लगाड़जे। अने तांत आपणा भगवान यहोवा नी लेदे दगड़ा नी एक वेदी बणावजे, पण तीहया दगड़ा ने अवजार सी घड़ीन नी बणावजे। आह़फा ना भगवान यहोवा नी लेदे दगड़ा नी एक वेदी बणावीन तीनी पोर तीनी जुगु होम बादा चड़ावजे। अने तांत मेलबादा चड़ावीन खाणु खाजो, अने आपणा यहोवा नी ह़ाते खुसी करजो। अने तीहया दगड़ा पोर आहया कायदा ना आखा बोलु ने चोखुझण लीख देजो।”
अळतेण मुसा अने लेवी पुंजारा आखा ईस्रायली माणहु सी आहयु बी केदा, “ए ईस्राएल ना माणहु, होगा रीन ह़मळो; आज ना दाड़े तु आपणा भगवान यहोवा ना माणहु बण जेला से। आनीन करीन आपणा भगवान यहोवा नी वात मानजो, अने तीना जे-जे हुकम अने रीती में आज तमने ह़मळावु तीमनो पाळण करजे।”
सराप नो बोल
अळतेण तीहयात दाड़े मुसो माणहुम ने आहयो हुकम आप्यो, जत्यार तमु यरदन नंदी ने पार कर लेवो तत्यार सीमोन, लेवी, यहुदा, ईस्साकार, युसुफ, अने बीन्यामीन, एतरा कुळ ना माणहु गीरीज्जीम बड़ा पोर उबा हय्न बरकत आपे। अने रुबेन, गाद, आसेर, जबुलुन, दान, अने नप्ताली, आहया एबाल बड़ा पोर उबा हय्न सराप आपे। तत्यार लेवी माणहु आखा ईस्रायली माणहुम ने आड़ीन केय:
“‘सराप वाळो से तीहयो माणेह जे कोय मुर्ती कारीगर सी घड़ावीन नीता बणावीन होगोत तीनी पुजा करे, काहाके आनी सी यहोवा ह़ीगी करे।’”
“तत्यार आखा माणहु केय, ‘आमीन।’
“‘सराप वाळो से तीहयो जे आह़फा ना आह्य-बाह ने हेटा जाणे।’
“तत्यार आखा माणहु केय, ‘आमीन।’
“‘सराप वाळो से तीहयो जे काना बीजा नी काकड़ ने सेटो करे।’
“तत्यार आखा केजो, ‘आमीन।’
“‘सराप वाळो से तीहयो जे आंदळा ने वाट गेथो भटकाड़ देय।’
“तत्यार आखा केजो, ‘आमीन।’
“‘सराप वाळो से तीहयो जे बीजा देस वाळा, नमल्या, नीता रंडायली ना नीयाव ने बगाड़े।’
“तत्यार आखा केजो, ‘आमीन।’
“‘सराप वाळो से तीहयो जे आपणी जीजी ह़ाते छीनाळु करे, काहाके तीहयी आह़फा बाह नी बदनामी करे।’
“तत्यार आखा माणहु केजो, ‘आमीन।’
“‘सराप वाळो से तीहयो जे काना जानवर सी छीनाळु करे।’
“तत्यार आखा केजो, ‘आमीन।’
“‘सराप वाळो से तीहयो जे आह़फा नी सग्गी बेनेह हय भले ह़ेवतर्याण ह़ाते, छीनाळु करे।’
“तत्यार आखा केजो, ‘आमीन।’
“‘सराप वाळो से तीहयो जे आह़फा नी ह़ाहु ह़ाते छीनाळु करे।’
“तत्यार आखा केजो, ‘आमीन।’
“‘सराप वाळो से तीहयो जे काना ने ह़ताय्न मारे।’
“तत्यार आखा केजो, ‘आमीन।’
“‘सराप वाळो से तीहयो जे वण-गुनाळ्ळा ने मार नाखवा नी लेदे धन लेय।’
“तत्यार आखा केजो, ‘आमीन।’
“‘सराप वाळो से तीहयो जे आहया कायदा ना बोलु ने मानीन पुरा नी करे।’
“तत्यार आखा केजो, ‘आमीन।’
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.