Paliya Bible
दानीयल 8
एक गाडरान अने एक बोकड़ान दरसन
बेलसस्सर राजा ना राज्य ना तीसरा साल मे तीहया पेल्ना दरसन नी बाद एक अळी वात मने दानीयल ने दरसन नी लारे देखाव पड़ी। जत्यार में एलाम देस मे सुसन नाम ना कीला मे रेतो हतो, तत्यार में दरसन मे देख्यो के में उले नंदी नी काठे से। अळतेण में डोळा उचा करीन देख्यो, के तीहयी नंदी नी अगळ बे ह़ींगड़ा वाळु एक गाडरु उबु हय र्यु, तीना बेम ह़ींगड़ा मोट्ला से, पण तीनी मे गेथु एक जादा मोटु से, अने जे मोटु से, तीहयु नान्लु ह़ींगड़ुन अळतेण नीकळलु हतु। में देख्यो के गाडरु बुडवणु, दखणाव अने धुराव भणीन ह़ींगड़ु देय, अने कोय जानवर तीनी अगळ उबु नी री सकतु हतु, अने तीना हात मे गेथु कानो कोयने नी बचाड़ सकत्लो; तीहयु आह़फा नीत मरजी नी अनसारे काम करीन बड़तु जतु हतु।
में सोचवात बाज र्यो हतो, ता में ह़ु देख्यो के एक बोकड़ो बुडवणो भणी गेथो नीकळीन आखी धरती पोर आसम फीर्यो के चालती वखत भोय्मे पोग नी टेकव्यो अने तीहया बोकड़ा ना बेम डोळा नी वचे एक देखवा लायक ह़ींगड़ु हतु। तीहयो तीहया बे ह़ींगड़ा वाळा गाडरान्तां जीन, जीने में नंदी ना काठे देखलो हतो, तीने आहयो खीजवाय्न पुरी ताखत सी घोदो देदो। में देख्यो के तीहयो गाडरा नी ह़ाते आवीन तीनी पोर खीजवायो; अने गाडरा ने ठोकीन तीना बेम ह़ींगड़ा ने तोड़ नाख्यो; अने गाडरा मे एतरी ताखत नी री के तीनी ह़ामने टेक सके। ता बोकड़ो तीने भोयमे पाड़ीन रोंदळी नाख्यो; अने गाडरा ने तीना हात मे गेथु छोड़ाव्वा वाळु कोय नी जड़्यु।
तत्यार बोकड़ो घणो घमंड करवा बाज ज्यो, अने जत्यार तीहयो ताखत वाळो हयो ता तीनु ह़ींगड़ु टुट ज्यु, अने तीनी बदले देखवा लायक च्यार ह़ींगड़ा नीकळीन ह़रग मे च्यारो-मेर वदवा बाज ज्या।
अळतेण आहया च्यार ह़ींगड़ा मे गेथु एक ह़ींगड़ु मे एक अळी नान्लु ह़ींगड़ु नीकळ आयु। तीहयु नान्लु ह़ींगड़ु मोटु हयवा बाज ज्यु, अने मोटु हयतु-हयतु घणु मोटु हय ज्यु। आहयु ह़ींगड़ु दखणाव, उगवणी ह़ोड़ बड़वा बाज ज्यु अने आहयु ह़ींगड़ु घटाळ्ळी धरती भणीन अगु बड़्यु। तीहयु ह़रग नी सेना लग पुग ज्यु; अने तीहयु तारामंडळी मे गेथा कंय ताराम ने धरती पोर पाड़ नाख्यु।1 तीहयु ह़रग नी सेना ना मुख्या लग पुग ज्यु, अने तीनी हमेसा नी होम बादा बंद कर देदु; अने तीनो चोखलो रेवा नो जागो बी हेटो पाड़ देदु। अने माणहु ना गुना ना कारण सी हमेसा नी होम बादा नी भेळे सेना ने बी तीना हात मे कर देदा, अने तीहयु ह़ींगड़ु सच्चाय ने कादा मे भेसकी देदु, अने तीहयु काम करते-करते पुरु हय ज्यु।
तत्यार में एक चोखला माणेह ने बोलते ह़मळ्यो; अळतेण एक अळी चोखलु माणेह तीहया पेल्ना बोलवा वाळा ने पुछ्यु, “हमेसा नी होम बादा अने उजाड़वा वाळा गुना ना बारा मे जे कंय दरसन देखलो से, तीहयो कारु तक पुरो हयहे; मतलब चोखला जागा ने अने सेना ने बेम ने रोंदळवा नु कारु तक हयतु रेहे?”
तत्यार तीहयो मने केदो, “जत्यार लग ह़ांतु अने ह़वारे बे हजार तीन ह़ोव वार लग नी हये, तत्यार लग तीहयु हयतु रेहे; तत्यार चोखलो जागो चोखो करहे।”
जीब्राएल ह़रगदुत नी लारे दरसन ने देखाड़नु
आहयी वात दरसन मे देखीन, में दानीयल, आने ह़मजवा नी कोसीत करवा बाज ज्यो; एतरा मे माणेह नो रुप लीन कानु मारी अगळ उबु हय रेलु देखाव पड़्यु। तत्यार मने उले नंदी नी वचे एक माणेह नो बोल ह़मळाय पड़्यो, जे आड़ीन केतो हतो, “ए जीब्राएल, हीय्या माणेह ने तीनी देखली वात ह़मजाड़ दे।”2 तत्यार जां में उबो हतो, तां तीहयो मारी ह़ाते आयो; अने तीनी आवतेत में घबराय ज्यो; अने मोडा ना भरहे पड़ ज्यो। ता तीहयो मने केदो, “ए माणेह नी अवल्यात, तीहयी देखली वात ने ह़मज ले, काहाके तीमनु मतलब आखरीत नी टेम मे पुरु हयहे।” जत्यार तीहयो मार ह़ाते वात करवा बाज र्यो हतो, तत्यार में मारु मोडु धरती भणी करीन घणी नींदर मे पड़ र्यो हतो, पण तीहयो मने सीमीन ह़ुदो उबो कर्यो। तत्यार तीहयो केदो, रीह ना आखरी ना दाड़ा मे जे कंय हयहे, तीहयु में देखाड़ु; काहाके आखरी नी ठेरावली टेम मे तीहयु आखु पुरु हय जहे।
“जे बे ह़ींगड़ा वाळु गाडरु तु देखलो से, तीनु मतलब मादी अने फारसीम ना बे राज्य से। अने तीहयो रोवार बोकड़ो युनान नु राज्य से; अने तीना डोळा नी वचे जे मोट्लु ह़ींगड़ु नीकळलु से, तीहयु पेल्लो राजा से। तीहयु ह़ींगड़ु जे टुट जेलु अने तीनी बदले जे च्यार ह़ींगड़ा नीकळला, तीनु मतलब आहयु से के तीहयु राज्य सी च्यार राज्य बणहे, पण तीमनी ताखत पेल्नान तेम नी रेय।
“आहया च्यारोव राज्य ना आखरी दाड़ा मे, जत्यार तीमना पापु नो घड़ो भराय जहे, ता एक राजो पयदा हयहे। तीहयो घणो हटाळ्ळो अने गलत वेहवार अने धोको देवा वाळो राजा रेहे। तीनी सक्ती वदु बड़हे, पण तीहया पेल्ला राजान तेवो नी हये; अने तीहयो वहराड़ नाखे एवी रीते माणहु ने खत्तम करहे, अने अगो बड़तो जाय्न काम करतो जहे, ताखत वाळा अने चोखला माणहु ना टोळा ने खत्तम करहे। तीनी आह़फा नी चलाकी ना कारण तीनी चलाकी अगी बड़हे, अने तीहयो मन मे घमंड सी बीह्या वगर घणा माणहु ने मारहे। तीहयो आखा अदीकार्या ना अदीकारी ना वीरोद मे बी उबो हयहे; पण आखरी मे तीहयो कोय ना हात सी मार खाया वगर खत्तम हय जहे। ह़ांतु अने ह़वारे ना बारा मे जे कंय तु देखलो अने ह़मळलो से तीहयु खरलु से; पण जे कंय तु दरसन मे देखलो से तीने बंद राख, काहाके तीहयु ढेरेत दाड़ा नी अळतेण हयहे।”
तत्यार दानीयल आहयो दरसन देखीन एतरो कमजोर हय ज्यो के मांदो पड़लो र्यो, जत्यार में वारलो हयो ता में उठीन पासो राजा नु काम-काज करवा बाज ज्यो; पण जे कंय में देखलो हतो तीनी सी में वहरायलो र्यो, काहाके तीने कोय ह़मजाड़वा वाळु नी हतु।
Source notes (2)
- Cross-reference परकासीतवाक्य 12:4
- Cross-reference लुका 1:19,26
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.