Paliya Bible
दानीयल 6
दानीयल नाहर ना खाडा मे
दारा ने आहयु वारु लाग्यु के आह़फा ना राज्य नी उपर एक ह़ोव वीह अदीकार्या ठेरायो, जे पुरा राज्य पोर हक राखे। अने तीमनी पोर तीहयो तीन मुख्या बणायो, जीनी मे गेथो दानीयल एक हतो, अने तीहया अदीकार्या लेखो-जोखो ईमने आप्या करता हता, आहयी रीते राजा नु कंय बी नुकसान नी हयतु हतु। जत्यार आहयु देख्या के दानीयल मे वारली आत्मा रेय, तत्यार तीने मुख्या अने अदीकार्या गेथी जादा ईज्जत जड़ी; अने राजा तीने पुरा राज्य पोर अदीकार्यो बणाव्वा चाह्यो। तत्यार मुख्या अने अदीकार्या राज्य ना काम ना बारा मे दानीयल ना वीरोद मे गुनो ह़ोदवा बाज ज्या; पण तीहयो भरहा लायक हतो, अने तीना काम मे कोय भुल नीता गुनो नी नीकळ्यो, अने तीहया नी ह़ोद सक्या। तत्यार तीहया माणहु केवा बाज ज्या, “आपणु तीहया दानीयल ना भगवान ना कायदा ने छोड़ीन, अळी बीजुन बारा मे तीना वीरोद मे कोय गुनो नी ह़ोद सकया।”
तत्यार तीहया मुख्या अने अदीकार्या राजान्तां साटात आया, अने तीने केदा, “ए राजा दारा, तु जलम जीवत्लो रेय। राज्य ना आखा अदीकार्या, मुख्या, मंतरी, जीला ना अदीकारी, अने मुख्या अदीकार्या एक-मन्या हय्न आहयो फेसलो लेदला से के राजा ने आहयी ह़ला आपया के राजा एवो हुकम नीकाळे, के तीस दाड़ा तक जे कोय, ए राजा, तने छोड़ीन काना बीजा माणेह नीता देवता पांह वीन्ती करे, तीने नाहर ना खाडा मे नाख देय। करीन ए राजा, हाव आसवो हुकम आप, अने आहयी चीट्ठी पोर साईन कर दे, जीनी सी आहयी वात, मादी अने फारसीम ना कायदा नी अनसारे, बदली नी सके।” तत्यार राजा दारा तीहयी हुकम नी चीट्ठी पोर साईन कर देदो।
जत्यार दानीयल ने आहयु मालम हयु के चीट्ठी पोर राजा दारा साईन कर देदलो से, तत्यार तीहयो आह़फा ना घोर मे ज्यो, तीना घोर नी उपरली मंजली नी खीड़की यरुसलेम ह़ेर भणी उगड़ली रेती हती। अने आह़फा नी रीती नी अनसारे तीहयो भगवान पांह दाड़ा मे तीन वार मांडा टेकीन वीन्ता करतो हतो अने घणो वारु से केतो हतो, तेमेत तीहयो तत्यार बी करतो र्यो।
तत्यार तीहया अदमी एक-मन्या हय्न आवीन दानीयल ने आह़फा ना भगवान नी ह़ामने वीन्ता करते अने रावण्या करते हात कर्या। हाव तीहया राजान्तां जीन, तीना राज हुकम ना बारा मे तीने केवा बाज ज्या, “ए राजा, ह़ु तु आसवो हुकम नी चीट्ठी पोर साईन नी कर्यो के जे माणेह तीस दाड़ा नी टेम मे तने छोड़ीन काना बीजा देवता नीता माणेह पांह वीन्ता करे, ता तीने नाहर ना खाडा मे नाख देय?” राजा जपाप आप्यो, “होव, मादी अने फारसी ना पक्का कायदा नी अनसारे आहयी वात पक्की से।”
तत्यार तीहया राजा ने केदा, “यहुदी केदड़ा मे गेथो जे दानीयल से, तीहयो, ए राजा, नी ते तारी भणी धीयान देदो, अने नी तारा हुकम आपली चीट्ठी पोर; अने तीहयो दाड़ा मे तीन वार भगवान पांह वीन्ता कर्या करे।”
आहयी वात ह़मळीन राजा घणो नराज हय ज्यो, अने दानीयल ने बचाड़वा करीन वात सोचवा बाज ज्यो; अने दाड़ु ने बुडते लग तीने बचाड़वा नी कोसीत करतो र्यो। तत्यार तीहया माणहु राजान्तां उतवाळ्या आवीन केवा बाज ज्या, “ए राजा, आहयु जान ले के मादी अने फारसीम नी मे आहयो कायदो से के जे हुकम राजा ठेराय देय तीने कोय नी बदल सकतो।”
तत्यार राजा हुकम आप्यो, अने दानीयल ने लावीन नाहर ना खाडा मे नाख देदा। तीहयी टेमे राजा दानीयल ने केदो, “तारो भगवान, जीनी तु हमेसा भक्ती करे, तीहयोत तने वचाड़े।” तत्यार एक मोट्लो दगड़ो लावीन तीहया खाडा ना मोडा पोर मेक देदा, अने राजा तीनी पोर आह़फा नी वीटीन छाप लगाड़ देदो के दानीयल ना बारा मे कंय नी बदलवा जोवे। तत्यार राजा आह़फा ना कीला मे जत र्यो, अने तीहयी राते तीहयो खाणु नी खादो अने खेल-नाटक नी देख्यो अने तीने नींदर नी आयी।
ह़वारे परगड़ फाटतेत दारा राजो उठ्यो अने नाहर ना खाडा भणी साटोत जत र्यो। जत्यार राजो खाडा नी ह़ाते आयो, तत्यार दुखी हय्न आड़वा बाज ज्यो अने दानीयल ने केदो, “ए दानीयल, ए जीवत्ला भगवान ना चाकर्या, ह़ु तारो भगवान जीनी तु जलम भक्ती करे, तने नाहर सी बचाड़ लेदो?”
तत्यार दानीयल राजा ने केदो, “ए राजा, तु हमेसा जीवत्लो रेय। मारो भगवान आह़फा ना ह़रगदुत ने मोकलीन नाहर ना मोडा ने आसम बंद कर देदो के तीहया मारु कंय बी नुकसान नी कर्या; आनो कारण आहयो से के में तीनी अगळ वण-गुनाळ्ळो हतो; अने ए राजा, में तारी ह़ामने बी कंय भुल नी कर्यो।”
तत्यार राजो घणो खुस हय्न, दानीयल ने खाडा मे गेथो नीकाळवा नो हुकम आप्यो। तत्यार दानीयल ने खाडा मे गेथो नीकाळ्या। तीना डील पोर एक घाव तक नी लाग्यो, काहाके तीहयो आह़फा ना भगवान पोर भरहो करतो हतो। तत्यार राजा हुकम आप्यो के जे अदमी दानीयल पोर गुनो लगाड़ला हता, तीमने आह़फा-आह़फाम ना सोरा-सोरी अने बयरा भेळ लावीन नाहर ना खाडा मे नाख देवो; अने तीहया खाडा ना बुंदे तक बी नी ज्या अने नाहर तीमने उपरेत झेलीन हाटका भेळ खाय ज्या।
तत्यार दारा आखी धरती पोर रेवा वाळा देस-देस अने राज्य-राज्य ना आखा माणहु, अने अलग-अलग भासा बोलवा वाळा माणहु नी जुगु आहयु लीख्यो, “तमारी सुक-सांती रात-दाड़ो बड़ती जाय! में आहयो हुकम आपु के जां-जां मारा राज्य नो हक से, तां वाळा माणहु दानीयल ना भगवान नी ह़ामने कापता अने बीहता रेहे, काहाके जीवत्लो अने हमेसा रेवा वाळो भगवान तीहयोत से; तीनु राज्य कदी नी खत्तम हये अने तीनु राज हमेसा रेहे। जे दानीयल ने नाहर सी बचाड़लो से, तीहयोत बचाड़वा अने छोड़ाव्वा वाळो से; अने ह़रग मे अने धरती पोर सेलाणी अने चमत्कारु ने उजन्ता करवा वाळो से।”
आहयी रीते दानीयल, दारा अने कुस्रु फारसी, बेम ना राज्य ना दाड़ा मे सुख सी र्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.