Paliya Bible
दानीयल 4
नबुकदनेस्सर नु बीजु ह़पनु
नबुकदनेस्सर राजा भणी गेथी देस-देस अने राज्य-राज्य ना माणहु, अने अलग-अलग भासा बोलवा वाळा जेतरा आखा धरती पोर रेय, तीहया आखा ने आहयी खबर जड़ी: “तमने घणी सांती जड़े। मने आहयु वारु लाग्यु, के आखा मे मुख्यो भगवान मने जे सेलाणी अने चमत्कार देखाड़लो से, तीमने उजन्ता करु। तीनी देखाड़ली सेलाणी केतरी मोटी, अने तीना चमत्कारु मे केतरी मोटी सक्ती उजन्ती हये! तीनु राज्य सदा नु अने तीनु राज-पाट पीड़ी सी पीड़ी तक बणीन रेय।
“में, नबुकदनेस्सर, मारा रेवा ना जागा मे सुख सी अने घणो खुसी मे रेतो हतो। में एवु ह़पनु देख्यो जीना कारण सी में बीह ज्यो; अने खाटला पोर पड़्या-पड़्या जे वीच्यार मारा मन मे आया अने जे वातु मे देख्यो, तीमना कारण मे घबराय जेलो हतो। तत्यार में हुकम आप्यो के बेबीलोन ना आखा जानकारु ने मारा ह़पना नु मतलब मने देखाड़वा नी लेदे मारी अगळ हजुर करे। जत्यार जानकारु, जादु-टोना करन्या, कसदी माणहु अने ह़ारो देखवा वाळा मोय आया, ता में तीमने मारु ह़पनु देखाड़्यो, पण तीहया तीनु मतलब नी देखाड़ सक्या। आखरी मे दानीयल मारी ह़ाते आयो, जीनु नाम मारा देवता ना नाम ना कारण बेलतसस्सर पाड़लु हतु, अने जीनी मे चोखला देवताम नी आत्मा रेय; अने में तीने मारु ह़पनु आहयु कीन देखाड़ देदो: ए बेलतसस्सर, तु ते आखा जानकारु नो मुख्यो से, मे जाणु के तारी मे चोखला देवताम नी आत्मा रेय, अने तु कानी बी वात ना कारण सी ना घबराये; करीन जे ह़पनु में देखलो से तीने मतलब भेळ देखाड़ीन ह़मजाड़ दे।
“जे दरसन मे खाटला पोर रीन देखलो से तीहयो आहयो से: में देख्यो, के धरती नी वचा-वच एक झाड़ से; तीहयु घणु उचु से। तीहयु झाड़ मोटु हय्न मजबुत हय ज्यु, अने तीनी उचाय ह़रग लग पुग जी। अने तीहयु धरती नी आखी काकड़ लग देखाव पड़तु हतु। तीना पान्टा घटाळा, अने तीनी मे ढेरेत फोळ हता, आञे लग के तीनी मे आखा नी लेदे खाणु हतु। तीनी तळे चोवगान ना आखा जानवरु ने साहळो जड़तो हतो, अने तीना डाळ्या मे ह़रग ना आखा चड़ा रेता हता, अने आखा जीवु ने तीनी सी खाणु जड़तु हतु।
“में खाटला पोर दरसन देखतो जीन ह़ु देख्यो, के एक चोखलो ह़रगदुत ह़रगे गेथो हेटो उतर्यो। तीहयो ज्योरेत आड़ीन केदो, ‘झाड़ ने बी वाड देवो, तीना डाल्या वाड देवो; अने तीना पान्टा झाड़ देवो अने फोळ ने वेरवी देवो; अने जानवरु तीनी हेटा सी छेटा हय जाय, अने चड़ा तीना डाल्या पोर गेथा उड जाय। ते बी तीना थुड़ ने मुळ्या भेळ जागा पोर छोड़ देवो, अने तीने लुहड़ा नी अने पीतळ नी ह़ाकळ वेर बांदीन चोवगान ना लील्ला चारा नी वचे रेवा देवो। तीहयु ह़रग नी धुवरी सी भीग्या करे अने जानवरु ने तेम लील्लो चारो खाय। तीनु मन बदली जाय अने माणहुन तेवु नी रेय, पण जानवरुन तेवु बण जाय; अने तीहयो ह़ात साल तक आहयीत हालत मे रेय। आहयो हुकम पेहरो देवा वाळा ह़रगदुत ना फेसला सी, अने आहयी वात चोखला ह़रगदुत ना बोल सी नीकळी, के जे जीवत्ला से तीहया जाण लेय के आखा मे मुख्यो भगवान माणहु ना राज्य पोर राज करे, अने तीहयु राज्य ने जीने गमे तीने आप देय, अने तीहयो नाना मे गेथा नाना माणेह ने बी तीनी पोर अदीकारी बणाय देय।’
“में राजा नबुकदनेस्सर आहयुत ह़पनु देख्यो। करीन ए बेलतसस्सर, तु आनु मतलब देखाड़, काहाके मारा राज्य मे बीजो कोय जानकार आनु मतलब मने ह़मजाड़ नी सकतो, पण तारी मे ते चोखला देवताम नी आत्मा रेय, आहया कारण सी तु तीने ह़मजाड़ सके।”
दानीयल नी लारे ह़पना नु मतलब देखाड़वु
तत्यार दानीयल जीनु नाम बेलतसस्सर बी हतु, थोड़ीक वार घबरायतो र्यो, अने सोचतो-सोचतो दुखी हय ज्यो। ता राजो केवा बाज ज्यो, “ए बेलतसस्सर, आहयु ह़पनु सी नीता आना मतलब सी तु दुखी ना हये।” बेलतसस्सर केदो, ए मारा मालीक, वारु रेय के आहयु ह़पनु तारा वेरी जुगु रेय। अने आनु मतलब तारा दुस्मन पोर पड़े! जे झाड़ ने तु देख्यो, जे मोटु हय्न टणकु हय ज्यु, अने जीनी उचाय ह़रग लग पुग जी अने जे धरती नी छेव लग देखाव पड़े, जीना पान्टा घटाळा अने फोळ ढेरेत हता, अने जीनी मे आखा नी लेदे खाणु हतु; जीना साहळा मे चोवगान ना आखा जानवरु रेता हता, अने तीना डाळ्या पोर ह़रग ना चड़ा रेता हता।
ए राजा, तीहयु झाड़ तुत से। तु मोटो अने ताखत वाळो हय ज्यो, तारी बड़ाय वदी अने ह़रग लग पुग जी, अने तारु राज धरती नी छेव लग पुगलु से। ए राजा, तु जे एक चोखला पेहरो देण्या ने ह़रग गेथो उतरते अने आहयु केते देख्यो के झाड़ ने वाड देवो अने तीने खत्तम करो, अने थुड़ ने मुळ्या भेळ धरती पोर रेवा देवो, अने आने लुहड़ा नी अने पीतळ नी ह़ाकळ वेर बांदीन चोवगान ना लील्ला चारा नी वचे रेवा देवो, काहाके तीहयु ह़रग नु झाकळु सी भीग्या करे, अने तीने चोवगान ना जानवरु नी ह़ाते चारो चरे; अने सात साल लग आहयु आसवी हालत मे रेय।
ए राजा, आनु मतलब आहयु से के आखा मे मुख्यो भगवान ठान लेदलो से के राजा तारी जीवाय मे हये, तीहयु आहयु से: के तने माणहु नी वचे गेथो नीकाळ देहे, अने चोवगान ना जानवरु नी ह़ाते रेही; तु बोळद्या नी तेम चारो चरही; अने ह़रग नु झाकळु सी भीग्या करही; अळी सात साल लग तारी हालत आसवी रेहे, जत्यार लग तु नी जाण लेय के माणहु ना राज पोर आखा मे मुख्यो भगवानेत राज करे, अने जीने गमे तीने तीहयो आप देय। चोखलो ह़रगदुत आहयो हुकम आपलो हतो के थुड़ ने मुळ्या भेळ छोड़ देवो, आनु मतलब आहयु से के तारु राज्य तारी जुगु बणीन रेहे; अने जत्यार तु जाण लेही के आखी कळी नो मालीक ह़रग मेत से, तत्यार तु अळी राज करही। आनीन करते, ए राजा, मारी आहयी वात मान ले, के कदीम तु पाप सोड़ीन गरीब माणहु पोर दया करे, ता पक्कु से के आसम करवा सी तारी सुक-सांती बणीन रेहे।
आहयु आखु कंय नबुकदनेस्सर राजा पोर हय ज्यु। बारे मयना वीतवान अळतेण जत्यार तीहयो बेबीलोन ना राजा ना बंगला नी छत पोर फीरवा बाज रेलो हतो, तत्यार तीहयो केवा बाज ज्यो, तत्यार मे वीच्यार कर्यो, “ह़ु आहयु मोट्लु बेबीलोन ह़ेर नी हय? जीने मे मारी मोट्ली ताखत सी बणावलो से, काहाके आहयु मारी राजधानी बणे अने आनी लारे मारा राज-पाट नी बड़ाय हये।”
आहया बोल मारा मोडा मेत हता के ह़रगे गेथी अवाज ह़मळायी: “ए राजा नबुकदनेस्सर, तारा बारा मे आहयो हुकम नीकळलो से: राज्य तारा हात मे गेथु नीकळी ज्यु। अने तने माणहुम नी वचे गेथो नीकाळ देहे, अने चोवगान मे जानवरु नी ह़ाते रेही; अने बोळद्यान तेम चारो चरही, सात साल तक तारी आहयीत हालत रेहे। तीनीन अळतेण तने मालम पड़हे के आखा मे मुख्यो भगवानेत माणहु ना राज्य मे राज करे, अने तीने जे गमे तीने आहयु राज्य आप देय।”
तीहयीत टेमे आहयो बोल नबुकदनेस्सर ना बारा मे पुरो हयो। मने माणहु नी वचे गेथा नीकाळ देदा। में बोळद्यान तेम चारो खादो। मारु डील ह़रग नु झाकळु वेर भीगतु हतु। मारा नीम्बाळा घुवड़ ना पाखड़ान तेम नाम्बा हय ज्या अने मारा नखड़्या चड़ा ना पोगु ना नखड़्यान तेम नाम्बा हय ज्या।
नबुकदनेस्सर नी लारे भगवान नी बड़ाय
ह़ात साल वीतवान अळतेण नबुकदनेस्सर ह़रग भणी गरबाय सी डोळा उचा कर्यो, अने मारी अक्कल पासी आय जी। में आखा मे मुख्या भगवान ने जुगाळो केम, जे अमरकायो से। तीनी बड़ाय आहयु कीन करवा बाज ज्यो। तीनु राज हमेसा नु से, अने तीनु राज्य पीड़ी सी पीड़ी लग बणीन रेय। धरती ना आखा रेवा वाळा तीनी अगळ कंय बी नी हय, अने तीहयो ह़रग नी सेना अने धरती ना रेवा वाळा जीव नी वचे, आह़फा नी मरजी नी अनसारे काम करे; अने तीने कोय रोकीन आसम नी की सकत्लो के “तु आहयु ह़ु कर्यो?”
तीहयीत टेमे मारी अक्कल जेम हती तेम हयजी; अने मारा राज नी बड़ाय नी लेदे मारो ह़ेक अने पागड़ी पासी आय जी। मारा मंत्री अने मुख्या माणहु मने भेट करवा नी लेदे आव्वा बाज ज्या, अने में मारा राज्य मे राजा ना रुप मे गणाय ज्यो; अने मारी अळी जादा बड़ाय हयवा बाज जी।
“हाव में नबुकदनेस्सर ह़रग ना राजा ना गुण गावु; अने तीनी भक्ती अने बड़ाय करु, काहाके तीना आखा काम खरला, अने तीना आखा वेहवार नीयाव ना से; अने जे माणहु घमंड सी चाले, तीमने तीहयो नीचा कर सके।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.