Paliya Bible
आमोस 5
पछतावो करवा नो बोलावो
ए ईस्रायल ना घोराणा, आहया दुख ना गीत ना बोल ह़मळ जे में तारा बारा मे केम: “ईस्रायल देस एक कुवारी सोरी से जे पड़ जी, अने अळी उठ नी सके; तीने तीनीत जागा मे नाख देदा, अने तीने उठाड़वा वाळु कोय नी हय।” काहाके भगवान यहोवा आसम केय: “जे ह़ेर मे हजार नीकळता हता, तीनी मे ईस्रायल ना घोराणा ना ह़ोवेत बचला रेहे, अने जीनी मे गेथा ह़ोव नीकळता हता, तीनी मे दह बचीन रेहे।”
यहोवा, ईस्रायल ना घोराणा ने आसम केय: मने ह़ोदवाळ्या पड़ो, ता जीवत्ला रेहु।
बेतेल ना ह़ोदवाळ्या ना पड़ो, ना गीलगाल मे भरायो, अने ना बेर्सेबा मे जावो; काहाके गीलगाल पक्कु गुलामी मे जहे, अने बेतेल ह़ुनु पड़हे।
यहोवा ना ह़ोदवाळ्या पड़ो, ता जीवत्ला रेहु, नीता तीहयो युसुफ ना घोराणा पोर आक्ठुन तेम पड़वा बाज जहे, अने तीहयु तीमने धपाड़हे, अने बेतेल मे तीने कोय ओलव्वा वाळु नी रेय। ए नीयाव ने बगाड़वा वाळा अने सच्चाय ने कादा मे भेसकवा वाळा! जे कचपचीया1 अने मरगसीरा2 ने बणाव्वा वाळो से, जे घणु अंदारलु ने ह़वारे नु वीजाळु बणावे, जे दाड़ा ने अंदारु करीन रात बणाय देय, अने दर्या नु पाणी धरती नी उपर वयाड़ देय, तीनु नाम यहोवा से। तीहयो तत्यारुत ताखत वाळा ने खत्तम कर देय, अने कीला ने बी उजाड़ बणाय देय।
जे माणेह कोरट-कचवरी मे सच्चाय सी नीयाव करे, तीनी सी तमु ह़ीगी करो; अने जे ह़ाचली केय, तीनी पोर कुहरायो। तमु जे गरीब ने रोंदळो, अने भेट कीन तीमनी पांह अन नो फाळो ली लेवो, करीन जे घोर तमु घड़ला दगड़ा ना बणावला से, तीमनी मे री नी सको; अने जे मनगमता अंगुर ना वाड़्या तमु लगाड़ला से, तीमनो ह़रु नी पी सको। काहाके में जाणु के तमारा गुना घणा जुदा से, तमु खरलाम ने वेला पाड़ो अने पय्हा मांगो, अने कमजोर माणहु नो कोरट-कचवरी ना फाटा पोर नीयाव बगाड़ो। करीन जे अक्कल वाळो हय, तीहयो एवी टेमे होगो रेय, काहाके टेम गांडी से।
ए माणहु, बुराय ने नी, भलाय ने ह़ोदो, के तमु जीवत्ला रेवो; अने मालीक यहोवा ह़ाचली तमारी ह़ाते रेहे, जेम तमु केवो। बुराय सी दुस्मनी अने भलाय सी मोंग राखो, अने कोरट-कचवरी ना फाटा पोर नीयाव ने बणाय्न राखो; ह़ु मालम सेनाम नो भगवान यहोवा युसुफ ना बचला पोर दया करे।
आहया कारण सी सेनाम नो भगवान, मालीक यहोवा आसम केय, “आखा चोवराया मे रड़वु-कलपवु हयहे; अने आखी ह़ड़कु मे माणहु हाय, हाय, करहे! तीहया कीरसाणु ने कलपवा जुगु, अने जे माणहु कलपवा मे वारला से, तीमने रड़वा-कलपवा बोलावहे; अने आखी अंगुर नी वाड़ी मे रड़वु-कलपवु हयहे,” काहाके यहोवा आसम केय, “में तमारी वच मे हय्न जही।”
गरा आय पड़े तमारी पोर, तमु यहोवा ना दाड़ा नी हेर करो! यहोवा ना दाड़ा सी तमारो ह़ु फायदो हयहे? तीहयो ते वीजाळु नो नी, पण अंदारलु नो दाड़ो रेहे। जीसम कानो नाहर सी नाहे अने तीने रीछड़ु भेटे! नीता घोर मे आवीन भीतड़ु पोर हात टेकवे अने गड़हो तीने चाय देय! ह़ु आहयु ह़ाचली नी हय के यहोवा नो दाड़ो वीजाळु नो नी, पण अंदारलु नोत रेहे? होव, एवु घणु अंदारलु नो जीनी मे कंय बी चमक नी हय।
“में तमारा तीवार सी ह़ीगी करु, अने तीमने रीकामा जाणु, अने तमारी मोट्ली पंचु सी में खुस नी हय। भले तमु मारी जुगु होम बादा अने अनबादा चड़ावो, ते बी में खुस नी हयु, अने तमारा पाळला जानवरुम नी मेल-मीलाप नी बादा भणी नींगा नी नाखु। तमारा गीतु नी कचाट मारी गेथी सेटी करो; तमारा रणथा नी रींग मे नी ह़मळु। पण नीयाव ने नंदीन तेम, अने सच्चाय ने सदा वयवा वाळु कोतड़ुन तेम वयवा देवो।
“ए ईस्रायल ना घोराणा, तमु ह़ुनहान जागा मे चाळीह साल तक जानवरु नी बादा अने अनबादा ह़ु मनेत चड़ावता र्या? तमु ते तमारा राजा नु तम्बु, अने आह़फाम ना मुरत्यान, अने आह़फाम ना देवता ना तारा ने लीन फीरता र्या। आहया कारण सी में तमु ने दमीस्क नी ह़ेली पार गुलामी मे कर देही, सेनाम नो भगवान यहोवा नो आहयोत बोल से।
Source notes (2)
- Footnote कचपचीया झीन्ला तारा नो टोळो
- Footnote मरगसीरा ह़रग मे तारा सी बणली हयणी
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.