Paliya Bible
आमोस 4
“ए सामरी राज्य ना मालदार बयरा1, आहयो बोल ह़मळो, तमु जे सामर्या बड़ा पोर से, जे गरीब ने वेला पाड़े, अने कमजोर ने रंदळ देवो, अने आह़फा-आह़फाम ना धणी ने केवो, ‘लाव, आप आमु पीया!’ भगवान यहोवा आह़फा ना चोखलापणा नी ह़ाम खाय्न केय, देखो, तमारी पोर एवा दाड़ा आव्वा वाळा से, के तमु काटा सी, अने तमारी अवल्यात ने माछला नी गळी सी हापक लेहे। तमु आखा वाड़ा ना नाके हय्न ह़ुदा नीकळ जहु अने तमने हरमोन ना बड़ा मे नाख देहे,” यहोवा नो आहयोत बोल से।
ईस्रायली ह़ुदर नी सक्या
“बेतेल मे आवीन गुनो करो, अने गीलगाल मे आवीन घणा गुना करो; तमारी भेट ह़वारे-ह़वारे, अने तमारो दहवो वाटो हर तीसरा दाड़े ली आया करो; वारलो से के केवा नी भेट खमीर भेसकीन चड़ावो, अने आह़फाम नी मरजी नी बली नी वात करीन तीमनो परच्यार करो; काहाके ए ईस्रायली, आसम करवा तमने गमे,” भगवान यहोवा नो आहयोत बोल से। “में ते तमारा आखा ह़ेरु मे काळ मोकल्यो अने तमारा आखा जागा मे खाणु नी कमी करलो से, ते बी तमु मारी भणी फीरीन नी आया,” यहोवा नो आहयोत बोल से। “जत्यार वाडणी ना तीन मयना री ज्या, ता में तमारी जुगु पाणी नी पाड़्यो; में एक ह़ेर मे पाणी पाड़ीन बीजा मे नी पाड़्यो; एक खेतर मे पाणी पड़्यो, अने बीजु खेतर जीनी मे नी पड़्यो, तीहयु ह़ुक ज्यु। करीन माणहु पाणी पीवा करीन एक जागे गेथा बीजा जागे भटकता-फीरता आया, पण आफर्या नी; ते बी तमु मारी भणीन नी फीर्या,” यहोवा नो आहयोत बोल से।
“में तमने झाळ अने गेरुय नाम ना कीड़ा सी मारलो से; अने जत्यार तमारा वाड़ग्या अने अंगुर ना वाड़्या, अने अंजीर अने जेतुन ना झाड़का घणा हय ज्या, ता टीड्या तीमने खाय ज्या; ते बी तमु मारी भणी फीरीन नी आया,” यहोवा नो आहयोत बोल से।
“में तमारी वच मे मीस्र देस नी गरान तेवी गरा फेलायो; में तमारा घोड़ा ने हपकाड़ीन तमारा जुवान ने तलवार सी मराय नाख्यो; अने तमारा पड़ावा नी गंद तमारीन्तां पुगाड़्यो; ते बी तमु मारी भणी फीरीन नी आया,” यहोवा नो आहयोत बोल से।
“में तमारी मे गेथा ढेरेत जणा ने उलट-फुलट कर देदो, जेम भगवान सदोम अने अमोरा ने उलट-फुलट कर देदलो हतो, अने तमु आक्ठु मे गेथु नीकाळलु लाकड़ु ह़रका ठेर्या; ते बी तमु मारी भणी फीरीन नी आया,” यहोवा आसमेत केय। “आहया कारण सी, ए ईस्रायल, में तारी ह़ाते आसमेत करही, अने आनीन करते के में तारी मे आहयु काम करवा पोर से, ए ईस्रायल, आह़फा ना भगवान नी अगळ आव्वा करीन तीयार हय जा!” देख, बड़ा ने बणाव्वा वाळो अने वाहळु ने बणाव्वा वाळो, अने माणहु ने तीमना मन ना वीच्यार देखाड़वा वाळो अने परगण फाटे ने अंदारलु करवा वाळो, अने जे धरती ना उचा जागा पोर चालवा वाळो से, तीनुत नाम सेनाम नो भगवान यहोवा से!
Source notes (1)
- Footnote मालदार बयरा मुल मे, ए बासान नी गायु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.