Paliya Bible
2 कुरन्थी 5
आपणु ह़रगे नु डील
आपणु जाणया के जत्यार आपणु धरती पोर वाळु डील तम्बुन तेम ओदरी जाय ता आमने भगवान वगे गेथु एक एवु डील जड़हे तीहयु डील माणहु ना हाते करीन बणावलु नी रेय; पण ह़रगे नु अने जलमकु टेकलु रेहे। हमणे ते आहया डील मे रीन आपणु रड़ी-कलपीन कंजारया, अने घण-जबर हेर करया के ह़रगे नु डील पेर लीया। के आने पेरवा सी आमु नांगरला नी देखायवा जोवे। अने आपणु आहया तम्बु ह़रका डील मे रीन भार मे डबाय्न कंजारता फीरया; काहाके आपणु, आहया डील ने उतारीन मरवा नी पण अळी आनी पोर ह़रगे वाळु डील पेरवा नी हेर करया। आपणु आनीन करते आहयी हेर करया के आहयु मरलु डील से तीहयु अमरकाय नी जीवाय मे डुब जवा जोवे। अने आहया अमरकाय डील अने अमरकाय जीवाय नी करते भगवान आपणु ने बणावलो से, अने तीहयो आपणु ने चोखली जीव आत्मा नी ह़ाय आप देदलो।
आहयी धरती पोर रीन आपणु हीम्मत राखया अने आहयु जाणया के जत्यार लग आपणा घोर ह़रका आहया डील मे रीया तां तक आपणु मालीक ईसु ना रेवा ना जागा गेथा नाम्बे से। एतरे आपणु मालीक ईसु नो सीक्को देखीन नी पण भरहो करीन जीवया। एतरे आमु हीम्मत राखया अने आमने आहया डील गेथा अलग हय्न मालीक भगवान ह़ाते रेवा जादा वारु गमे। एतरे अमारी मन नी खुसी आहयी से के भले आमु मालीक ईसु ह़ाते रीया भले तीनी गेथा अलग आहया डील मे रीया पण आमु तीने गमता रेवा जोवे। 1काहाके एक दाड़ो आपणो आखा नो नीयाव मसी नी नीयाव नी गादी अगळ हयहे अने आखा नी जीवाय ना कामु उजन्ता हय जहे, तीहयी टेमे आखा ने भला-बुरा काम कर्या तीनो हीसाब आपवा पड़हे। अने आह़फा ना डील मे रीन जेम कर्या तेम भुगतवा पड़हे।
ईसु मसी नी लारे भगवान ह़ाते मेळ करवा
आमु मालीक ईसु नी बीक मानीन माणहु ने ह़मजाड़या अने भगवान अगळ अमारी जीवाय उजन्ती से; अने मारी आहयी आह से के तमारु मन मे बी अमारी जीवाय उजन्ती से। ते बी आमु तमारी अगळ आह़फात अमारी मोटाय नी करया; पण तमने आहयो मोखो आपया के तमु अमारा बारा मे मोटाय करवा जोवे आनीन करते के तमु तीमने जपाप आप सको जे मन नी चोखली वात पोर नी पण माणहु ने देखाड़वा करीन ढोंगड़ाळी वात पोर मोटाय करे। कदीम आमु कमजोर से ता, भगवान जुगु; अने कदीम आमु नीचळा से ता तमारी जुगु। ईसु मसी नो मोंग आमने कब्जा मे कर र्यो; काहाके आमु आहयु ह़मजी जेला से के जत्यार एक आखा नी करते मर जेलो से, ता आखा मर जेला से। एम करीन तीहयो आखा नी करते आनीन करीन मर ज्यो, के जे जीवत्ला से, तीहया हाव गेथा आह़फा नी करते नी जीव्वा जोवे पण तीनी जुगु जीव्वा जोवे जे तीमनी जुगु मर ज्यो अने अळी पासो मर्या-ह़र्या मे गेथो जीवतो हय ज्यो।
एतरे हाव गेथा आमु कोयने बी माणहु नी वात नी अनसारे नी ह़मजया। आमु ईसु मसी ने बी माणहु नी वात नी अनसारे पेले ह़मजी रेला, ते बी तीने हाव हेम नी ह़मजया। एतरे हाव जे कोय ईसु मसी मे से तीहयो नवलो घड़ायलो से: जुन्ली वात जत री; अने देखो, तीहयी नवली वात आय लागी। अने आहयी आखी वात भगवान वगे गेथी से, आहयो भगवानेत ईसु मसी नी लारे आपणो मेळ आह़फा ह़ाते कर लेदो अने आहयी कळी ना माणहु ने आह़फा ह़ाते मेळ कराव्वा नु काम आमने ह़ोप देदु। भगवान ईसु मसी नी लारे आहयी कळी ना माणहु ह़ाते मेळ करवा बाज र्यो हतो, तीहयी टेमे आहयो भगवान आहयी कळी ना माणहु पोर गुनो लगाड़ीन वाक नी काड्यो अने हाव तीहयो आमने तीनी खुस-खबर नी लारे आह़फा ह़ाते मेळ करवा नु काम आमने ह़ोप देदो।
हाव ते आमु ईसु मसी ना दुत से, भगवान अमारी लारे तमारी पांह रावण्या कर र्यो, मसी भणी गेथी तमारी पांह अमारी रावण्या करया के भगवान ह़ाते मेळ कर लेवो। जे पाप गेथो अंजाण्यो हतो तीहयात ईसु मसी पोर भगवान आपणा आखा पाप नो भार मेल देदो अने एक कीया मे तीने पाप बणाय देदो। आनीन करते के आपणु तीनी मे हय्न भगवान नो धरम बण जीया।
Source notes (1)
- Cross-reference रोमीयो 14:10
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.