Skip to content
BibleKenya

Paliya Bible

2 कुरन्‌थी 1

पोलुस वारला से के केय

1

पोलुस भणी गेथी जे भगवान नी मरजी सी ईसु मसी नो नेवताळो से, अने भाय तीमुथीयुस भणी गेथी भगवान नी तीहयी मंडळी जुगु, जे कुरीन्‌थुस मे से, अने आखा अखाया जीला मे रेवा वाळा चोखला माणहु जुगु लीखला से:

आपणा बाह भगवान अने मालीक ईसु मसी भणी गेथी सुक अने सांती जड़ती रेय।

भगवान ने घणो वारु केणु

आपणा ईसु मसी ना भगवान अने बाह ने घणो वारु कीया, जे दया नो बाह अने आखी भाती नी सांती नो भगवान से। तीहयो आपणा आखा दुख मे सांती आपे; काहाके आपणु तीहयी सांती ना कारण जे भगवान आपणु ने आपे, तीने बी सांती आप सकया जे काना बी भाती ना दुख मे हय। काहाके जेम ईसु मसी ना दुख मे साजल्‌या रीया, तेमेत आपणु सांती मे बी ईसु मसी नी लारे साजल्‌या रीया। आमु दुख झेलया, ता आहयु तमारी सांती अने छुटकारा जुगु से, अने आमने सांती जड़ री ता तमने सांती आपवा करीनेत जड़ री: आहयी सांती तीहया आखा दुख ने अराम सी झेलवा मे मदत करहे, जे दुख आमु बी झेल र्‌या। तमारा बारा मे आमने पक्‌की आह से, काहाके आमने मालम से के जेम तमु अमारा दुख मे साजल्‌या से तेमेत अमारी सांती मे बी साजल्‌या से। 2

एतरे ए भायु अने बेन्‌या, अमारी पोर जे कळ-कळीन वीती तीहयी वात तमने पक्‌की मालम हयवा जोवे। आसीया परगणा मे अमारी उपर घणी आफत आय पड़ली हती, अने तीहयी आफत वेठाये नी एतरी जबर हती के आमु मर जाय ईसम हय जेला। ह़ाचली मे, आमु ते मन मे वीच्‌यार कर लेदला के आमने मोत नो डंड जड़ीत ज्‌यो। आहयु आनीन करते हयु के आमु अमारी पोर नी पण तीहया भगवान पोर भरहो करवा ह़ीकया जे मरला ने बी जीवाड़ देय। हाव, आहयो भगवान आपणु ने मोत मे गेथो बचाड़्‌यो, अने अगो बी घण-जबर मोत मे गेथो बचाड़हे, अने अमारी आहयी आह से के तीहयो अगो बी बचाड़तो रेहे। अने अमारी जुगु वीन्‌ती करवा नी लारे तमु बी भगवान ना साजल्‌या बणहु ता भगवान वीन्‌ती ह़मळीन आमने संयबरकत आपहे अने ढेरेत माणहु भगवान ने घणो वारु केता रेहे।

पोलसु नी यात्‌रा मे बदलाव

अमारी मोटाय, होव, अमारा खरला मन नी गवाय आहयी से के आहयी कळी मे रीन आखा ह़ाते अने खास करीन तमारी ह़ाते चोखलो अने खरलो वेहवार करला हता। आहयो वेहवार आहयी कळी मे रेवा वाळा माणहु नी अक्‌कल नी अनसारे नी पण भगवान नी दया नी अनसारे हतो। तमु जे भणे अने ह़मजे तीहयुत आमु लीख र्‌या, अने मे आह करु के तमु आहयी आखी वात ने सेल्‌ली कावा वारु ह़मजी जहु। आहयी वात ने तमु थोड़ीक ह़मजी बी जेला से एतरे तमु अमारी पोर मोटाय कर सकत्‌ला जेम आमु बी मालीक ईसु पासो आवहे तीहया दाड़े तमारी पोर मोटाय करहु।

अने आहयोत भरहो करीन मे तमारीन्‌तां आव्‌वा हींडतो हतो; के तमने एक कावा नी पण बे कावा संयबरकत जड़वा जोवे। 3एतरे तमारीन्‌तां माय्‌न मकीदुनीया जीला मे जवा हींडतो हतो, अने अळतेण मकीदुनीया जीला मे गेथो पासो तमारीन्‌तां आव्‌वा हींडतो हतो, अने तां गेथो तमने भेटीन युहद्‌या जीला मे जवा करीन खुसी सी वळाय सको। मे एमेत वीच्‌यार कर र्‌यो हतो ता मे काहा वचकी ज्‌यो? मे आहयी कळी ना मनख्‌यान तेम वीच्‌यार कर्‌यो ह़ु? अने तीहयी टेमे होव-होव आवही की देय अने तत्‌यारुत नी-नी मे नी आवु की देय। भगवान खरलो गवा से, के जे बोलु आमु तमने केदा तीमनी मे “होव” अने “नी” बेम नी जड़े। 4काहाके सीलवानुस अने तीमुथीयुस नी लारे जे भगवान ना बेटा ईसु मसी नी खुस-खबर तमारी वच मे पुगी; तीहया ईसु मसी नी वात बी मोडे करीन “होव” केवा अने मन मे “नी” की देवा नी वात नी हती; पण होवेत होव हतु। काहाके भगवान ना आखा वायदा पक्‌का से, तीहया आखा ईसु मे “होव” पुरा हय र्‌या: एतरे आपणु भगवान ना बड़ाय नी अनसारे भगवान नी बड़ाय करवा नी करतेत ईसु नी लारेत “आमीन” कीन हुकारया। अने भगवान आमने तमारी ह़ाते ईसु मसी ना भरहा मे पक्‌का बणावे, अने जे आपणु ने टाळलो से तीहयो आहयोत भगवान से। जे अमारी पोर छाप बी लगाड़ देदलो से के आमु तीना से, अने तीना केवा सी आत्‌मा ने अमारा मन मे आपलो से।

मे ह़ाचली केम भगवान आहयी वात नो गवा से, मे तमारीन्‌तां आव्‌वा हींडतो हतो; पण मे तत्‌यारुत तमने वडी-वडीन वेला पाड़वा नी हींडतो हतो, एतरे मे कुरीन्‌थुस ह़ेर मे तमारीन्‌तां नी आयो। अने आमु तमारी पोर राज करीन हक जमाड़वा हींड र्‌या? कदी नी, आमु ईसु पोर ना भरहा मे तमारी खुसी नी करतेत आमु तमारा साजल्‌या से। ईसु पोर भरहो करवा नी लारेत तमु टेक र्‌या, एतरे आमने तमारा भरहा पोर राज नी कराये।

Source notes (4)
  1. Cross-reference नेवताळा ना काम 18:1
  2. Cross-reference 1 कुरन्‌थी 15:32
  3. Cross-reference नेवताळा ना काम 19:21
  4. Cross-reference नेवताळा ना काम 18:5

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.