Skip to content
BibleKenya

Paliya Bible

1 कुरन्‌थी 16

ईसु पोर भरहो करन्‌या जुगु भेट करवा ना बारा मे

1

हाव, तीहयी भेट ना बारा मे जे भेट ईसु पोर भरहो करन्‌या चोखला माणहु जुगु भेळी करे। आहयी भेट ना बारा मे जीसम मे गलातीया जीला मे वाळी ईसु नी मंडळी ने हुकम आपलो हतो, तेमेत मे तमने बी हुकम आपु। हप्‌ता ना पेल्‌ना दाड़े तमु आखा थोड़ु-थोड़ु करीन तमारी कमाय मे गेथु भेळा करता रेवो। आनीन करीन के मे आवु तीहयी टेमे तमने भेट नी करवा पड़े। मे तमारीन्‌तां आवही तीहयी टेमे तमु टाळहु तीहया माणेह ने ओळखाण नी चीट्‌ठी लीखीन तमारी भेट भेळ तीने यरुसलेम ह़ेर मोकली देही। कदीम मने बी जवा पड़े, ता तीहया मार ह़ाते यरुसलेम आवहे।

पोलुस नु यात्‌रा नु काम

2

मे मकीदुनीया परगणा मे जही, ता तमारीन्‌तां आवही, काहाके मे मकीदुनीया जवा करीनेत योजना बणावलो से। बण जहे ता मे तमारी भेळतो रेही, खास करीन टाड नी टेम मे तमारी ह़ाते रेही, आनीन करीन के तमु मने मे जां ह़ारीक जवा हींडु, तां जवा करीन वळाय सको। मे चालु-चालुत तमने भेटवा नी हेर नी करतो, पण मारी आह आहयी से के मालीक ईसु नी मरजी हय, ता मे जरीक वार लग तमारी ह़ाते रेही। 3

पण मे पेन्‌तीकुस्‌त तीवार आवता लग ईफीसुस मेत रेही। काहाके मने भगवान नु काम करवा करीन मने वारलो मोखो जड़ जेलो से, अने तां ह़ारीक वीरोदी माणहु बी घण-जबर वद जेला से। 4

कदीम तीमुथीयुस आय लागहे, ता तीनो आव-भाव करीन धीयान राखजो काहाके तीहयो बी मारीन तेमेत मालीक ईसु नु काम कर र्‌यो। एतरे हीने बी हेटो नी ह़मज्‌जो। पण हीने सांती सी मारीन्‌तां मोकली देजो। काहाके तीहयो ईसु पोर भरहो करन्‌या टाळला भायु नी भेळतो आवहे, करीन मे तीनी वाट जोय र्‌यो।

भाय अपुल्‌लोस ना बारा मे आहयी वात से के मे हीने घण-जबर रावण्‌या करीन तमारीन्‌तां मोकल्‌यो, पण भगवान नी मरजी हती एतरे तीहयो हमणे तमारीन्‌तां नी आयो। एतरे अळतेण मोखो जड़हे, ता मे हीने तमारीन्‌तां मोकली देही।

आखरी हुकम अने घणो वारु से केम

जाळवीन रेवो, ईसु पोर पक्‌को भरहो राखो, हीमम्‌त राखो अने जोराका बणो तमु जे बी काम करो तीहयु काम मोंग सी करो। 5

ए भायु, अने बेन्‌या तमु स्‌तीफनुस ना घोराणा ने जाणो, तीहयो अखाया परगणा मे आखा नी पेले ईसु पोर भरहो करला, अने तमु बी ईसु पोर भरहो करन्‌या चोखला माणहु नी चाकरी करवा जलम तीयार रेवो। एतरे मे तमारी सी रावण्‌या करु के तमु एसवी चाकरी करन्‌या नी हक मे रेवो, जे एसवा कामु मे सात देय अने काठी मेहनत करे।

स्‌तीफनुस, फुरतुनातुस, अने अखयकुस आयो करीन मे खुस से। काहाके जे काम तमने नी बण्‌यु तीहयु काम तीहया करीन देखाड़ देदला से। तीहया, मारी अने तमारी आत्‌मा ने सुक आपला से। एतरे एसवा माणहु नी तमु ईज्‌जत करो। 6

आसीया परगणा मे रेवा वाळी ईसु नी मंडळी भणी गेथो मे तमने आवहु अने आवजो केम। अक्‌वीला अने पीरीस्‌कीला ना घोर मे भेळी हयवा वाळी मालीक ईसु नी मंडळी भणी गेथो बी मे तमने पुरा मन सी आवहु अने आवजो केम

ईसु पोर भरहो करन्‌या आखा भायु भणी गेथो मे तमने आवहु अने आवजो केम: मसी ना मोंग सी, तमु आंबा-सांबा, वारला से के? करीन पुछो।

मे पोलुस तमने मारे हाते करीन चीट्‌ठी लीखीन आवही अने आवजो की र्‌यो।

कदीम कोय मालीक ईसु मे एक-बीजा ने मोंग नी करे, तीनी पोर गरा आय पड़े! अमारा मालीक आव!

मालीक ईसु मसी नी दया तमने जड़ती रेवा जोवे।

मारो मोंग ईसु मसी मे तमु आखा मे जलमको रेवा जोवे। आमीन।

Source notes (6)
  1. Cross-reference रोमीयो 15:25,26
  2. Cross-reference नेवताळा ना काम 19:21
  3. Cross-reference नेवताळा ना काम 19:8-10
  4. Cross-reference 1 कुरन्‌थी 4:17
  5. Cross-reference 1 कुरन्‌थी 1:16
  6. Cross-reference नेवताळा ना काम 18:2

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.