Paliya Bible
1 थीसलुनीकीयो 3
तीमुथीयुस ने मोकलनु
काहाके आमु अळी वाट नी जोय सकता हता करीन आमु अथेंस ह़ेर मे एखला रेवा करीन ठाण लेदा। अने आमु तीमुथीयुस ने जे मसी नी खुस-खबर मे अमारो भाय अने भगवान नो चाकर्यो से आनीन करते मोकल्या के तीहयो तमने वातड़ा करे अने तमने भरहा ना बारा मे ह़मजाड़े। के आहया दुख ना कारण सी कोय बी वचकवा नी जोवे काहाके तमु ते जाणो के आमु आनीत जुगु ठेरावला से। काहाके पेलेत जत्यार आमु तमारीन्तां हता ता आमु तमने की देदला के आपणु ने दुख झेलवा पड़हे अने एमेत हयवा बाज र्यु जीसम तमु जाणो बी। करीन जत्यार मने अळी वाट नी जोवायु ता तमारा भरहा ना बारा मे जाणवा करीन तीमुथीयुस ने मोकल्यो के कंय माय्न आसम नी हय जाय के भुतड़ो तमने पारखे अने अमारी मेहनत वांयेबार जत रेय। 2
पण हाव तीमुथीयुस जे तमारीन्तां गेथो अमारीन्तां आवलो से, तमारा भरहा अने मोंग नी खुस-खबर ह़मळायो अने आहयी वात बी ह़मळायो के तमु सदा मोंग भेळ आमने फोम करत्ला अने जेम आमु तमने देखवा नी हेर करया तेमेत तमु बी करे। एतरे ए भायु, अने बेन्या, आमने अमारा आखा दुख अने वेला मे तमारा भरहा सी सांती जड़ी। काहाके हाव तमु मालीक मे वातड़ा रेहु ता आमु जीवत्ला से। अने जेवी खुसी आमने तमारा कारण सी आपणा भगवान नी अगळ से, तीना बदला मे आमु कानी रीते भगवान ने घणो वारु से कीया। आमु रात-दाड़ो घण-जबर वीन्ती करता र्या के तमारा मोडा देखया अने भरहा नी कमी ने पुरी करया।
हाव आपणो भगवान बाह आह़फोत अने मालीक ईसु तमारीन्तां आव्वा करीन अमारी अगवाय करे। अने मालीक आसम करे के जेम आमु तमारी ह़ाते मोंग राखया तेमेत तमारो मोंग बी तमारी वच मे अने आखा माणहु नी ह़ाते वदे, अने बड़तो जाय। काहाके तीहयो तमारा मन ने काठा करे अने जत्यार आपणो मालीक ईसु आह़फा ना चोखला माणहु ह़ाते आवे ता तीहया आपणा बाह भगवान नी हजरी मे चोखलापणा मे वण-गुनाळ्ळा ठेरे।
Source notes (2)
- Cross-reference नेवताळा ना काम 17:15
- Cross-reference नेवताळा ना काम 18:5
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.