Paliya Bible
1 थीसलुनीकीयो 2
पोलुस नु परच्यार नु काम
मोंगाळ्ळा भायु, अने बेन्या तमने खुद नेत मालम से के अमारु तमारीन्तां आवणु रीकामु नी हयु। 1तमारीन्तां थीसलुनीकीयो मे आव्वान पेले तमने मालम से के आमु फीलीपी मे दुख अने वेला वेठ्या तां घण-जबर वीरोद हतो ते बी आमु तमने भगवान नी खुस-खबर ह़मळाया। काहाके अमारी ह़ीकापण सण्का सी नी हय अने नी गलत काम सी नी हय, अने नी ते चलाकी सी हय। पण जेम भगवान आमने बणावलो से अने खुस-खबर ह़ोप्यो, आमु तेमेत बोलया; अने आञे माणहु ने नी; पण भगवान ने जे अमारा मन ने जाचे, तीने खुस करया। काहाके तमु जाणो, के आमु नी ते कदी मन वाळवा नी वात करया, अने नी लालच जुगु बोनु करया, भगवान गवा से। अने मसी ना चेला हयवा ना नाता सी आमु तमारी पोर बोजो नाख सकता हता, ते बी आमु माणहु ने अने तमने ईज्जत नी करावता हता, अने नी बीजा माणहु ने।
भले आमु मसी ना नेवताळा हयवा ना नाते आमु तमारी पांह मांग सकता हता, पण जेम आय्ह़ आह़फी ना सोरा ने पाळे-पोहे, तेमेत आमु बी तमारी ह़ाते रीन भोळाय देखाड़ला से। अने तेमेत आमु तमारी हेर करता जाय्न, नी पण भगवान नी खुस-खबर ह़मळावता जाय्न अमारो जीव बी तमने आपवा तीयार हता, आनीन करते के तमु अमारा मोंगाळ्ळा बण जेला हता। ए मोंगाळ्ळा भायु, अने बेन्या तमु अमारी मेहनत अने दुख ने फोम राखे, आनीन करते के आमु रात-दाड़ो काम-धंदो करता जाय्न तमने भगवान नी खुस-खबर ह़मळाया के तमारी मे गेथा कोय पोर बी बोज नी पड़वा जोवे।
तमु आहयी वात ना गवा से, अने तेमेत भगवान बी से, के आमु तमारी आखा ईसु पोर भरहो करन्या माणहु ह़ाते चोखलो, खरलो, अने वण-गुनाळ्ळो वेहवार कर्या। जेम तमु जाणे, के आमु तमारी ह़ाते तेमेत वेहवार करया जेम बाह आह़फा ना सोरा ह़ाते करे। तेमेत आमु बी तमने आखा ने ह़ीकापण आपया, अने सांती आपया, अने ह़मजाड़या। के तमारी चाल-चलण भगवान ने गमती रेय, जे तमने आह़फा ना राज अने बड़ाय मे बोलावे।
एम करीन आमु बी भगवान ने घणो वारु से केता, री र्या; काहाके जत्यार अमारी लारे भगवान नी खुस-खबर ना बोलु तमारीन्तां पुग्या, ता तमु तीने माणहु ना नी, पण भगवान ना बोलु ह़मजीन मान्या: अने ह़ाचलीन आहयु आसमेत से। अने तीहया तमारी मे जे भरहो राख र्या, काम बी करे। 2करीन तमु, ए भायु, अने बेन्या, भगवान नी तीहयी मंडळीन तेवी चाल चालवा बाज ज्या जे युहदी जीला मे मसी ईसु मे से, काहाके तमु बी तमारा माणहु नी लारे तेवोत दुख झेल्या, जेम तीहया युहदी नी लारे झेल्या। 3जे ईसु मसी ने अने ह़रगे गेथा केवा वाळा माणहु ने बी मार नाख्या अने आमने बी वेला पाड़्या। जे भगवान ने नराज करे; अने तीहया आखा माणहु नो वीरोद करे। अने तीहया आड़जात्या ह़ाते तीमना छुटकारा नी वात करवा सी आमने रोके के तीहया तीमना पाप नो घड़ो भरता रेय, पण तीमनी पोर मोट्ली गरा आय पड़ली से।
पोलुस नी मंडळी ने पासो भेटवा नी हेर
ए भायु अने बेन्या, आमु थोड़ीक वार लग तमारी गेथा मन मे नी, पण डील सी सेटा हय जेला। एतरे आमु तमने देखवा करीन घण-जबर हेर कर रेला। एतरे आमु तमारीन्तां पासा आव्वा कर रेला, खास करीन मे पोलुस, एक कावा नी पण कंय कावा आव्वा करलो पण भुतड़ो रोक देदलो। अमारी आह, नीता खुसी नीता बड़ाय नी पागड़ी ह़ु से? ह़ु आपणा मालीक ईसु मसी अगळ तीहयो आवहे तीहयी टेमे, तमुत नी बणो ह़ु? ह़ाचलीनेत, अमारी बड़ाय अने खुसी तमुत से।
Source notes (3)
- Cross-reference नेवताळा ना काम 16:19-24; नेवताळा ना काम 17:1-9
- Cross-reference नेवताळा ना काम 17:5
- Cross-reference नेवताळा ना काम 9:23,29; 13:45,50; 14:2,5,19; 17:5,13; 18:12
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.