Luk 17

Yeesu wa langidila kukidila kuta bubi na kufiila lusa

(Mat 18.6-7; 21; 22; Mlk 9.42)

1Ni, Yeesu haya sawiila badingisi* baayi ti: «Mauya makushwejya bandu mu bubi mitetebela bobo. Ila, kuloebwa kwa yowa mundu yivishila bangi mauya makushwejya mu bubi. 2Yandi yakana bilegela kudi yowa mundu kuangibwa ibu dikata mu singu na umu taasha mu iziba, kusidi iye kuonesha mububi yumo mu baaba basheenene.1

3Muyakane mukukwikengeyela! Ishu mu kwoobe wa kuteela bubi, beebe kamufiike kyaala! Na itu wakwibanga, umu fiile lusa.2 4Nangi waku teela bubi myunda musambo mu lusu lulumu, na ishu wa galusha koodi na, ‹Waku haajya lusa›, mbendo musambo, Umufiidi lusa bobo.»

Yeesu wa langidila bandu kukidila butabuke

5Nyuma ya haŋo, mitonge* haya mu sawiila Vidi-nyambi ti: «Hee! Vidi-nyambi utu hibikile kutabuka.» 6Na eyu haya ba sawiila ti: «Ishu kutabuka kwiinu kwandiyakana bushu kamuka kasheenene ga haladali, mwandi saudila wuu muti ti ukwitukune na ukakwikase muluuyi, naiwo ukibambana kumuteejya.»3

Bikibambana kuta muvubi

7Yeesu haya saula lungi ti: «Mundu yumo hamukidi hiinu uki bambana kuyakana na muvubi waaye wakunda ao kidindikijya bishi byaye. Yowa muvubi itu wagalusha ku makunda, buune, vidi waaye ukibambana kumusaudila ti: ‹Wayakane na wasombe kudye?› 84Bogo! Ukibambana kumusaudila ti: ‹Uni te kedi bidyaazi bangu, kisha ufundulujye ngubu yileela ni unitudile. Ni na beebe udya na unywe.› 9Haŋo, mukiejya ti vidi wa yowa muvubi umuteela abee kumona ti waata byooso biva musaudileeye? Hebo! 105Na banyu mbeebyo bobo. Hamukita byooso bikimulaa Kabejya kuta, muyakane mukuyakula ti: ‹Baashu tudi bavubi basidi na kitaata, twaata bobo maama matuvahajyibwa kuta.›»

Yeesu wa fuula badi na kivu umi

11Yeesu uvange mulwendo ku Yelusalema, haya kila mu mihandu ya kisi kya Samaliya na Galilaya. 12Havanangiye mukusosoka mumukola humo, bakivu bamo habaava kuvakumaana naye. Haba taluka munonga naye, 6 13na kusomba kuyaba ti: «Hee! Mulangidijyi Yeesu utu fiile lusa!» 7

14Yeesu bweebu bamona, haya ba sawiila ti: «Mwenange muka kwimoneshe uba mupelo*.»8 Haŋa haba bwanangi bakidi zila kuyenanga kokwa, haba fuu'a.9 15Yumo hamukidi haabo havamoneye ti waafuka haŋo, haya galu'a udi Yeesu, eyu mumu tumbijya Kabejya na muhuya watagadi. 16Haya kwaa hulu'a u magulu ga Yeesu na lukebo lwaaye mupaka mumavu, byamu teela abee. Yowa mundu gubwanangi mu Musamaliya.10 17Haŋo Yeesu haya yakula ti: «Miti, badi nanimba kumi bavafudibwa! Baaba bangi kitema badi kuni? 18Nda kukimoneka yungi hamukidi haabo gubu galu'a kuu mu hidiminya Kabejya mbungu, ha yuugu bobo sidi Muyaudi ye, halaa?» 19Haŋo Yeesu bya jyongodela yowa Musamalia ti: «Taluka, yene byobe. Butabuke bwoobe bwakufuula.»

Kuviyaa kwa butangala bwa Kabejya*

(Mat 24.23-41)

20Lusu lumo, Bafalisayo haba yuujya Yesu ti: Butangala bwa Kabejya* buuva akaayi? Bya bayaka ti: «Butangala bwa Kabejya* ndabukiva bidi kindu kikimoneka. 21Bandu ndabakuboya ti: ‹Mumone budi haŋa!›, ao ‹Niboobwa budi kokwa!› Muhudikijye bangu! Bobwa butangala ndabute tonaa hamukidi hiinu.»

22Ni Yeesu bya jyongodela badingisi* baaye ti: «Kindi kivanga muvula kungumona miimi Mwana wa Mundu nendusu lulumo, ila ndamwakungumona. 23Bandu bimusaudila ti: ‹Mulole udi kokwa!› Ao ‹Mulole udi haŋa!› Ila, banyu ndamueleka kujyukila kokwa. 24Kumona lusu lwa miimi Mwana wa Mundu hambialukanga, nimonekanga bushwa mwimwi ukimonekanga ku ulu na kumunukila musenge wooso. 25Ila, busu bwa beebyo, yinguajya busu nasube kwabule, na kubengeebwe na bandu ba masu maleelo. 26Byake bee byenange kindi kya Nuu, ni byakebee byabiyakananga mukindi kya miimi Mwana wa Mundu hambialuka. 27Kumona maama masu, bandu bene byake bee mukudya na kunywa, ku tundula na kukwitundujyena, mupaka lolwa lusu lwe shwela Nuhu mu safina. Haŋo mbila yikata haya nyomokela, na kubatotejya booso.11 28Yiyakana byake bee bya yeene kindi kya Loti. Bandu bene mukudya na kunywa, bene mukuula na kuudisha, benemukukunanga tumuka na kuyebeka byende. 29Ila, lusu lwenyomoka Loti mumukola Sodoma, Kabejya bya hukula mudilo bidi vula ya mabu kunyomoka ku ulu. Wowa mudilo hawafikinya bandu booso.12 30Nibebya byayi yakana mu masu mambialuka miimi Mwana wa Mundu.

31Mu lolwa lusu, yowa wooso yiyakana haulu ha kyende kyaye, nda sala lungi kwakushwela mukyende na kubuula bindu byaye mwakale. Byake bee yowa yiyakana kukunda dyaye nda loboka lungi kumukola. 32Muejye mama meebanga mukazi wa Loti13! 33Mundu wooso yikebanga kufuula mwejyo waye, uuzizimisha. Ila, yowa wooso yizizimisha mwejyo waye uyakana uufula. 34Ngibasaudila ti: bobwa bufuku bandu babidi biyakana mukutandabala mu buadidimo, yumo ubuudibwanga na yungi usiibwanga. 35Baabakazi babidi biyakananga mukushwa kukumo; yumo ubuudibwanga na yungi usiibwanga. [36Babalume babidi biyakana mukuvuba mu kunda didimo yumo ubuudibwa na yungi usiibwa.]»

37Haŋo badingisi* ba Yeesu haba muyuujya ti: «Vidi-nyambi, mama mitebwela kuni?» Bya bayaka ti: «Haŋa hadi kitumba, ni haŋa haki kumaananga zalula.»