Banda-Linda NT
1 Tesalɔnikə 5:16
Verse 16 is marked below, with the whole chapter around it. Read from the start
Əzü bale wusə̂ alɔ kə gu Âgbɔ̂ Əyïngerə wu ne
Alaye, gâ pâ əpʉ alɔ də əlo aərə səkɔ, ə sə sə tə ə̈bə̈ ərə ə̂në ä ta ngrowô ə ta də əpʉ nə kə e ne. Mbrə ə̂në e wusə̂ nə də ə̂tə̂ e tə ə̂rɔ̂nə ə pa əlo kə gu Âgbɔ̂ Əyïngerə sə kə sə mata əlo kə na əyïangba də tsheləbu. Alɔ ə̂në azü sə kə pa nə ə pa: «A sə də blatshe, ə̈bə̈ ərə kə mbrə tə̂ əzə̂ guta gu ne!» Kôto də̂, bə pa bə dji, tshefô sə kə jerə pâ əndje mata yashe ə̂në əgblə sə kə ka ətshə kɔ â əndje sə sə kə tɔ lə nə bale ne. Bale, e-e, alaye, e sə sə lə əbutshe ne ndə kə pa əlo səkɔ te e mata əyïangba ne. E sə nɔ̂ tə aneshe ə̂yîalɔ, tə aneshe ə̈kü alɔ. A sə sə tə azü tsheləbu wala azü əbutshe ne. Rəkɔ, a lö lö mata ə̂dû azü ne, bale ala əzə̂ sə̈ tə ə̈kü nə, tshelə ala əzə̂ sə̈ ambanə. Azü ə̂në əndje lo əlo kɔ, əndje lo əlo də tsheləbu, â azü ə̂në əndje ndju ə̂pî kɔ, əndje ndju də tsheləbu. Bale, əzə̂ ə̂në a sə tə azü ə̈kü alɔ kɔ, tshelə ala əzə̂ sə̈ ambanə. A tëgbɔ lɔsu əzə̂ də kə yi tə̂ nə̂ əzə̂ mata kandalinga kowɔ də̂ a yi kɔ ə tëgbɔ əpʉ kə she əzə̂ lə kuzu ə̂në lɔsu əzə̂ ka gâ pâ əpʉ nə kɔ mata kpɔtɔ kowɔ də̂ a yi kɔ.1 Mbrə ə̂në Ndjapä kê əzə̂ kê ndə kə pa əkɔ nə̂ ye te pâ əzə̂ ne, bale tshə kê əzə̂ ndə kə pa a sɔtə̂ sorô nə̂ alɔnɔ̂ tə̂ äwä Âgbɔ̂ Əyïngerə nə̂ əzə̂ Jezu Kristə, ə̂në tshə tshû mbrə əzə̂ gâ ye kɔ, kanika, kədə a sə tə asorô wala kədə a tshu, a sə tə asorô äwä bale də aəndje. Rəkɔ, e mʉ̈ əpʉ lə takpa tə̂ e ə gbɔ̈gbɔ lɔsu angâ e mata ə̂në e mbrə kɔ.
Bale əpʉ də əpʉ kə bla ətshe
Alaye, ərə ə̂në ä yu tshuku nə kə e kɔ kə də̂ kə pa e lʉ azü ə̂në əndje sə kə mbrə kosəra lə takpa tə̂ e kɔ, ə̂në əndje sə kə yisə̂ äwä nə̂ Âgbɔ̂ Əyïngerə kə e ə sə kə gbətɔ ətu e kɔ. E lʉ̈ əndje tə bandanə ə yïndə əndje mbrə kosəra nə̂ əndje nə ə̂në əndje sə kə mbrə nə kɔ. E sə̈ də blatshe lə takpa tə̂ e.
Alaye, ä sə kə mʉ əpʉ gâ pâ əpʉ sə̂ kə e: e pä əpʉ kə azü ə̂në əndje mbrə ərə mbrə də äwänə ne kɔ, e gbɔ̈gbɔ lɔsu azü ə̂në lɔsu əndje mɔ̂ gâ ye kɔ, e tɨ̈ azü ə̂në əndje gbɔ gbɔ ne kɔ gâ lafɔ, e känga tshelə e tə̂ azü nɔ̂. E bäta tə̂ e ndə kə pa əzü bale ma ma əmbrʉ ərə kə ə̈bə̈ ngâ nə mandâ əmbrʉ ərə ne. Bale, e prä äwä ə̂rɔ̂ ərə alɔnɔ̂ ndə kə mbrə nə, â sə kəmə lə takpa tə̂ e wala kə azü nɔ̂.
E sə̈ də ə̂rû alɔnɔ̂. E yü Ndjapä alɔnɔ̂. E zä mərshe kə Ndjapä lə aərə nɔ̂, mbrə ə̂në ərə ə̂në Ndjapä yində nə tə̂ äwä Jezu Kristə ndə kə pa e mbrə nə kɔ kə sə̂.
E rɨ̈ rɨ̈ əwo Âgbɔ̂ Yîrə̂ ne. E wü wü ndəma Ndjapä tə amba ərə ne; e wü tshelə aəpʉ nɔ̂ ə bäta ənə̂ sə̂ ə̂në ə sə tə ə̂rɔ̂nə kɔ; e kpë tə̂ e tə̂ âkâ aəmbrʉ aərə nɔ̂.
Ndjapä, tə kumungû blatshe, də ə̂tə̂ ye, kö e nɔ̂ tshegege kpî gashe mbrə ətshə! Tshə bäta əndu e nɔ̂, yîrə̂ e, lɔsu e gâ ndə akwa e kanika ə̈bə̈ əpʉ bale sə sə lə kumu e tə̂ alɔ kə gu Âgbɔ̂ Əyïngerə nə̂ əzə̂ Jezu Kristə ne! Ətshə ə̂në tshə ê e kɔ, tshə sə kə mbrə ərə ə lï də tshelə ndəma ye, â ətshə kə sə kə mbrə nə.
Alaye, e yü Ndjapä mbrə ä.
E blä alaye nɔ̂ ə ɔ̈ ama əndje tə alaye azü.
Mə tegbɔ ə̈nü e də əɨrɨ Âgbɔ̂ Əyïngerə ndə kə pa e dɨ ngrowô səye kə alaye nɔ̂.
Ə̂rɔ̂tə̂ Âgbɔ̂ Əyïngerə nə̂ əzə̂ də Jezu Kristə sə̈ də e!
Source notes (1)
- Footnote Wu Efaz 6.11-17.
Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.