1 Tesalɔnikə

Əlî Fraka ə̂në Palɔ tâ kə Laglizə əgɔ

TESALƆNIKƏ

Kumu əpʉ

Âdâ kə ta fraka səke də̂ yea

Əlî ngrowô ə̂në Palɔ tâ ə wlâ kə azü nə̂ Ndjapä mâ Tesalɔnikə kɔ kə səke. Palɔ nâ mâ je ə mʉ̂ Ə̂rɔ̂ Əpʉ nə̂ Jezu Kristə kə əndje (Wu Azü-awla 17.1-10). Alabə̈ azü tshe mâ je nə zâ äwä Jezu Kristə nə. Bale kʉ teashe mandânə, alabə̈ azü lə takpa tə̂ Ajuwufu sə̂ je, ə̂në əndje gʉ̂ azü nə ndə kə pa əndje afɔ də əpʉ tə̂ Palɔ nə də gbɔbəngâ nə nə. Azü nə̂ Kristə nə kô a-Palɔ nə də gbɔbəngâ nə də Silasə wû. Də tsheləbu, əndje wûtu də əndje lə gala nə gashu, â Palɔ nə də gbɔbəngâ nə də Silasə nə nâ mâ Bere.

Ə̂ngû bishi mandânə, Palɔ nə wlâ Timɔte ndə kə pa tshə na ə wu äwä kə sə azü nə̂ Kristə nə mâ Tesalɔnikə nə je. Alɔ ə̂në Timɔte nə nâ ə dô tə̂ ye ə gû, tshə pâ kə Palɔ nə ə pa əndje dâka pə tə̂ kə gbɔ də äwä nə, bale alabə̈ azü wə̂ra tə̂ əndje gâ ye ndə kə pa əndje mbrə kosəra ka ə sɔtə̂ rəgo ə zɨ. Əndje sə̂ kə pa nə ə pa Jezu sə kə gu nə katshä katshä səye, â ə də̂ əndje mbrə kosəra, kosəra nə sə kə sə kʉ tə ambanə. Alabə̈ əndje nə, tshelə akrɔ əndje sə̂ sə̂ kpirə̂ ne, mbrə ə̂në alayɔ əndje ngbatshe də agbɔbəngâ əndje ngbatshe tshû gâ ye, â Jezu nə gû gû ne kɔ. Âdârə ə̂në Palɔ nə tâ ngrowô nə kə əndje ndə kə pa tshə gbɔgbɔ lɔsu əndje, ə pa ndje ndə äwä kə gu Kristə nə kə əndje, â tshə sə kə mbrə yea tə̂ azü ə̂në əndje za lɔsu əndje kə ətshə kɔ. Rəkɔ, əndje sə kə za lɔsu əndje gâ pâ əpʉ nə ə pa alane ə sə alɔnɔ̂ də Âgbɔ̂ Əyïngerə nə je.

Əpʉ tshelə fraka səke na rəke

1. (1.1) Əpʉ kə bla ətshe

2. (1.2–3.13) Äwä ə̂në azü tshe Tesalɔnikə za lɔsu əndje kə Kristə də nə kɔ

3. (4.1-12) Kə sə ə̂në ə fʉ lə ala Ndjapä

4. (4.13–5.11) Kə za lɔsu gâ pâ əpʉ kə gu Kristə

5. (5.12-28) Əpʉ ə̂në Palɔ pâ, də bale əpʉ kə bla ətshe