Skip to content
BibleKenya

Banda-Linda NT

1 Tesalɔnikə 3

Âdârə ə̂në ä lï lï ndə kə kânga tshelə ä ə ka tʉ ʉrrr ne, ä wû tə ə̂rɔ̂nə ndə kə daka pə kʉtə̂ ä mâ Atanə1. Ä wlâ aye ä də Timɔte ə̂në tshə sə tə əyïkosəra nə̂ Ndjapä2 ndə kə mʉ Ə̂rɔ̂ Əpʉ nə̂ Kristə kɔ, ndə kə pa tshə gbɔgbɔ e ə pa əpʉ kə e ka e daka pə tə̂ äwä lɔsu, kanika, ə̈bə̈ əzü bale lə takpa tə̂ e te te mbrə aərə əyo ə̂në ä sə kə wu nə kpəsəye kɔ ne. Alɔ ə̂në ä dâka pə gâ ngotə̂ e kɔ, ä pâ kə e angbʉlînə ə pa a wu əyo je; tə nə kə wûtu kɔ, e wûsə̂ əpʉ nə gâ ye. Âdârə ə̂në, mə lï lï ndə kə pa mə ka kʉ ʉrrr ne, ə̂në mə wlâ Timɔte ndə kə pa tshə na ə wusə̂ əpʉ gâ pâ əpʉ lɔsu e kɔ kə sə̂. Awa mbrə̂ əmə â mə pâ djablo frɔ̂ e gâ ye ndə kə pa kosəra ə̂në ä mbrə̂ gâ ye kɔ ə sə kʉ tə ambanə nə ne.

Bale, kpəsəye, Timɔte tô mâ ndə e mâ je ə gû gâ ye; tshə pâ ə̂rɔ̂ əpʉ kə ä gâ pâ əpʉ lɔsu e də kə yi tə̂ nə̂ e. Tshə pâ ndje kə ä ə pa e sə kə li tshelə e alɔnɔ̂ gâ pâ ä, e sə də əgo ndə kə wu ä mata ə̂në ä sə ndje də əgo ndə kə wu e kɔ. Rəkɔ, alaye, lə aərə nɔ̂ ə̂në ə sə kə za awa gâ lə ä də aərə əyo nə̂ ä nɔ̂, lɔsu ä zɨ̂tɨ mbrə əpʉ nə̂ ye, mbrə əpʉ lɔsu e. Mandânə səye, əwu ä gû gâ lə nə gâ ye, mbrə ə̂në e daka pə kə gbɔgbɔ tə̂ e tə̂ äwä lɔsu e tə̂ äwä Âgbɔ̂ Əyïngerə. Ä sə kə za mərshe kə Ndjapä atâ gâ pâ əpʉ nə̂ e, mbrə ə̂rû nɔ̂ ə̂në ä sɔtə̂ nə mbrə e lə ala Ndjapä kɔ? Sɔ də tsheləbu sɔ də alɔ, ä sə kə yu Ndjapä ngbatshe ndə kə pa tshə za äwä kə ä, ä wu ala e, kanika e sɔtə̂ alabə̈ aərə ə̂në ə daka tə̂ e tə̂ äwä lɔsu nə kɔ.

Ndjapä də ə̂tə̂ ye, tə Abä əzə̂, gâ ndə Âgbɔ̂ Əyïngerə nə̂ əzə̂ Jezu krɔ̈ äwä kə ä, ä na ndjɔ mâ ndə e je! Âgbɔ̂ Əyïngerə mbrə̈ ndə kə pa kə yi tə̂ lə takpa tə̂ e gerə də kə yində ə̂dû azü nɔ̂ gërə ndje alɔnɔ̂ lə takpa tə̂ e, ə lï də kə yində e ə̂në ä yində e kɔ! Tshə gbɔ̈gbɔ lɔsu e kanika e sə tə azü ə̂në əpʉ sə sə lə kumu e ne, e sə kpî mbrə Abä əzə̂ də Ndjapä, tə̂ əlo kə gu Âgbɔ̂ Əyïngerə nə̂ əzə̂ Jezu də azü nə̂ ye nɔ̂.

Source notes (2)
  1. Footnote Wu Awla 17.15.
  2. Footnote Əndje də Ndjapä kə mbrə kosəra kɔ. Alabə̈ afraka Ndjapä də ama grakə pa: bəngâ ä də̂ əyïkosəra.

Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.